2 CRÓNICAS 6 - Biblia Quichua Cañar 2010

Salomón Diospac huasita Diosman mingashcamanta(1 R 8.12-66)

1Chashna cacpimi Salomonca:

«Mandac Dioslla canca

pura tutapimi causasha nircangui.

2Shina cacpipish, ñucaca

can causachunmi

shuc huasita shayachircani.

Chai huasipimi canca huiñaita

causangui» nirca.

3Chai quipaca Jatun mandac cutimushpami, tucui tandanacushca israelcunata bendiciarca. Chaicamanca tandanacushca israelcunaca tucuimi shayacurca.

4Shina cacpimi paica: «¡Israelcunata Mandac Diosca alli nishca cachun! Ñuca taita Davidman pai ima nishcataca paipac maquihuan ruhuashpami pactachishca. Paica:

5“Ñuca acllashca israelcunata Egiptomanta llucshimushca punzhamanta pacha, tucui Israel aillucunapac pueblocunamantaca maijantapish ñuca shuti causana huasita shayachichunca, mana acllarcanichu. Ñuca israelcunata mandachunca maijantapish manarac acllarcanichu.

6Ashtahuanpish ñuca shuti chaipi causachunca Jerusalentami acllarcani. Ñuca acllashca israelcunata mandachunca Davidtami acllarcani” nishcami carca.

7Shina nicpimi, ñuca taita Davidca israelcunata Mandac Diospac shutipi mañana huasita ruhuanataca paipac shungupi yuyarishca carca.

8Ashtahuanpish Mandac Diosca ñuca taita Davidtaca: “Ñucaman mañana huasita shayachinatami cambac shungupi yuyarircangui. Can chaita yuyarishcaca allimi can.

9Shina cashpapish huasitaca mana canchu shayachingui, ashtahuanpish cambac churimi ñucaman mañana huasitaca shayachinga” nishcami carca.

10Mandac Diosca pai cushami nishcataca pactachishcami. Chaimantami ñucaca Mandac Dios ima shina nishca shinallatac ñuca taita Davidpac randi, israelcunata mandangapac tiyarinapi tiyarircani. Shinallatac israelcunata Mandac Diospac shutipi mañana huasitapish shayachircani.

11Chai huasipimi israelcunahuan ari nishcata huacaichina Arcata churarcani» nirca.

Salomón Diosta mañashcamanta

12Shina nishca quipami Salomonca mandac Diospac altar ñaupapi shayarishpa, tucui tandanacushca israelcunapac ñaupapi maquita chutarca.

13Salomonca shayarina shuc bronce patatami ruhuachishca carca. Chai shayarinaca largomanpish, anchomanpish ishcai metro ishcai chunga pichca centimetromi carca. Altomanca shuc metro quimsa chunga pichca centimetromi carca. Chai shayarinataca chaupi pambapimi churashca carca. Chaiman huichicushpami, tucui israelcunapac ñaupapi cungurishpa, jahuaman maquita chutashpa:

14«¡Israelcunata Mandac Dioslla, can Dios shinaca jahua pachapipish, cai pachapipish mana tiyanchu! ¡Canta tucui shunguhuan cazushpa, cambac ñaupapi alli catic, alli serviccunata llaquishpami, can imata nishcatapish pactachingui!

15Canta servic ñuca taita Davidman cushami nishcataca pactachishcanguimi. Cambac shimihuan huillashcataca cambac maquihuan ruhuashpami, cunan punzhapi ricushca shinallatac pactachishcangui.

16Israelcunata Mandac Dioslla, cunanca canta servic ñuca taita Davidman cushami nishcataca pactachiyari. Paitaca: “Cambac huahua huahuacunamanta, ñuca ñaupapi Israel llactata mandangapac tiyarinapi tiyaric runaca mana illangachu. Chaipacca ñuca ñaupapi can causashca shinallatac, cambac huahua huahuacuna ñuca mandashcata cazushpami alli causana can” nircanguimi.

17Shina cashcamanta israelcunata Mandac Dioslla, cunanca canta servic ñuca taita Davidman cushami nishcataca pactachi.

18Ashtahuanpish Mandac Diosca, ¿cai pachapi causaccunahuan causangachu? Riqui, jahua pachapac ashtahuan jahuaman cac jahua pachapish can Dios causangapacca mana pactanchu. ¡Ñuca shayachishca cai huasicarin maitatac pactangayari!

19Shina cacpipish, ñucata Mandac Dioslla, canta servic ñuca cambac ñaupapi caparishpa, cunan cashna mañashcataca uyaiyari.

20Canhuan tupana cai huasitaca tutapish, punzhapish chapacunguilla. Canllatacmi: “Cai huasipimi ñucaca causasha” nircangui. Chaimanta canta servic ñuca caipi mañashcata uyanguiyari.

21Canta servic ñucapish, can acllashca israelcunapish cai huasipi canta mañacucpica uyanguiyari. Can causacuc jahua pachapi uyashpa, ñucanchic juchacunata perdonanguiyari.

22Maijan cashpapish, paipac ricsishcahuan juchallicpi, cambac cai huasi ucupi tiyac altar ñaupapi huillachun pushamucpica,

23jahua pachapi uyashpa, canta serviccunataca imata ruhuana cashcata ruhuanguiyari. Canta mana manchactaca pai mana allita ruhuashca shinallatac, paimanca llaquita japina cashcata cungui. Cashcata ruhuactaca imatapish cashcata ruhuashcamantami, chashna allicunata japina cashcata cungui.

24Can acllashca israelcunaca canta mana cazushpa juchallishcamantami paicunata piñaccunapac ñaupapi llaqui tucunga. Shina tucushpaca, canman tigrarishpa cambac shutita alli nishpa, cai huasipi mañacpica,

25jahua pachapi uyashpami, can acllashca israelcunapac juchataca perdonangui. Shina perdonashpaca, paicunapac ñaupa taitacunaman can cushca llactamanmi cutichimungui.

26Canta mana cazushpa, paicuna juchata ruhuashcamantaca jahua pachata huichcashpami mana tamyachingui. Paicunata chashna llaquichicpica, cai huasipi canta mañashpami, cambac shutita alli nishpa, canman tigraringa.

27Shina ruhuacpica, jahua pachapi uyashpami, canta serviccunapac juchatapish, can acllashca israelcunapac juchatapish perdonangui. Canta cazushpa purichunpish, alli ñanta ricuchishpa yachachingui. Can acllashcacunaman can cushca llactapipish tamyachingui.

28Cai llactapica jatun yarcaipish, ungüipish, chagracuna chaquinapish, yuracuna quilluyanapish, langostacuna tucuchinapish, mana cashpaca volac animalcuna tucuchinapish tiyangachari, shinallatac paicuna causacuc llactaman paicunata piñaccuna shamushpa, muyushpa llaquichingapac shayaricpi, mana cashpaca imapish shuctac llaquicuna, shuctac ungüicuna tiyacpica,

29maijan shuclla cashpa, mana cashpaca tucui can acllashcacuna cashpa, shinallatac shungupi ungüi japishcata yachashpaca cai huasiman maquita chutashpami canta mañangacuna.

30Shina mañacpica, can causana jahua pachapi uyashpami, paicunapac juchacunata perdonangui. Shina Perdonashpaca, paicuna imata ruhuashpa causashca shinallatac cungui. Gentecunapac shungutaca canllami ricsingui.

31Can shina ruhuacpimi, ñucanchic ñaupa taitacunaman can cushca llactapi causacushpaca, tucui causai punzhacunapi canta manchashpa, can yachachishcacunata cazushpa causangacuna.

32Shinallatac shuc llactamanta shamushca, mana can acllashca israelpuramanta cashpapish, can jatun cashcata, imatapish ruhuaclla Dios cashcatami cantaca yachac chayangacuna. Chashna yachashpami, cambac shutita alli nishpa, cai huasipi maquita alzashpa canta mañac shamunga.

33Chashna mañacpica, can causacuc jahua pachapimi uyangui. Shina uyashpami, shuc llactamanta cacpipish, pai imata mañashca shinallatac ruhuangui. Chashna ruhuacpimi, tucui cai pachapi causaccunaca cambac shutita ricsishpa, can acllashca israelcuna shinallatac canta manchashpa causanga. Shinallatac ñuca shayachishca cai huasipica cambac shutita alli nishpa mañanatapish yachanga.

34Can acllashca israelcuna paicunata piñaccunahuan macanacungapac llucshishpaca, maita cachashca ñantami ringacuna. Chashna ricushpami, can acllashca puebloman tigrarishpa, cambac shutipi mañangapac, ñuca shayachishca cai huasiman ñahuita churashpa, Mandac Diostaca mañangacuna.

35Shina mañashcata jahua pachapi uyashpaca, paicuna mañashca shinallatac paicuna ima nicushcata cungui.

36Juchata mana ruhuac runaca shucllapish mana tiyanchu. Canta mana cazushpa juchallicpica, paicunahuanca yallitami piñaringui. Chashna piñarishpami, paicunataca caru llactaman cashpa, cuchulla llactaman cashpa, prezu apachun, paicunata piñaccunapac maquipi churangui.

37Paicunaca prezu apashca llactapi cashpami, canta mana cazushcata yuyaringa. Shina yuyarishpami paicuna mañashpaca: “Juchatami ruhuashcanchic. Millaita ruhuashpami pandarishcanchic” ningacuna.

38Shina nishpa paicunata piñaccunapac llactapi prezu cashpa, paicunapac tucui shunguhuan, tucui almahuan, canman cutirishpa, paicunapac ñaupa taitacunaman cushca llactata, can acllashca pueblota, canman ñuca shayachishca cai huasita chapashpa canta mañangacuna.

39Paicuna shina mañacpica, can causacuc jahua pachapi uyashpa, paicuna mañashcata cungui. Shinallatac paicuna canta llaquichishpa juchallishcata perdonangui.

40Cunanca ñuca Dioslla, caipi canta mañashcataca cambac ñahuihuan ricunguiyari. Cambac ringrihuan uyanguiyari.

41Mandac Dioslla, cunanca canpish, chai Arcapish can samarina pushtupi causangapac shamuichic. Mandac Dioslla, cambacta ruhuac curacunapish quishpirishcata ricuchic churanata churarishca cachuncuna. Canhuan causaccunaca allicunahuan cushicushpa causachun.

42Mandac Dioslla, aceitehuan cahuishca cambac jatun mandacmanca ama huashata ricuchinguichu. Canta servic Davidta llaquishcataca yuyaringui» nirca.