1¡Mandac Diosta pagui nichicyari!
¡Paipac shutipi mañaichicyari!
Pai imata ruhuashcataca
shuctac gentecunaman huillaichicyari.
2Paita cantaichicyari.
Salmocunahuan paita cantaichicyari.
Sumaimana pai ruhuashcacunata
parlaichicyari.
3Jucha illac paipac shutimanta
cushicuichicyari.
Mandac Diosta mashcaccunaca
shungumanta cushicuichicyari.
4Mandac Diostapish,
paipac podertapish mashcaichicyari.
Paipac ñahuitaca
punzhanta mashcaichicyari.
5Pai ruhuashca sumaimanacunatapish,
jatun mancharinacunata ruhuashcatapish,
paipac shimihuan rimashpa
llaquichinatapish yuyarichicyari.
6Diosta servic Abrahampac
huahua huahuacuna.
Pai acllashca Jacobopac
huahua huahuacuna paita yuyarichicyari.
7Paica ñucanchicta Mandac Diosmi.
Paica tucui cai pachapimi mandacun.
8Pai ari nishcataca
huiñaitami yuyaricurca.
Huaranga huaranga huahuacunahuanpish
mana cungarishpa
huiñaita pactachingallami.
9Chaitaca Abrahamhuanpish,
Isaac-huanpish ari nircami.
10Chaitaca Jacobomanmi mandashpa curca.
Israelcunahuanmi huiñaicaman ari nirca.
11Chashna ari nishpaca:
«Canaán llactatami
cancunapac cachun cusha» nirca.
12Paicuna ashalla tucushpa,
shucpac llactapi causacucpi,
13paicuna llacta llacta puricucpi,
shuc llactamanta shuctac gentecunahuan
tandarishpa causacucpica,
14paicunata llaquichichunca
mana saquircachu.
Ashtahuanpish paicunamantami
jatun mandaccunataca llaquichirca.
15Paica: «¡Aceitehuan cahuishca
ñuca mandaccunapica
ama tuparinguichicchu!
¡Ñucamanta huillaccunataca,
ama llaquichinguichicchu!» nirca.
16Paicunapac llactamanca
yalli yarcaitami cacharca.
Tucui micuna granocunatami
chingachirca.
17Paicunapacmanca shuc runatami
ñaupachishpa cacharca.
Paica Josemi carca.
Paitaca huatashca shina servichunmi
catushca carca.
18Paipac chaquipica grillocunata churashca,
cutin cungapica cadenacunata churashcami.
19Dios huillashca pactangacaman
huichcashca carca.
Mandac Dios rimashcami
José ima shina cacta ricuchicurca.
20Jatun mandacmi cacharichun mandarca.
Chashna mandacpimi,
gentecunata mandacca cacharirca.
21Chashna cacharishpami Josetaca
chai mandacpac huasitapish,
tucui pai charishcacunatapish
mandachun churarca.
22Shinallatac pai churashca
mandaccunatapish,
pai munashca shina cazuchichun,
pushac yuyaccunatapish
alli yachachichun churarca.
23Chai quipami israelcunaca
Egiptoman yaicurca.
Chashna yaicushpami Jacoboca
Cam shuti allpapica shuctac llactamanta
shamushca shina causarca.
24Chaipimi pai acllashcacunataca
achcata mirachishpa,
paicunata piñaccunata atishpa
ashtahuan sinchi gentecunata ruhuarca.
25Shina cashpapish Diosca
pai acllashcacunata piñachun,
paita serviccunataca
llullashpa llaquichichunmi
chai gentecunapac shungupi piñana
yuyaita churarca.
26Chai quipami pai acllashca
paita servic Moisestapish,
Aarontapish cacharca.
27Chaipimi Dios rimashca señalcunata
ricuchirca.
Cam llactapica
jatun mancharinacunatami ruhuarca.
28Amsata cachashpa chai llactata
tucui tutayachicpipish
pai rimashca shimitaca
mana cazurcacunachu.
29Chai yacucunata yahuarta ruhuashpami,
tucui challuacunata huañuchirca.
30Chai llactapica sapocunatami
yallita mirachirca.
Jatun mandacpac huasi ucucaman
sapocunaca yaicurca.
31Dios mandacpimi chuspicunapish,
usacunapish puyu shina
tucui llactapi jundarca.
32Paicunapac llactamanca
tamaipac randica runduta,
shinallatac rupacuc ninatami cacharca.
33Chashna ruhuashpami
uvas chagratapish,
higo yuracunatapish tucuchirca.
Paicunapac tucui llactapimi
yuracunatapish polvoshpa tucuchirca.
34Dios mandacpimi langostacunapish,
saltashpa puric animalcunapish
yallita mirashpa,
35tucui quihuatapish,
chaipi tucui pucushcacunatapish
tucuchirca.
36Chai llactapi tucui punta
huacharishcacunatami huañuchirca.
Chaica chai sinchirac cashpa
charishca punta churicunatami huañuchirca.
37Pai acllashcacunataca cullquindi,
curindimi llucchirca.
Paicunapac aillupica ungushcaca
shucllapish mana tiyarcachu.
38Egiptopi causaccunaca
yalli manchaihuanmi causacurca.
Chaimantami israelcuna llucshicpica,
yallita cushicurcacuna.
39Paicunata llanduchunca puyuta,
tutata achicyachichunca
ninatami cacharca.
40Paicuna mañacpica codorniz
animalcunatami cacharca.
Shinallatac jahua pachata tandatami
mana nicta cararca.
41Rumi quingraita chaupishpami
yacuta llucchirca.
Chai yacuca chaquishca allpacunatami
jatun yacu tucushpa callparca.
42Chaica paita servic Abrahamman
paipac jucha illac shimihuan
ari nishcata yuyarishpami pactachirca.
43Chashnami paipac gentecunataca
cushicuihuan llucchirca.
Pai acllashcacunaca cushicuihuanmi
cantashpa llucshirca.
44Shuc llactapi causaccunapac
allpacunata cushpami,
chai runacuna tarpushca chagracunata
paicunaman curca.
45Chaica quillcashpa mandashcacunatapish,
pai rimashcacunatapish
pactachichunmi chashnaca curca.
¡Mandac Diosta alabaichicyari!
Who We AreWhat We EelieveWhat We Do
2025 by iamachristian.org,Inc All rights reserved.
