1Cancuna allpata japishpa, chaipi causashpa, cazuchunmi Mandac Diosca cai mandashcacunatapish, pactachinacunatapish, yachachishcacunatapish yachachichun mandarca.
2Canpish, cambac huahuacunapish, nietocunapish canta Mandac Diosta manchachunmi yachachini. Unaita causangapacca tucui punzhacunami cai mandashcacunata yuyarashpa, cazuna canguichic.
3Israelcunalla uyaichicyari. Lechepish, mishquipish yacu shina callpacuc llactapi tucui imata cancuna ruhuashca alli llucshichunca caicunata yuyarashpami, pactachina canguichic. Chashnami ñaupa cancunapac taitacunaman Mandac Dios nishca shina achca tucushpa causanguichic.
4Israelcunalla uyaichicyari. Ñucanchicta Mandac Diosca shucllami.
5Mandac Diostaca tucui shunguhuan, tucui yuyaihuan, tucui munaihuan cuyangui.
6Cai mandashcacunataca cancunapac yuyaipi alli huacaichinguichic.
7Caicunataca huasipi cashpapish, ñanta ricushpapish, sueñungapac siririshpapish, jataringapacpish huahuacunaman yachachingui.
8Yuyarinalla cachunca, maquipipish, frentepipish huatashpa puringui.
9Cambac huasi pilarcunapipish, pungucunapipish quillcangui.
Mandac Diosta tucui shunguhuan cazunamanta10Cancunapac taita Abrahamman, Isaacman, Jacoboman cungapac ari nishca llactaman Mandac Dios cancunata yaicuchicpica, cancuna mana ruhuashca sumac jatun llactacunapimi causanguichic.
11Huasicunaca cancuna mana jundachishca sumaccuna junda, cancuna mana allashca yacu junducunapish, cancuna mana tarpushca uvas chagrapish, olivos yuracunapish tiyangami. Chaicunata mana nicta micushpaca,
12Egipto llactapi cancuna huatashca shina causacushcamanta llucchic Mandac Diosta pacta cungaringuichicman.
13Mandac Diosta manchanguichic, paillata servinguichic, paipac shutillapi imatapish ari ninguichic.
14Shuctac dioscunata ama catinguichicchu. Llacta muyundipi causaccunapac dioscunapac ñaupapi ama cunguringuichicchu.
15Ashtahuanpish cancunapac chaupipi causacuc Mandac Diosca paipaclla causachunmi munan. Pacta pai nina japiric shina piñarishpa, cai pachamanta chingachinman.
16Masá llactapi Mandac Diosta ruhuashca shina, ruhuashpa ama piñachinguichicchu.
17Mandac Dios mandashcacunatapish, pactachinacunatapish, yuyarashpa allita cazunguichic.
18Cancunapac taitacunaman cushami nishpa ari nishca llactata japishpa, alli causangapacca Mandac Diospac ñaupapi imatapish allita, cashcata ruhuashpa causanguichic.
19Cancuna chashna ruhuacpimi, Mandac Diosca pai nishca shina, tucui cancunata piñaccunata llucchishpa cachanga.
20Caya mincha cancunapac huahuacuna: “Mandac Dios mandashca pactachinacunapish, pactachinacunapish, yachachishcacunapish, ¿imatatac nisha nin?” nishpa tapucpica,
21paicunataca: “Ñucanchicca Egiptopica huatashca shinami Faraonta servishpa carcanchic. Chaimantaca Mandac Diosmi paipac poderhuan llucchimurca.
22Mandac Dios Egipto llactapica ñucanchic ñaupapimi Faraontapish, paipac familiacunatapish llaquichishpa, jatun milagrocunatapish, pi mana ruhuaipaccunatapish ruhuarca.
23Ñucanchic taitacunaman cungapac ari nishca llactaman pushangapacmi llucchirca.
24Mandac Diosmi cai mandashcacunata pactachichun, paita manchashpa causachun, Egipto llactamanta llucchimurca. Shina ruhuashpaca, tucui ñucanchic causaipi alli cachun, shinallatac cunancaman causacushca shina causachunmi mandarca.
25Mandac Dios nishca shina, cai mandashcacunata paipac ñaupapi tucuita ruhuashpami, imatapish cashcata ruhuashun ninguichic” nirca.
Who We AreWhat We EelieveWhat We Do
2025 by iamachristian.org,Inc All rights reserved.
