1 SAMUEL 26 - Biblia Quichua Cañar 2010

David Saulta perdonashcamanta

1Zif pueblopi causaccuna Gabaa puebloman chayashpami Saulhuan tupashpaca:

—Davidca shitashca pambamanta inti llucshina ladoman cac Maquila lomapimi miticushpa tiyacun— nirca.

2Shina nicpimi, Saulca shitashca pamba Zifpi Davidta mashcangapac israelcunapuramanta ashtahuan sinchi quimsa huaranga soldadocunata pushashpa rirca.

3Saulca shitashca pambamantaca inti llucshina ladoman cac Maquila lomapimi carpa huasita shayachishpa tiyacurca. Chai lomaca ñan ladopimi carca.

David chaipi tiyacushpaca Saulpish shitashca pambaman paita catishpa shamushcatami yachac yacharca.

4Chaimantami Davidca pacalla chapaccunata cachashpa, Saúl chaipi cashcata alli yacharca.

5Shina yachashpami Davidca Saúl carpa huasita shayachishpa tiyacuc pambaman rishpa Saultapish, paipac soldadocunata mandactapish, Nerpac churi Abnertapish maipi sueñucucta alli ricurca. Saulca carpa huasicunata shayachishca chaupipimi sueñucurca. Cutin soldadocunaca paipac muyundipimi sueñucurcacuna.

6Davidca heteopuramanta Ahimelectapish, Sarviapac cari huahua Joabpac huauqui Abisaitapish tapushpaca:

—¿Saúl sueñucuc carpa huasicunaman pitac ñucahuan risha ninguichic?— nirca.

Shina nicpimi Abisaica:

—Ñuca canhuan urai risha— nirca.

7Shinami Davidpish, Abisaipish chai tutallatac soldadocunapacman rirca. Saulca paipac lanzata uma ladopi shayachishpami carpa huasipi sueñucurca. Cutin Abnerpish, soldadocunapish, Saulpac muyundipimi sueñucurcacuna.

8Shina ricushpami Abisaica Davidtaca:

—¡Cunanmi, Diosca canta piñactaca cambac maquipi churashca! Cunanca, paita lanzahuan ñuca huañuchingapac saqui. Paitaca shuc shitai allpacaman pasachishpa huañuchisha— nirca.

9Shina nicpimi, Davidca Abisaitaca:

—Ama huañuchichu. Mandac Dios acllashca jatun mandacta huañuchicpica, paipish llaquichingami— nirca.

10Shinallatac Davidca:

—¡Mandac Diospac shutipimi nini: Mandac Diosllatacmi paitaca llaquichinga, mana cashpaca paipac huañuna punzhami chayanga, mana cashpaca jatun macanacuipimi chingaringa!

11Mandac Dios acllashca jatun mandacta ñuca huañuchinamantaca Mandac Diosllatac jarcachun. Cunanca paipac uma ladopi shayacuc lanzata, jarro yacutapish apashpa jaculla— nirca.

12Shina nishpami Davidca lanzatapish, jarrotapish, Saulpac uma ladomanta apashpa rirca. Chaitaca pipish mana ricurcachu, mana ricsircachu. Cuidaccunapish mana sintircacunachu. Mandac Dios yallita sueñuchicpimi, tucui mashna munai sueñucurca.

13Davidca shuc ladoman pasashpa, caruman tucushpami shuc lomapi shayarirca. Chai lomaca paicunamanta carupimi carca.

14Chaipi cashpami, Davidca soldadocunatapish, Nerpac churi Abnertapish caparishpaca:

—Abner, ñuca caparicuctaca ¿Manachu uyangui?— nirca.

Shina nicpimi Abnerca:

—Jatun mandacta caparingapacca, ¿canca pitac canguiyari?— nirca.

15Shina nicpimi, Davidca Abnertaca:

—¿Canca tucuita yalli sinchi runami cangui? ¿Israelpurapica can shina runaca pitac tiyanyari? ¿Ima nishpatac jatun mandac cambac amotaca mana cuidarcangui? Soldadocunapuramanta shucmi jatun mandac cambac amotaca huañuchingapac yaicurca.

16Chashna mana cuidashpaca, mana allitami ruhuashcangui. ¡Mandac Diospac shutipimi nini: Cancunaca huañunatacmi canguichic! ¡Mandac Dios churashca cancunata jatun mandactami mana alli cuidashcanguichic! Cunanca ricui. ¿Jatun mandacpac uma ladopi tiyacushca lanzapish, jarropish maipitacyari?— nishpa tapurca.

17Shina nicpimi, Saúl David rimashcata ricsishpaca:

—Ñuca huahua Davidlla, ¿manachu can rimaricungui?— nirca.

Shina nicpimi Davidca:

—¡Ari, ñuca amo jatun mandaclla! ¡Ñucallatacmi rimaricuni!— nirca.

18Shinallatac:

—¿Ima nishpatac ñucata mandac canta servic ñucataca llaquichingapac catinguiyari? ¿Imatatac ruhuashcaniyari? ¿Ima mana allitatac ñuca maquihuanca ruhuashcaniyari?

19Jatun mandac ñuca amolla, canta servic ñuca rimashcata uyai. Mandac Diosllatac ñucata llaquichichun canta yuyachicushpaca, ofrendata chasquichun. Ashtahuanpish runacunalla yuyaita cucucpica, Mandac Diosllatac yallita llaquichichun. Paicunami Mandac Dios cushca llactata ama ñuca japichun: “¡Shuc dioscunata servingapac ri!” nirca.

20Cunanca, Mandac Diospac ñaupamanta caru llactapi ñuca yahuarta jichachun ama saquinguichuyari. Ashtahuanpish israelcunata jatun mandacca sachapi yututa catic shina, piquita catic shinami japingapac llucshishca— nirca.

21Shina nicpimi Saulca:

—Ñuca huahua Davidlla, ñucaca juchatami ruhuashcani. Cunanca cutilla, ashtahuanca mana llaquichishachu. Canca ñuca causaita yalli cuyashpami, cunanca mana huañuchishcagui. Riqui, ñucaca yuyai illac runa shinami, mana allita ruhuashpa pandarishcani— nirca.

22Shina nicpimi Davidca:

—Riqui, can jatun mandacpac lanzaca caipimi. Servicpuramanta shuc runata apachun caiman cachai.

23Mandac Dios cashcata ruhuacmanpish, alli cazucmanpish cuna cashcata cuchun. Cunanca Mandac Diosllatacmi cantaca ñuca maquipi churarca. Ashtahuanpish ñucaca Mandac Dios acllashca jatun mandacta mana huañuchircanichu.

24Riqui, cunanca cambac causaita yalli cuyashpami canta mana huañuchircani. Chaimanta Mandac Diospish ñucata cuyashpa tucui llaquimanta huacaichichun— nirca.

25Shina nicpimi, Saulca Davidtaca:

—¡Ñuca huahua Davidlla, canca alli nishcami cangui! Canca ima jatun ruhuaicunatapish allita ruhuashpami tucuita mishangui— nirca.

Chai quipaca Davidca ñanta japishpa rircallami. Saulpish paipac huasiman cutircallami.