2 SAMUEL 14 - Biblia Quichua Cañar 2010

Joab Absalonta cutichimushcamanta

1Sarvia huarmipac cari huahua Joabca jatun mandac David shungumanta Absalonta llaquicuctami yachac chayarca.

2Chaimantami Joabca Tecoa pueblomanta shuc yachac huarmita pushamuchun cacharca. Chai huarmitaca: «Canca maijan huañushcamanta duelo churanata churarishpa, llaquilla tucushpa, jatun mandacpacman ri. Mishquilla ashnacuc-huanpish mana cahuirishpa, achca huatacunata maijan huañushcamanta duelo churanata churashca shinalla ricurigri.

3Chaimantaca jatun mandacpacman ri. Chaiman chayashpaca, tucui ñuca ima nishcata ningui» nirca.

Joabca tucui pai imata ninatami nirca.

4Shina nicpimi, Tecoa pueblomanta huarmica jatun mandacpacman rishpa, cazushcata ricuchingapac pambacaman cumurishpa, jatun mandactaca:

—¡Jatun mandaclla, ñucata ayudaiyari!— nirca.

5Shina nicpimi, jatun mandacca:

—¿Imatac tucungui?— nirca.

Shina nicpimi, chai huarmica:

—¡Ñuca cusaca huañurcami, viudamari cani!

6Canta servic ñucaca ishcai huahuacunatamari charircani. Shina cashpapish paicunaca piñanacushpami pambapi macanacushpa, pipish mana misacpi, shucca caishucta chugrichishpa huañuchishca.

7Cunanca tucui familiacunami canta servic ñucataca piñai callarincuna. Ñucataca: “Paitapish chashnallatac huañuchingapac huauquita huañuchicta apamui. Pai imata japina cacpipish huañuchishunllami” nincuna. ¡Chashna ruhuashpaca shuc mecha japiricucta huañuchic shinami ñuca cusapac shutitapish, paipac huahua huahuacunatapish cai pachamanta chingachinata munancuna!— nirca.

8Shina nicpimi, jatun mandacca:

—Cambac huasiman rilla. Ñami canta ama pingaichichun mandagrini— nirca.

9Shina nicpipish, Tecoa pueblomanta huarmica:

—¡Jatun mandac ñuca amolla, ima juchanchina cacpipish, ñucata, ñuca huasi ucupuracunata juchanchichun! ¡Ashtahuanpish can jatun mandacpish, can mandanapish ama juchanchishca cachun!— nirca.

10Shina nicpi, jatun mandacca:

—Maijan canta piñactaca ñucapacman pushamunguilla. Cantaca mana ashtahuan llaquichingachu— nirca.

11Shina nicpimi, chai huarmica:

—Jatun mandaclla, huañuchishpa yahuarta jichashcamanta huañuchiccuna ñuca huahuata ama llaquichishpa, huañuchichun Diosta mañanguiyari— nirca.

Shina nicpimi, jatun mandacca:

—¡Mandac Diospac shutipimi nini: Cambac huahuapac shuc acchallapish mana allpapi urmangachu!— nirca.

12Shina nicpipish chai huarmica:

—Jatun mandaclla, canta servic ñucataca shuc cutinllahuan rimachun saquiyari— nirca.

Shina nicpimi, jatun mandacca:

—Rimailla— nirca.

13Shina nicpimi, chai huarmica:

—Jatun mandaclla, ¿imamantatac Dios acllashca runacunataca llaquichinata yuyacungui? Can jatun mandacllatac nishca shinaca cambac churita shuctac llactamanta mana cutimuchun saquishpaca, canllatacmi mana allita ruhuangui.

14Ñucanchicca tucuimi huañunalla canchic. Pambapi tallirishca yacu shina maita mana tandaipacmi canchic. Shina cashpapish, Diosca pimantapish mana causaita quichunchu. Chaipac randica llactamanta llucchishpa cachashcacuna paimanta ima shinapish ama ashtahuan caruyachunmi munan.

15Tucui runacuna manchachicushcamantami cunanca can ñuca amitota caita ningapac shamurcani. Canta servic ñucaca: “Jatun mandacta ñuca mañacpica,

16Ñucatapish, ñuca huahuatapish huañuchishpa Dios cushca llactamanta chingachisha nicuc runacunamanta misangami” yuyashpami shamurcani.

17Cunanca, canta servic ñucaca: “Can jatun mandac imatapish allita ñucaman ruhuachunmi munani. Ñucata jatun mandaclla, Diospac ángel shina allitapish, mana allitapish ricushpa allichicmi cangui. ¡Chashna cashcamanta can jatun mandactaca Diosllatac pushashca cachun!” nishami— nirca.

18Shina nicpimi, jatun mandacca huarmitaca:

—Ñuca tapushcata ama llullashpa cutichi— nirca.

Shina nicpimi huarmica:

—Jatun mandaclla, imata tapusha nishpaca tapuilla— nirca.

19Chashna nicpimi jatun mandacca:

—Chashna nichunca, ¿manachu Joabllatac yachachishpa cacharca?— nirca.

Shina nicpimi, chai huarmica:

—¡Ari, jatun mandaclla, canllatac yachanguimi! Ari, can nishca shinallatacmi canta servic Joabca canman imata ninata yachachishpa cacharca.

20Canta servic Joabca can llaquichigricucpi, ama llaquichichunmi caicunataca nichun cacharca. Shina cacpipish, can ñucata jatun Mandac Diospac ángel shinami cai pachapi tucui ima tucucushcataca yachangui— nirca.

21Chashna nishcamantami jatun mandacca Joabta cayachishpaca:

—Ari, allimi. Chaimanta rilla, Absalón huambrata cutichimugri— nirca.

22Chaimantami Joabca cazushcata ricuchingapac pambacaman cumurishpa bendiciashpa jatun mandactaca:

—Jatun mandac ñuca amolla, cunanmi canta servic ñuca cambac ñaupapi alli cashcata yachani. Can jatun mandacca canta servic ñuca mañashcataca uyashcanguimi— nirca.

23Chashna nishca quipa jatarishpaca, Gesur pueblomanta Jerusalenman Absalonta pushamungapac rircami.

24Shina cacpipish, jatun mandacca Absalontaca:

—Ñuca ñahuita mana ricushpa, paipac huasiman richunmi mandarca. Chaimantami Absalonca paipac ñahuita mana ricushpa, paipac huasiman rircalla— nirca.

Absalón Davidpac ñaupapi cashcamanta

25Absalón shina tucuipac alli nishca runaca tucui Israel llactapica shucllapish mana tiyarcachu. Paica chaquimanta umacaman sumac runami carca.

26Absalonca paipac uma accha yalli llashac cacpimi, huatanta pitichic carca. Chai acchata jatun mandacpac pezanapi pezacpica ishcai patsac siclostami pezac carca.

27Absalonca quimsa churita, shuc ushitami charirca. Paica Tamar shuti sumac huarmimi carca.

28Absalonca ishcai huatata Jerusalenpi causacushpami paipac taita jatun mandacpac ñahuitaca mana ricurca.

29Absalonca jatun mandacpacman cachangapacmi Joabtaca cayachun cacharca. Shina cayachun cachacpipish mana shamusha nircachu. Cutinllatac cayachun cachacpipish mana shamusha nircachu.

30Chaimantami Absalonca paita serviccunata cayashpaca:

—Riquichic, Joabpac chagracunaca ñuca chagra cuchullapitacmi can. Paica cebada chagratami charin. Chaiman rishpa ninata japichigrichic— nirca.

Shina nicpimi, Absalonta serviccunaca Joabpac chagrata rupachirca.

31Chaimantami Joabca Absalonpac huasiman rishpaca:

—¿Ima nishpatac canta serviccunaca ñuca chagrata rupachirca?— nirca.

32Shina nicpimi, Absalonca Joabtaca:

—Riqui, ñucami cantaca cayachun cacharcani. Cantaca jatun mandacpacman rishpa: “¿Imapactac ñucataca Gesur pueblomanta cayachun cacharcangui? Ñuca caipi cashna canapac randica chaillapitac saquirishpami alli caiman carcani. Cunanca can jatun mandactaca ricusha ninimi. Ñuca ima mana allita ruhuashca cacpica, huañuchichunlla” nichunmi cantaca cachasha nircani— nirca.

33Chashna nishpa cachacpimi Joabca jatun mandacpacman rishpa tucui Absalón ima nishcata huillarca. Chaita huillacpimi, jatun mandacca Absalonta cayachirca. Shina cayachicpi, rishpaca pambacamanmi jatun mandacpac ñaupapi cumurirca. Jatun mandacpish Absalontaca muchashpami chasquirca.