DEUTERONOMIO 32 - Biblia Quichua Cañar 2010

1«Jahua pachalla, rimashcata uyaiyari.

Cai pachapish ñuca rimashcata uyaiyari.

2Yachachishcaca tamya

shinami chayanga.

Ñuca rimashcaca shulla tamya shina,

quihuapi garua tamya shinami urmanga.

3Mandac Diospac shutitami alli nisha.

¡Ñucanchic Diosca jatunmi!

4Paica jatun Rumi shina Diosmi.

Paipac ruhuashcaca tucui allimi.

Pai ruhuashcaca

allita ruhuashcami.

Paica cashcata nic Diosmi.

Paipica ima mana allica

mana tiyanchu.

Paica cashcata ruhuacmi.

5Cancunaca huaclliric, millaillata

ruhuaccunami canguichic.

Mana paipac huahua

shinachu canguichic.

Millaita ruhuac,

mana cazucmi canguichic.

6Imatapish mana yachac,

yuyai illac gentecunalla,

¿chashnachu Mandac Diostaca

ruhuana carcanguichic?

¿Paica manachu cancunaman

causaita cuc Taita?

Paimari causaita cushpa

callarichirca.

7Ñaupa punzhacunata yuyarichicyari.

Huahua huahuacunapac

huatata yuyarichicyari.

Taitacunamanpish, ñaupa huiñai

yuyaccunamanpish tapuichicyari.

Paicunami cancunaman huillanga.

8Jahua pacha Dios llactacunaman

allpata cushpaca, Adanpac

churicunata chicanyachicushpami

Israelpac huahuacuna

mashna cashcata ricushpa

linderocunata churarca.

9Mandac Dios japinaca

pai acllashcacunami.

Pai japinaca Jacobomi.

10Paitaca shitashca

pambapimi tarirca.

Manchana chaquishca

pambapimi tarirca.

Paimi tucui muyundita cuidarca.

Paipac quiquin ñahuita

shinami huacaichirca.

11Águila cuzha ladota volashpa,

volanata yachachic shinami

cuidarca.

Chashnami alasta pascashpa,

chai jahuapi churac shina aparca.

12Mandac Diosllami pusharca.

Pihuan chimbapurangapacca

shuctac dioscunaca mana tiyanchu.

13Jahua urcucunata pushashpami,

campopi pucushca granocunata cararca.

Paimi quingraimanta abeja mishquita,

sinchi rumimanta aceiteta cararca.

14Vaca leche mantequillatapish,

oveja lechetapish,

maltón oveja huirahuan,

cari oveja huirahuanmi cararca.

Basanmanta cari chivohuan,

tucuimanta yalli alli

trigohuanmi cararca.

Sumac uvas vinotami ubiachirca.

15Jesurunca yallita huirayashpa,

huira tapashpa cashpami paita ruhuac

Mandac Diostaca mana cazurca.

Quishpichic jatun Rumi shina

Diostaca mana chasquircachu.

16Shuctac dioscunata adorashpami,

millaita ruhuashpa

yallita piñachirca.

17Supaimanmi animalta rupachirca.

Diosmanca mana rupachircachu.

Mana ricsishca dioscunaman,

cunanlla ruhuashca dioscunaman,

cuchullamanta apamushca,

taitacuna mana manchana

dioscunamanmi animalta

cushpa rupachirca.

18Cancunata ruhuac jatun Rumi shina,

Diostami cungarircanguichic.

19Chaita Mandac Dios ricushpami,

churicunatapish,

ushicunatapish piñarca.

20Chaimantami: “Paicuna ima tucucta

ricungapac, paicunata mana

tigra ricushachu.

Paicunaca huahua huahua millaita

ruhuaccunami.

21Paicuna manapish dioscunata,

yanga dioscunata adorashpami

yallita piñachirca.

Ñucapish shuctac gentecunahuanmi

piñachisha.

Mana cazuc gentecunahuanmi

paicunataca yallita piñachisha.

22Nina japiric shinami,

yallita piñarishca cani.

Chashna piñarishpami

ucu pacha seolcaman rupachinga.

Cai allpataca chaipi

pucushcandimi rupachinga.

Urcucunatapish sapicamanmi

rupachinga.

23Yalli mana allicunahuanmi

paicunataca yallita llaquichisha.

Ñuca flechacunahuanmi

paicunata tucuchisha.

24Yarcaihuan, millai fiebre

ungüihuanmi tucui huañunga.

Millai animalcunatapish,

culebracunatapish cachashami.

25Canzhapica espadacunahuan

tucuchinga.

Ucupica yalli manchaimi

tucuchicunga.

Chashnami mosocunatapish,

solteracunatapish,

chuchucuc huahuatapish,

yuyaccunatapish tucuchinga.

26Ñucaca tucui israelcunataca

shic-huashpa cachashami.

Ñucaca ‘paicunataca

pipish cai pachapica

ama yuyaringachun’ yuyarcanimi.

27Shina yuyacushpapish

paicunata piñaccuna

jatun tucushpa: ‘Caicunataca

mana Mandac Dioschu ruhuan,

ashtahuanpish ñucanchicmi

ruhuanchic’ ama nichunmi

mana chashna ruhuarcani” nirca.

28Israelcunaca yuyai illaccunami,

imatapish mana entendinchu.

29¡Yuyaisapa cashpaca

entendinmanmi!

¡Ima tucugricushcata

yachanmanmi!

30Jatun Rumi shina Diosllatac

mana mishachishca cacpica,

¿ima shinatac shuclla runa

huaranga genteta callpachinga?

¿Ima shinatac ishcailla runa

chunga huaranga genteta catishpa

cachanga?

31Paicunapac rumi shina

dioscunaca mana ñucanchic

jatun Rumi shina

Dios cashcataca allita yachanmi.

32Paicunapac uvas chagra

shinaca Sodomami.

Pambacunaca Gomorra shinami.

Uvas caspacunapish jayacmi,

shinallatac uvasca venenomi.

33Vinoca culebra veneno shinami,

canishpa huañuchic culebra shinami.

34¿Chaitaca manachu ñuca ladopi

huacaichinapi huacaichishpa

charicuni?

35Ima shina llaquichina

cashca shina,

llaquichinapish ñucapacmi.

Ima punzha pactacpimi,

chaqui lluchcaric shina urmanga.

Paicuna chingarinaca

ñami pactamucun.

Paicunaman allichishcapish

ñami chayamucun.

36Mandac Diosca

pai acllashcacunataca

cashcata ruhuashpami taripanga.

Paita serviccunata llaquingami.

Ña fuerza illac cacpi,

pipish mana saquiricpi,

prezucunapish, mana prezucunapish

mana saquiricpi llaquingami.

37Paica: “¿Maipitac cancunapac

dioscunaca?

¿Maipitac cancunapac

jatun rumi shina dioscunaca?

38¿Maipitac cancuna animalcunata

rupachishpa cushca huirata chasquic,

cancuna cushca vinota

ubiac diosca?” ninga.

¡Chai dioscuna jatarishpa ayudangapac,

cancunata misangapac shamuchunyari!

39Ñucaca shuclla Diosmi cani.

Shuctac Diosca mana tiyanchu.

Ñucaca huiñaita

causac Diosmi cani.

Chugrichicpish,

allichicpishmi cani.

Ñuca maquimantaca

pi mana quichungachu.

40Maquita jahua pachaman

alzashpami:

¡Huiñaitami casac ñuca

shutipimi nisha!

41Ñucapac jagan nicuc espadata

mulashpa ñuca maquihuan alzashpa

cashcata ruhuacushpami

ñucata piñaccunataca paicuna

llaquichishca shina llaquichisha.

42Ñuca espadaca yahuarsapa tucungami.

Huañushcacunapac, prezucunapac,

jatun acchata charic ñucata

piñaccunapac yahuarhuanmi

cahuiringa.

43¡Llactacunalla, Dios acllashca

llactata alli nichicyari!

Paipac servicta

huañuchiccunataca huañuchingami.

Paimi, paita piñaccunata

huañuchinga.

Pai acllashca llactacunapac

juchata pichangapacmi

chashnaca ruhuanga» nirca.

44Moisesca Nunpac churi Josuehuanmi chaipi cantashcacunataca tucui israelcunapac ñaupapi huillarca.

45Moisés tucui israelcunaman huillashpaca:

46«Cunan ñuca rimashcataca tucui shunguhuan yuyarashpa pactachinguichic. Mandashcacunata quillcashca libropi tucui ima nicushcata huahuacunapish uyashpa cazuchunmi, chashna ruhuana canguichic.

47Cai nishcacunaca mana yangachu, ashtahuanpish causaita cuc rimashcami. Cai rimashcacunamantami Jordán yacuta pasashpa, chai llactata japishpa, unaita causanguichic» nirca.

Moisesman Canaán llactata ricuchishcamanta

48Chai punzhallatacmi Mandac Diosca Moisestaca:

49«Jericó chimba lado Moab llactapi cac Abarim urcupura Nebo urcuman huichicushpa, israelcunaman ñuca cushca Canaán llactata ricui.

50Chai urcupimi cambac huauqui Aarón Hor urcupi huañushpa paipac ñaupa aillucunahuan tandaringapac ric shina canpish chai urcuman rishpa huañushpa, cambac ñaupa aillucunahuan tandaringapac ringui.

51Cadespi tiyac Meriba yacupi, shitashca pamba Zinpi cashpaca ñucata llaquichircanguimi. Israelcunapac chaupipica mana ñucataca jucha illac nishpa huillarcanguichu.

52Chaimantami ñuca israelcunaman cushca llactamanca mana yaicungui, ashtahuanpish carullamantami ricungui» nirca.