ROMANOS 10 - Biblia Quichua Cañar 2010

1Cuyashca criccuna, tucui shunguhuanmi israelcuna quishpirichun Diosta mañacuni.

2Paicuna Diosta servina munaita yallita charishcataca yachanimi. Shina cashpapish, ima shina pactachinataca mana yachancunachu.

3Paicunaca Dios chasquisha nicucpipish mana entendishpami, quiquin ruhuashcahuan Dios chasquishca canata munarcacuna.

4Maijanpish crishpalla Dios chasquishca cachunca, Cristollami mandashcacunata pactachirca.

5Mandashcacunata pactachishpalla Dios chasquishca canamanta Moisés quillcashpaca: «Maijanpish mandashcacunata pactachicca, pai pactachishcamantami causanga» ninmi.

6Crishcallamanta Dios chasquishca canamanta Moisés quillcashpaca: «Ama shungupi: “¿Pitac jahua pachaman huichicungayari?” ninguichu. (Chashnaca, jahua pachamanta Cristota uricuchina shinatami nicungui).

7Mana cashpaca ama: “¿Pitac ucu pachamanca yaicungayari?” ninguichu» ninmi. (Chashna nishpaca, Cristota huichaiman llucshimuna shinatami nicungui).

8Shina cacpica, ¿imatatac Diospac shimica nin? Chaica: «Dios rimashcaca cambac cuchupimi, cambac shimipimi, cambac shungupimi» ninmi. Caimi crinamanta alli huillaita huillashca:

9Cambac shimihuan “Jesusca ñucata Mandacmi” nishpa, tucui shunguhuan Dios Jesusta huañushcacunapuramanta causachishcata crishpaca quishpiringuimi.

10Chaica, Dios chasquishca cangapacca tucui shunguhuanmi crina. Quishpiringapac quiquin shimihuanmi “Jesusca ñucata Mandacmi” nina.

11Dios quillcachishcapica: «Maijanpish paita cricca mana pingaichishcachu canga» ninmi.

12Apunchic Jesusca shucllami, tucuita Mandacmi, maijanpish mañaccunamanca yallita cucmi. Paimanca Israelcunapish, mana israelcunapish chai shinallatacmi.

13Dios quillcachishcapica: “Maijanpish Mandac Diosta mañacca quishpiringami” ninmi.

14Chaica, ¿ima shinatac Jesusta manarac crishpaca mañangacuna? ¿Ima shinatac paimanta huillashcata mana uyashpapish cringacuna? ¿Ima shinatac mana pi huillacpica uyangacuna?

15¿Ima shinatac mana pi cachacpica huillangacuna? Dios quillcachishcapica: «Alli huillaita huillashpa purinaca, ¡mai sumacmi!» ninmi.

16Shina cacpipish, mana tucuichu alli huillaitaca cazurca. Chaimantami Dios ima nishcata huillac Isaiasca: «Mandac Dioslla, ¿ñucanchic huillashcataca pitac crishcayari?» nin.

17Chaica, alli huillaita uyashpami crincuna. Chai uyashcaca Cristomanta huillashcami.

18Ashtahuanpish ñucaca: «Cristomanta huillashcataca, ¿manachu uyarcacuna?» nishpami tapuni. ¡Paicunaca uyarcacunami! Dios quillcachishcapica:

«Paicuna huillashcaca

tucui cai pachapimi uyarishca.

Paicunapac rimashcaca

allpa tucuricamanmi uyarishca» ninmi.

19Cutinllatacmi ñucaca: «Israelcunaca caicunataca, ¿manachu entendirca?» nishpa tapuni. ¡Ari, entendircami! Ñaupaman Moisés huillashpaca:

«Mana ñucapac gentecunata

acllashpami piñachisha.

Mana entendic gentecunata acllashpami,

piñachisha» ninmi.

20Isaías mana manchashpa huillashpaca:

«Mana mashcac gentecunami

ñucataca tarirca.

Ñucata mana tapuc gentecunamanmi

ricurircani» ninmi.

21Israelcunamanta Isaías cutin rimashpaca: «Ñucata mana cazuc, piñac gentecunataca tucui punzhacunami rigrata pascashpa cayacurcanilla» ninmi.