LUCAS 12 - Biblia Quichua Cañar 2010

Fariseocunapac yachachishcaca levadura shina cashcamanta

1Huaranga huaranga gentecuna ñitirinacushpa shamucpimi, Jesusca paipac yachacuccunataca:

—Fariseocunapac levaduramanta cuidaringuichic. Paicunaca mishqui shimi, jayac shungucunami.

2Imapish mana pacalla saquiringachu, tucuimi yacharinga. Tucui pacashcacunami ricuringa. Mana pacalla saquiringachu.

3Chaimanta tucui pacallapi rimashcapish, tucuipac ñaupapi rimashca shinami uyaringa. Huasi ucupi pacalla parlashcapish, huasi jahuamanta caparishca shinami canga.

Diosta manchana cashcamanta(Mt 10.28-31)

4Ñuca cuyashca uyaccunalla, cuerpota huañuchiccunata ama manchanguichicchu. Huañuchishca quipaca, imata mana ruhuai pudinchu.

5Cancuna pita manchana cashcatami yachachigrini: Huañushca quipa, ucu pachaman cachac Diosta manchaichic. Ari, paillatami manchana canguichic.

6¿Manachu pichca zhutacunata ishcai cullquillapi catun? Chashna cacpipish, Diosca shuc zhutallatapish mana cungarinchu.

7Chashnallatacmi Diosca cancunapac uma accha mashna cashcatapish yachan. Chaimanta ama manchaichicchu. ¡Cancunacarin, achca zhutacunatapish yalli valicmi canguichic!

Jesusmanta mana pingana cashcamanta(Mt 10.19-20,32-33; 12.32)

8Ñucaca: Maijanpish gentecunapac ñaupapi “ricsinimi” nictaca, Runa Tucungapac shamushca ñucapish Diospac angelcunapac ñaupapi “ricsinimi” nishami.

9Maijanpish gentecunapac ñaupapi negactaca ñucapish Diospac angelcunapac ñaupapi negashami.

10Runa Tucungapac shamushca ñucata maijanpish camishpa rimactaca, Diosca perdonangami, ashtahuanpish maijanpish jucha illac Espirituta camishpa rimactaca, manatac perdonangachu.

11Tandanacuna huasicunamanpish, mandaccunapacmanpish, juezcunapacmanpish cancunata apacpica, ama “¿Imatatac nishun?” nishpa, manchaihuan canguichicchu.

12Cancuna rimana horasca, Diospac Espiritullatacmi rimachinga— nirca.

Yuyai illac chayuc runamanta

13Gentecunapac chaupimanta Jesusta shuc runa rimashpaca:

—Yachachic, ñuca huauquita herenciata chaupichun nishpa cui— nirca.

14Shina nicpimi Jesusca:

—Uyai, ¿pitac ñucataca cancunapac juez cachun, imata raquic cachun churarca?— nirca.

15Chaimantami Jesusca:

—Charishcacunaca mana causaita cunchu. Chaimanta ama misa tucushpa, ashtahuan chayucyana yuyailla canguichicchu— nirca.

16Jesús chimbapurashca parlohuan parlashpaca: «Shuc chayuc runami, paipac allpapi achca granota pucuchirca.

17Chaimantami paipac shungupica: “Cunanca, ¿imatatac ruhuasha? ¿Cai tucui granotaca maipitac huacaichisha?” nirirca.

18Chashna yuyaricushpami: “Caitami ruhuasha: Cai grano huacaichina huasicunata pascashpami, ashtahuan jatunta shayachisha. Chaipimi granotapish, tucui charishcacunatapish huacaichisha.

19Chashna huacaichishpaca ñuca shungutaca: ‘Tauca huatapacmi charisha. Cunanca cushicushpa, micushpa, ubiashpa samarishami’ nishami” nicurca.

20Ashtahuanpish Diosca: “Yuyai illac runa, cunan tutallatacmi huañungui. Cai tucui huacaichishcacunaca, ¿pipactac canga?” nirca.

21Quiquinpaclla charinata munaccunaca, Diospac ñaupapica imata mana charinchu. Chaica chashnatacmi» nirca.

Diosca paipac huahuacunamanca imatapishcuc cashcamanta(Mt 6.25-34)

22Chai quipaca, Jesusca paipac yachacuccunataca: «Chaimanta cancunaca ama: “¿Imatatac micushun, imatatac churarishun?” nishpa, llaquiricunguichicchu.

23Micunapac randica, causaimi ashtahuan valin. Churanapac randica, cuerpomi ashtahuan valin.

24Zhutacunata ricuichic. Paicunaca mana tarpunchu, shinallatac mana cosechanchu, mana huacaichinchu. Maipi huacaichinallatapish mana charinchu. Chashna cacpipish Diosca caranllami. ¡Cancunacarin, zhutacunatapish yalli valicmi canguichic!

25¡Cancunapuramanta maijantac llaquiricushpalla shuc horallatapish yalli causai pudinguichic!

26Caillatapish mana ruhuai pudishpaca, ¿ima nishpatac imamantapish llaquiricunguichic?

27Sisacuna sumacta huiñacucta ricuichic. Paicunaca mana trabajanchu, mana puchcanchu. Shina cacpipish ñaupa mandac Salomonpish paipac tucui sumac charishcahuanpish, cai sisacuna shina, mana churarircachu.

28Mana tucui shunguhuan cric gentecunalla, cunanca allpapi sumacta huiñacun, cayaca ninapi rupachishca cana quihuatapish, Diosca sumactami huiñachin. ¡Cancunamancarin, chai quihuamantapish yallimi churachinga!

29Chaimanta ama llaquirishpa: “¿Imatatac micushun, imatatac ubiashun?” nishpa puricuichicchu.

30Diosta mana cazuccunallami chashna llaquirishpa purincuna. Ashtahuanpish cancunapac Taitaca, cancunapac imalla illashcataca yachanmi.

31Dios mandacucta ashtahuan munaichic. Shinashpaca, ima illashcatapish chasquinguichicllami.

Jahua pachapi charic tucunamanta(Mt 6.19-21)

32Cancunaca ashalla ovejacuna shina cashpapish ama manchaichicchu. Diosmi cushicushpa cancunahuan mandasha nicun.

33Imalla charishcata catushpa, huacchacunaman cuichic. Chashna ruhuashpaca, mana ismuclla cushtalpi huacaichic shinami, jahua pacha huiñai causaipi charicyanguichic. Chaipica shuhuacpish mana yaicunchu, polillapish mana micunchu.

34Maipi ima huacaichishca tiyacucpica, chaillatatacmi cancunapac shunguca yuyacun.

Allichirishpa shuyaccunamanta

35Cancunaca churanatapish ña churarishca, mechata japichishpa shuyacuc shina chaparacuichic.

36Shinallatac cazarana bodamanta amo cutimushpa pungupi huactacpi, pascangapac chaparacuc serviccuna shina caichic.

37Chashna chaparacucpi amo chayamucpimi, serviccunamanca mai cushicui canga. Chai amoca pai quiquinllatacmi serviccuna churarinata churarishpa, paicunata mizaman tiyachishpa micunata caranga, chashnami canga.

38Unai tuta cashpa, pacarimuna cashpapish, riccharashpa chaparacucta amo shamushpa japicpica, chai serviccunamanca mai cushicuimi canga.

39Caita yuyarichic: Huasiyuc ima horas shuhuac shamunata yachashpaca, huasimanta imata shuhuachun mana saquinmanchu.

40Chashnallatacmi Runa Tucungapac shamushca ñucaca, cancuna mana yuyashca horaspi cutimusha. Chaimanta allichirishca shuyacuichic» nirca.

Alli servicmantapish, mana alli servicmantapish(Mt 24.45-51)

41Chashna nicpimi Pedroca:

—Apunchic Jesús, chimbapurashca parlota parlashpaca, ¿ñucanchicllamanchu, mana cashpaca tucuimanchu parlangui?— nirca.

42Chashna nicpimi Jesusca:

—¿Maijantac alli cazuc, alli yuyaiyuc mayordomoca? Paipac amo: “Ñuca huasita ricungui, serviccunamanpish micuna horas carangui” nishpami saquinman.

43Chashna tucui mandashcata pactachicucpi, amo cutimushpa tuparicpica, chai mayordomomanca yalli cushicuimi canga.

44Chashna alli cazucmanca, amoca tucui imalla charishcacunatami ricuchun churanga. Chaica chashnatacmi canga.

45Ashtahuanpish chai mayordomo paipac shungupi: “Ñuca amoca mana utca shamungachu” yuyashpa, cari serviccunatapish, huarmi serviccunatapish macashpa, pailla micushpa, ubiashpa, machashpami puricunman.

46Chashna ima punzha, ima horas shamunata mana yachashpa puricucpimi, cungailla amo chayamunga. Chashna chayamushpaca, caishuc mana cazuccunata shinallatacmi, huañucta macachishpa llaquipi churanga.

47Maijan servicpish amo mandashcata uyashca jahua, mana cazushpa mana ruhuashcamantaca, yallitami macashpa, llaquichishca canga.

48Ashtahuanpish maijan servic amo mandashcata mana yachashpa, mana allita ruhuashcamantaca, macashpa llaquichina cacpipish, ashallatami macachishca canga. Maijanman Dios achcata cushpaca, achcallatatacmi mañanga. Maijanman achcata ruhuachun cushpapish achcallatatacmi ruhuachun ninga.

Criccunata piñanamanta(Mt 10.34-36)

49Ñucaca cai pachamanca ninatami apamurcani. Ñapish rupacunmanlla ninimi.

50Bautizaric shina, llaquita apanaracmi cani. Chai pactangacamanca, yallita llaquillami cani.

51¿Ñucataca cai pachapi sumac causaita cungapacmi shamushca canga uyanguichicchu? Cancunamanca ninimi: Mana chaita cungapacchu shamurcani, ashtahuanpish chicanyarinacui tiyachunmi shamurcani.

52Cunanmantaca, shuc huasipi pichcapura causaccunaca ishcaica quimsata, quimsaca ishcaitami piñanga.

53Taitaca churita, churica taitata, mamaca huarmi huahuata, huarmi huahuaca mamata, suegraca nuerata, nueraca suegratami piñanga— nirca.

Cunan punzha ima tucucushcataca, manaentendishcamanta(Mt 16.1-4; Mr 8.11-13)

54Shinallatac Jesusca: «Chimbapi puyu ricuricpica: “Ña tamyagrinmi” ninguichicmi. Chaica pactanllami.

55Jahuamanta huaira jataricpica: “Usyagrinmi” ninguichicmi. Chashnami tucunlla.

56Mishqui shimi jayac shungu cashpami, huaira jataricpipish, puyuta ricushpapish, punzhacuna ima shina cagricushcata yachanguichic. Cunan punzha ñuca ima ruhuacushcata ricushpaca, ¿ima nishpatac mana entendinguichic?

Piñaccunahuan alli tucunamanta(Mt 5.25-26)

57¿Ima nishpatac cancunallatac cashcata ruhuanaca alli cashcataca, mana yuyaringuichic?

58Maijan canta juezpacman apacucpica, manarac chayashpa, paihuan ima shinapish alli tucunata yuyangui. Mana alli tucucpica, juezpacman chayachishpa, cantaca soldadocunaman cushpa, carcelpi churachingami.

59Chaimantaca tucui cullquita cungacaman mana llucshinguichu. Chaica chashnatacmi canga» nirca.