1Tiro pueblota jatun mandac Hiramca Davidhuanca tucui causaipimi, apanacuc carca. Chaimantami Salomonta paipac taita Davidpac randi jatun mandac cachun aceitehuan cahuishcata yachashpaca, paita serviccunata cacharca.
2Shinallatacmi Salomonpish, Hiramtaca:
3«Ñuca taita Davidca cai muyundi llactacunapi causaccuna llaquichicpi, macanacushpami paita Mandac Diospac shutipi mañana huasita shayachinataca mana yuyarirca. Paita piñaccunata Mandac Diosllatac ñuca taitapac chaqui ucupi churangacamanmi mana shayachinata yuyarirca. Chaitaca canpish yachanguimi.
4Cunanca, ñucata Mandac Diosmi muyundi llactacunapi mana piñanacushpa, alli causachun churashca. Chaimantami yarcaipish, huañuipish mana tiyanga.
5Shina cashcamanta ñucami ñucata Mandac Diospac shutipi mañana huasita shayachinata yuyarircani. Mandac Diosmi ñuca taita Davidtaca: “Can mandashpa causacushcapica cambac churitami cambac randi churasha. Paimi ñuca shutipi mañana huasitaca shayachinga” nishca carca.
6Chashna cashcamanta cunanca, Líbano urcupi cedro yuracunata ñucaman pitichun canta serviccunata cachai. Ñucata serviccunatapish paicunata ayudachun cachashami. Canta serviccuna mashna cullquita cui nicpipish cushallami. Ñucanchicpuramantaca maijanpish Sidón llactapi causaccuna shina, caspicunata labranataca mana yachanchu. Chaitaca canllatac allimi yachangui» nichunmi cacharca.
7Hiramca Salomón chashna nishcata uyashpami, yallita cushicushpa: «¡Cunanca, Mandac Diosca alli nishca cachun! ¡Paimi cai tucui jatun llactata mandachunca yuyaita charic churita Davidman cushca!» nirca.
8Chai quipami Hirampish Salomontaca: «Can ima nichun cachashcatapish uyarcanimi. Cedro caspimanta, ciprés caspimanta can imata ruhuachun nicpipish, tucui ruhuashallami.
9Chai caspicunataca ñucata serviccunami Libanomanta mama cuchacaman apamunga. Chaimantaca can maiman cachai nicpipish, chai pushtumanmi mama cuchata balsapi cachasha. Chaiman chayacpica japinguilla. Shinallatac canpish, ñuca mañashca shinallatac ñuca familiacunaman micunata cachangui» nichunmi cacharca.
10Chashnami Hiramca cedro caspicunata, ciprés caspicunata Salomón mashna mañashcata curca.
11Shinallatac Salomonpish, Hirammanca ishcai chunga huaranga coro trigota, ishcai chunga huaranga bato ashtahuan alli aceitetami huatanta curca.
12Mandac Diosca Salomonman nishca shinallatacmi alli yuyaita curca. Hiramhuan Salomonhuanca mana piñanacushpa alli causangapacmi ishcaita ari ninacurca.
13Jatun mandac Salomonca tucui Israel llactapi imapish sinchi ruhuaicunata ruhuachunca quimsa chunga huaranga runacunatami tandanacuchun mandarca.
14Chai runacunatami Líbano llactapi imatapish ruhuachunca chunga huarangacunata quillanta chullayachishpa cacharca. Shuc quillata Líbano llactapi imatapish, ruhuachishpaca ishcai quillatami huasipi cachun cachac carca. Imatapish ruhuangapac tandanacushcacunataca Adoniram runami mandacurca.
15Salomonca imalla ashtana cashcata ashtachunca canchis chunga huaranga runacunatami charirca. Urcupi rumita labraccunataca, pusac chunga huaranga runacunatami charirca.
16Imatapish ruhuac gentecunata ricushpa mandachunca, quimsa huaranga quimsa patsac mandaccunatami charirca.
17Jatun mandacca Diospac huasi callaripi churangapacca ashtahuan jatun, ashtahuan alli labrashca rumicunatami apamuchun cacharca.
18Huasi ruhuanata yachaccunaca Salomonpac runacunapish, Hirampac runacunapish, Gebal pueblomanta runacunapishmi carca. Paicunami huasita ruhuangapacca caspicunata pitishpa rumita labrashpa allichircacuna.
Who We AreWhat We EelieveWhat We Do
2025 by iamachristian.org,Inc All rights reserved.
