1Mandac Dioslla, ñucaca
imapish illac, llaquillami cani.
Chaimanta ñuca mañashcata
cambac ringrihuan uyaiyari.
2Ñuca Dioslla, canpi
shunguta churashpa,
canta cazushpami causacuni.
Chaimanta canta servic ñuca almata
cuidashpa quishpichiyari.
3Mandac Dioslla, ñucata llaquiyari.
Canllatami tucui punzha mañani.
4Jatun Dioslla,
punzhantami canta mañacunilla.
Canta servic ñucata cushichiyari.
5Jatun Dioslla, juchacunata
perdonac cuyac Diosmi cangui.
Canta mañaccunataca
yallitami cuyangui.
6Mandac Dioslla,
ñuca mañashcata uyaiyari.
Caparishpa canta mañashcata
uyaiyari.
7Ñuca mañashcata uyac cacpimi,
llaqui punzhapica canta cayani.
8Mandac Dioslla, dioscunapurapica
can shina Diosca pi mana tiyanchu.
Can ruhuashca shinataca
pi mana ruhuai pudinchu.
9Jatun Dioslla,
tucui can ruhuashca llactacunami
cambac ñaupaman shamushpa,
cantaca sumacmi cangui ningacuna.
10Canca sumaimanacunata ruhuac
jatun Diosmi cangui.
¡Canllami Diosca cangui!
11Mandac Dioslla,
can munashca shina
causanata yachachiyari.
Cashcata nic ñanpimi causasha.
Ñuca shungupipish canta manchana
yuyaita churaiyari.
12Ñucata Mandac Dioslla,
tucui shunguhuanmi canta alabasha.
Huiñaitami cambac shutitaca
jatunyachishpa causasha.
13Canca ñucataca yallitami
cuyac cangui.
Seolpi ucuyanamantami
ñucataca llucchircangui.
14Dioslla, jatun tucushcacunaca
ñucata llaquichingapacmi
jatarishcacuna.
Huañuchic runacunami tandanacushpa
ñucata huañuchinata yuyarinacuncuna.
Cantaca mana yuyarincunachu.
15Shina cacpipish,
Mandac Diosca llaquic,
cuyac Diosmi cangui.
Mana utca piñaric, yallita cuyacpish,
cashcata nicpish canguimi.
16Ñucata ricushpa llaquiyari.
Canta servic ñucata
sinchiyaichicyari.
Canta servic huarmipac
cari huahuataca huacaichiyari.
17Mandac Dioslla, ñucata mana
ricunayachiccuna ricushpa
pingachun ñucata cuyacushcata
ricuchiyari.
Can Mandac Diosmi ñucata ayudashpa
cushichircangui.
Who We AreWhat We EelieveWhat We Do
2025 by iamachristian.org,Inc All rights reserved.
