2 CORINTIOS 11 - Biblia Quichua Cañar 2010

Llullac huillaccunata Pablo rimashcamanta

1Ñuca yuyai illac shina rimarishcata ashata uyaichic. Ima shina cashpapish uyaichicyari.

2Diosca paipaclla causachun munashcamantami, ñucapish chashnallatac causachun munani. Ñucaca shuc cusallahuan cazarachingapac, manarac pihuan chayarishca solterata ari nichic shinami cancunataca Cristohuan ari nichishpa paipacllata ricuchisha nini.

3Shina cashpapish ima shinami culebra paipac yachac tucushca cashcahuan Evata umashpa crichirca, chashnallatac cancunamantapish Cristota tucui shunguhuan catina yuyaita anchuchishpa, chingachinatami manchani.

4Maijanpish ñucanchic huillashca Jesusmanta shuctaclayaman huillangapac chayacpi, cancuna chasquishca Espiritumanta shuctaclaya espiritutapish, cancuna chasquishca alli huillaimanta shuctaclaya huillaitapish cancunaca chasquinguichicllami.

5Ñucaca, quipata huillangapac shamuc «jatun yachaccunami» nishca huillaccunamanta “yangallami cani” ninataca mana ninichu.

6Paicuna shina rimanata mana alli yachashpapish, Diosmantaca allimi yachani. Chai shina cashcataca ima shinapish allimi ricuchircani.

7¿Cancuna jatun tucuchunchu ñucaca cancunamanta imata mana japishpa, Diosmanta alli huillaitaca yangalla tucushpa huillarcani? ¿Chaita ruhuashpachu juchallircani?

8Cancunata servingapacca shuctac tandanacushca criccunamantami cullquita chasquircani. Chashna japishpaca paicunamanta shuhuac shinami ruhuarcani.

9Cancunahuan cashpaca, ima illac cashpapish imata mana mañarcanichu. Chai imalla illashcataca Macedonia llactamanta shamuc criccunami curcacuna. Cancunataca imata mañashpa mana piñachircanichu, shinallatacmi mana piñachishpa catinata munani.

10Cristomanta cashcata nic shimicunataca ñucaca ricsinimi. Chashna cashcamantami ñuca imata mana japishpa cushicunataca, tucui Acaya llactapi causaccunapish mana jarcanga nini.

11Chashna nishpaca, ¿cancunata mana cuyashcamantachu chashnaca nini? Diosllatacmi ñuca cancunata cuyac cashcataca yachan.

12Chai llullashpa puriccuna huillashpa ama cushicuchunmi, ima shina ruhuacuc shinallatac imata mana chasquishpa ruhuashpa catisha.

13Chaicunaca llullashpa huillashpa pandachiccunami, shinallatac “Cristopac apostolcunami canchic” nic tucuccunami.

14Caicunata ricushpaca, mana mancharinachu. Satanasllatacmi achic nicuc ángel shina tucunlla.

15Chashnaca mana mancharinachu canchic. Paicunata serviccunapish cashcata ruhuaccuna shinami ricurincuna. Shina cacpipish paicuna imata ruhuacushca shinallatacmi chingaringacuna.

Apóstol cachun Jesús acllashca Pablo llaquita apashcamanta

16Cutinllatacmi cancunamanca: Ñucataca ama “yuyai illacmi” nishpa yuyaichicchu nishpa nini. Chai shina yuyacushpapish, ñuca ashata jatun tucushpa yuyai illac shina rimashcata uyaichic.

17Cashna rimashpaca, mana Apunchic Jesús munashca shinachu nini, ashtahuanpish jatun tucuna yuyaihuanmi yuyai illac shina rimarini.

18Taucacuna “ñucallami alli cani” nishpa, jatun tucucucpica, chashnallatacmi ñucapish jatun tucusha nini.

19Cancunaca “yalli yachacmi canchic” nishpa yuyashpapish, ¡yuyai illaccuna rimashcataca alli munaihuanmi chasquinguichic!

20Shinallatac servichiccunatapish, shuhuashpa quichuccunatapish, umaccunatapish, mana ricunayachiccunatapish, piñashpa ñahuipi huactaccunatapish, imata mana nishpami chasquinguichiclla.

21Ñucanchic chai shinatac ruhuangapacca yallimana irquicunami carcanchic. ¡Chaimantaca pinganayanmi!

Shina cacpipish shuctaccuna imamantapish jatun tucucpimi ñucapish yuyai illac shina rimarishpa jatun tucusha nini.

22Paicunaca “hebreocunami canchic” ninchayari, ñucapish chaillatacmi cani. Paicunaca “israelcunami canchic” ninchari, ñucapish chaillatacmi cani. Paicunaca “Abrahampac huahua huahuacunami canchic” ninchari, ñucapish chaillatacmi cani.

23Paicunaca “Cristota serviccunami canchic” ninchari, ñucapish paicunamanta yalli alli servicmi cani. Caitaca yuyai illac shinami rimani. Paicunamanta yallimi ñucaca trabajarcani. Paicunamanta yallimi carcelpi carcani. Paicunamanta yallimi macashca carcani. Shinallatac tauca cutinmi huañunallapish carcani.

24Israelcunaca pichca cutinmi quimsa chunga iscunhuan azotircacuna.

25Quimsa cutinmi caspihuan macarcacuna. Shuc cutinca rumihuan shitashpami macarcacuna. Quimsa cutinmi barcopi ricushpa, barcondi yacupi ucuyarcani. Shinallatac shuc punzha, shuc tutami yacupi aguarinalla carcani.

26Tauca cutinmi ñucaca ñancunapipish, yacupipish huañuna manchai, shuhuana manchai, ñuca llacta gentecunamantapish, caru llacta gentecunamantapish manchai carcani. Pueblocunapipish, shitashca pambacunapipish, mama cuchapipish manchaimi carcani. “Criccunami canchic” nishpa, llullashpa puriccunamantapish manchaimi purircani.

27Quiquin maquihuanmi shaicucta trabajarcani. Tauca cutinmi mana sueñushpa pacarircani. Yarcaihuanpish, yacunayaihuanpish carcanimi. Tauca cutinmi mana micurcani. Chirimantapish, churana illaimantapish llaquitami aparcani.

28Cai llaquicunahuan cashca jahuapish punzhantami tucui tandanacushca criccunata yuyarishpa, llaquita apacuni.

29Maijan ungucpica, ñucapish ungunimi. Maijanta pandachishpa urmachicpica, piñarishpami llaquirini.

30Imamanta jatun tucuna cacpica, imata mana ruhuaipac shina cashcamantami jatun tucusha.

31Huiñaita “allimari cangui” nina, Apunchic Jesuspac Diosllami, ñuca cashcatatac nicuctaca yachan.

32Damasco pueblopi ñuca cacpica, jatun mandac Aretas churashca mandacmi, japingapac chai llucshina pungucunapi soldadocunata churarca.

33Shina cacpipish jatun tazapi ñucata churashpami, pueblota jarcacuc pirca ventanamanta urai cacharircacuna. Chashnami chai mandacpac maquimantaca atircani.