1Chaimanta samarinapi Dios yaicuchisha nicucpirac huacaichiringuichic. Pacta cancunapuramanta maijan mana yaicui pudishpa saquiringuichicman.
2Ñucanchicmanpish paicunaman shinallatacmi alli huillaita huillarca. Shina cashpapish, paicunaca mana crircachu, criccunhuan mana tandanacurcachu. Chaimantami paicuna uyashcaca yangalla carca.
3Dios nishca shinami ñucanchicca crishcamanta, pai cusha nishca samarinaman yaicushun. Diosca:
“Yallita ñuca piñarishpami:
‘Ñucahuan samaringapacca
mana yaicungacunachu’ nircani” nirca.
Shina nishpaca, Diosca cai pachata ruhuashca quipa samarishcatami nisha nin.
4Dios quillcachishcapica samarina punzhamantaca:
“Diosca tucuita
ruhuashca quipaca,
canchis punzhapica samarircami” ninmi.
5Shinallatac:
“Ñucahuan samaringapacca
mana yaicungacunachu” ninmi.
6Alli huillaita utcaman uyaccunaca, paicuna mana cazushcamantami mana yaicurcacuna. Chaimantami chaiman yaicunaca tiyanrac.
7Chaimantami Diosca samaringapac cunan punzhata acllashca. Chai huillacushcamantaca tauca huatacuna quipami Davidca:
“Dios rimashcata cunan uyashpaca,
ama shunguta
sinchiyachichicchu” nishca.
8Israelcunaman samarinata Josué cushca cacpica, mana Diosca, cutin samarina punzhata cunmanchu carca.
9Chaimantami Diospac huahuacunamanca shuc samarina tiyanrac.
10Chaica, yaicuccunaca Dios tucuita ruhuashpa samarishca shinami, Dios-huan samaringapac yaicunga. Paicuna imata ruhuashcamantapish samaringami.
11Chai ñaupa mana cazuccuna shina maijanpish ama chashna tucungapacca, mana saquirishpami chai samarinaman yaicungapac catirana canchic.
12Dios rimashca shimica causacmi. Tucui imatapish ruhuacmi. Ishcai filoyuc espadatapish yallimi. Chaimantami almatapish, espiritutapish, mucucunatapish, tullu ñutcutapish chaupishpa, yaicui pudin. Shinallatac shungu imata munashcatapish, yuyashcatapish yachanmi.
13Tucui Dios ruhuashcacunami paipac ñaupamanta mana pacalla can. Imapish paipac ñaupapica mana pacashcachu. Paimanmi ñucanchicca tucui imatapish huillana canchic.
Jesusca jatun mandac cura cashcamanta14Diospac Churi Jesusca jatun mandac cura cashpami, jahua pachaman yaicurca. Chaimantami ñucanchicca crishpa, catirana canchic.
15Ñucanchic mana catinata pudicucpi, llaquishpa ayudac jatun mandac curatami charinchic. Paipish ñucanchic shinallatacmi llaquita aparca. Shina cashpapish jaicapi mana juchallircachu.
16Chaimanta cuyac Dios ñucanchicta llaquichun, paipac jatun cuyaimanta ayudachun, paipacman tucui shunguhuan cuchuyashpa mañashunchic.
Who We AreWhat We EelieveWhat We Do
2025 by iamachristian.org,Inc All rights reserved.
