1 CRÓNICAS 26 - Biblia Quichua Cañar 2010

Diospac huasi punguta cuidaccunamanta

1Diospac huasita cuidaccunaca, Asafpac huahua huahuapuramanta Corepac churi Meselemiasmi carca.

2Meselemiaspac churicunaca: Punta churica Zacarías, quipaca Jediael, quimsaniquica Zebadías, chuscuniquica Jatniel,

3pichcaniquica Elam, suctaniquica Johanán, canchisniquica Elioenaimi carca.

4Obed-edompac churicunaca: Puntaca Semaías, quipaca Jozabad, quimsaniquica Joa, chuscuniquica Sacar, pichcaniquica Natanael,

5suctaniquica Amiel, canchisniquica Isacar, pusacniquica Peultaimi carca. Chai churicunatami Mandac Diosca Obed-odomman bendiciashca carca.

6Semaiaspish churicunata charircami. Paicunaca imatapish mana manchac, sinchi, paicunapac ñaupa taitacunapac huasi ucupurata mandac runacunami carca.

7Semaiaspac churicunaca: Otni, Rafael, Obed, shinallatac Elzabadmi carca. Paicunapac huauquicunapish alli sinchi runacunami carca. Eliupish, Samaquiaspish paipac churicunallatacmi carca.

8Obed-edompac huahua huahuacunaca paicunapac huauquicunandimi imata ruhuangapacpish, macanacungapacpish sinchicuna carca. Obed-edompac huahua huahuacunaca sucta chunga ishcaimi carca.

9Meselemiaspac churicunapish, familiacunapish chunga pusac sinchi runacunami carca.

10Meraripac huahua huahuapuramanta Hosapac churi Simrica mandacmi carca. (Paitaca mana punta churi cacpipish, paipac taitami mandachun churarca).

11Quipaca Hilcías, quimsaniquica Tebalías, chuscuniquica Zacariasmi carca. Tucui Hosapac churicuna, shinallatac familiacunaca chunga quimsami carca.

12Chashnami punguta cuidaccunata mandaccunatapish paicunapac huauquicunatapish Mandac Diospac huasita cuidashpa servichunca allichishpa churarca.

13Chai pungucunata cuidaccunataca paicunapac ñaupa taitacunapac huasi ucupuracuna ima shina cashca shinallatacmi yuyaccunatapish, cunan huiñaicunatapish suerteta ruhuashpa cada pungupi churarca.

14Chashna ruhuacpica, inti llucshina lado punguta cuidanaca Selemiasmanmi urmarca. Yuyaisapa paipac churi Zacariasman suerteta ruhuacpica, jahua lado punguta cuidanami urmarca.

15Obed-edommanca ura lado pungu cuidanami urmarca. Paipac churicunamanca Diospac huasipi ima charinacunata huacaichina ucuta cuidanami urmarca.

16Supimman, Hosamanca inti tigrana ladopi cac huichaiman llucshina Salequet punguta cuidanami urmarca.

Punguta cuidaccunaca chashnami carca:

17Inti llucshina lado pungupica sucta levitacunami cuidacurca. Jahua lado pungupipish chuscu runacuna, ura lado pungupipish chuscu runacunallatacmi punzhaca cuidacurca. Shinallatac Diospac huasipi ima charinacunata huacaichina ucucunapipish ishcai, ishcaimi chullayanacushpa cuidacurca.

18Inti tigrana ladoman ima huacaichina ucutaca ishcaimi cuidacurca. Ñan ladopica chuscumi cuidacurca.

19Chashnami Corepac, Meraripac huahua huahuamantaca cuidangapac raquishca saquirirca.

Diospac huasipi valishca tiyashcacunata cuidaccunamanta

20Caishuc levitacunamantaca Ahiasmi Diospac huasipi tiyac ima valishcacunatapish, Diospaclla chicanyachishcacunatapish cuidacurca.

21Gersonpac churi Laadanmanta cac huahua huahuacunataca jehielitacunami Laadanpac ñaupa taitacunapac huasi ucupuracunataca mandaccuna carca.

22Jehielpac churi Zetam, shinallatac Joelca Mandac Diospac huasipi valishcacunata cuidacmi carca.

23Amram, Izhar, Hebrón, Uzielpac huahua huahuapuramantaca

24Moisespac churi, Gersonpac huahua huahuapura Sebuelmi Diospac huasipi valishcacunata cuidaccunataca mandacurca.

25Eliezermanta paipac familiacunaca Rehabiasmi carca. Rehabiaspac churica Jesaías, Jesaiaspac churica Joram, Jorampac churica Zicri, Zicripac churica Selomitmi carca.

26Diospac huasipi tiyashca valishcacunataca Selomitmi paipac familiacunahuan cuidacurca. Chaicunataca jatun mandac Davidpish, ñaupa taitacunapac huasi ucupuracunata mandaccunapish, huaranga soldadocunata mandaccunapish, patsac soldadota mandaccunapish, tucui soldadocunata mandaccunapish Diospaclla cachun chicanyachishcami carca.

27Caicunataca Diospac huasita allichingapacmi macanacuicunata mishashpa apamushcacunataca Diosman cushpa chicanyachishpa churarca.

28Shinallatac Dios ricuchishcata huillac Samuel, Cispac churi Saúl, Nerpac churi Abner, Sarviapac cari huahua Joab, shinallatac maijancuna Diosman chicanyachishpa cushcacunatapish Selomitmi paipac familiacunahuan cuidacurca.

Israelta quipa mandaccunamanta

29Izharpac huahua huahuamanta, israelcunapurapi imatapish canzhapi ricuccuna, shinallatac mandaccuna, juezcunaca, Quenanías paipac churicunandimi carca.

30Hebronpac huahua huahuamanta huaranga canchis patsac sinchi runacunaca, Hasabías paipac familiacunandimi carca. Paicunami Jordán yacu chimba lado, inti llucshina ladopi causac israelcunata mandacurca. Paicunami Mandac Diostapish, jatun mandactapish servicurca.

31Hebronpac huahua huahuacunamanta paipac familiacunata chicanyachishca hebronitacunataca Jeriasmi mandacurca. David chuscu chunga huatata mandacucpimi, paicunapac shuticunata quillcashcapi mashcashpaca, Galaad llactapi cac Jazer pueblopi mana manchac, sinchi runacuna tiyashcata tarirca.

32Tucui paicunaca ishcai huaranga canchis patsac sinchi runacunami carca. Paicunaca familiacunata mandaccunami carca. Jatun mandac Davidca Rubenpac, Gadpac aillucunata, Manasespac chaupi ailluta mandachunmi paicunataca churarca. Shinallatac Diospac huasipi servichunpish, jatun mandacta servichunpish churarcami.