1Jahua pachaca
Dios sumaimana cashcatami huillan.
Chaipi tiyashcacunaca paipac
maquihuan ruhuashcatami ricuchin.
2Shuc punzhaca caishuc
punzhamanmi huillan.
Shuc tutaca caishuc
tutatami yachachin.
3Ima rimashca shimicunapish,
pi rimashcapish mana uyarinchu.
4Shina cacpipish, pai huillashcaca
tucui cai pachapi uyarishpami,
cai pacha tucuricaman chayashca.
Chaipimi intimanpish
huasita churarca.
5Intica cunanlla cazarashca
sueñuna ucumanta llucshic shinami
llucshicun.
Shina llucshishpaca
callpai callaricuc runa shinami
cushicun.
6Paica jahua pacha
shuc ladomantami llucshin.
Shina llucshishpaca caishuc lado
jahua pachatami tigran.
¡Paipac rupachicmantaca
imapish mana miticui pudinchu!
7Mandac Dios mandashcacunaca
cashcata ruhuac cashpami
almatapish mushucyachin.
Mandac Dios yachachishca
shimicunaca imatapish
pactachic cashpami, yanga
runacunatapish allita yachachin.
8Mandac Dios mandashcacunaca
cashcata ruhuac cashpami
shungutapish cushichin.
Mandac Dios yachachishca
mandashcacunaca chuya cashpami
ñahuitapish pascan.
9Mandac Diosta manchanaca chuyami,
shinallatac huiñaipacmi canga.
Mandac Dios mandashcacunaca
mana llullachu,
cashcallata mandashcacunami.
10Sumaimana curitapish yalli munanami.
Ashtahuan alli bunga mishquitapish
yalli mishquimi.
11Canta servic ñucaca chai
shimicunahuanmi cunashca cani.
Chaicunata cazucpica sumac
japinami tiyan.
12¿Pitac paillatac pandarishcataca
yachai pudinyari?
¡Mandac Dioslla, ñuca mana
yuyarishca juchacunataca
perdonaiyari!
13Shinallatac canta
servic ñucataca jatun tucuna
yuyaimanta cuidangui.
Chai yuyai shamushpa,
ñucata mishachunca
ama saquinguichu.
Chashna cuidacpimi,
ima pandata mana ruhuasha.
Shinallatac canta mana cazushpa
mana juchallisha.
14Canca jatun rumi shina
ñucata pacac, ñucata
quishpichicmi cangui.
Ñuca canman nishcacunapish,
ñuca shungupi yuyashcapish
can chasquinalla cashca cachun.
Who We AreWhat We EelieveWhat We Do
2025 by iamachristian.org,Inc All rights reserved.
