ROMANOS 9 - Biblia Quichua Cañar 2010

Israelcunata Dios acllashcamanta

1Apunchic Jesusta cric cashcamantami, mana llullashpa cashcatatac nicuni. Ñuca yuyaitaca Diospac Espiritumi pushacun. Paimi ñuca mana llullacushcataca ricuchin.

2Ñuca shungupica yallita llaquirishpami punzhanta nanaihuan cani.

3Ñuca quiquin aillucunapac randi, ñucallatac Cristomanta anchurishpa, llaquichishca canatami munaiman.

4Paicunaca Diospac huahuacunami. Taita Israelpac huahua huahuacunami. Chaimantami Diosca paipac huahuacuna cachun acllarca. Diosca paipac sumaimana cashcatapish paicunaman ricuchircami. Moisés mandashcacunatapish, Dios cuyashpa ari nishcacunatapish, Dios cusha nishcacunatapish charinmi. Diosta mañanatapish yachancunami.

5Paicunaca ñucanchic ñaupa taitacunapac huahua huahuacunami. Paicunapuramantami Cristoca runa tucurca. Paitaca tucuita Mandac Dios cashcamantami huiñai huiñaita alli nina canchic.

6Chaita nishpaca mana: Israelcunaman Dios cushami nishcaca mana pactachishcachu nisha ninichu. Ashtahuanpish taita Israelpac huahua huahuacuna mana tucui mashna israelcunatac cashcamanta,

7Abrahampac huahua huahuacunapish mana tucui paipac huahuacunatac cashcamantami chashna nini. Ashtahuanpish Diosca Abrahamtaca: «Cambac churi Isaacpac huahua huahuacunallami cambac huahuacuna canga» nishcami.

8Shina cacpica, mana tucui Abrahampac huahua huahuacuna cashcamantachu Dios acllashca cancuna, ashtahuanpish Dios cusha nishcamanta tiyashca huahuacunami Dios acllashca cancuna.

9Dios Abrahamman cusha nishpaca: «Cunan shina punzha ñuca cuticpica, cambac huarmi Saraca shuc cari huahuatami charinga» nishcami.

10Mana chaillachu, ashtahuanpish ñucanchic ñaupa taita Isaacpac huarmi Rebecapish ishcai huahuatami charirca.

11Chai huahuacuna manarac huacharicpi allitapish, mana allitapish manarac ruhuacpimi, (Diosca mana imata ruhuashcamanta, ashtahuanpish pai munashcamanta acllarca).

12Diosca Rebecataca: «Punta churimi quipa churita servic canga» nishcami.

13Dios quillcachishcapipish: «Jacobotami cuyarcani, Esautaca mana cuyarcanichu» ninmi.

14Chashna cacpica, ¿imatatac nishun? ¿Diosca mana cashcata ruhuacchu nishunchu? ¡Mana chashnachu!

15Diosca Moisestaca: «Maijanta ñuca llaquisha nishcatami llaquisha, maijanta ñuca cuyasha nishcatami cuyasha» nishcami.

16Shina cacpica, mana gentecuna munashcamanta, mana imata ruhuashcamantachu Diosca llaquin, ashtahuanpish pai cuyashcallamantami llaquin.

17Dios quillcachishcapica Egipto llactata jatun mandactaca: «Canpi ñuca poderta ricuchingapac, tucui llactacunapi ñuca shutita ricsichingapacmi, jatun mandac cachun churarcani» nishcami.

18Shina cacpica, Diosca maijanta llaquisha nishpaca llaquinllami, maijanta shunguta sinchiyachisha nishpaca sinchiyachinllami.

19Shina cacpica cancunaca: «¿Imamantatac Diosca juchanchinga? Diospac munaitaca pipish mana jarcai pudinchu» ninguichari.

20Canca Diosta taripangapacca, ¿imatac cangui? ¿Allpamanta mangata ruhuactaca mangaca: «¿Ima nishpatac chashna ruhuarcangui?» ningachu?

21Mangata ruhuacca allpamanta pai munashcatami ruhuai pudin. Chai allpallamantatacmi yanga mangatapish, alli mangatapish ruhuan.

22Chai shinallatacmi Diosca piñashpa tucuchina cacpipish, mana llaquichishpa, pai llaquichic cashcatapish, poderyuc cashcatapish ricuchin.

23Diosca sumaimana cashcata ricuchingapacmi, ñaupamanta pacha cuyac cashcata ñucanchicman ricuchirca. Chaitaca ñaupamanta pachami, allichishca carca.

24Diosca ñucanchictaca israelcunapuramantapish, mana israelcunapuramantapishmi acllarca.

25Dios ima nishcata huillac Oseas quillcashpaca:

«Mana ñuca cuyashca gentecunatami

“ñucapacmi” nisha.

Mana ñuca cuyashcacuna cacpipish,

“ñuca cuyashcacunami” nishami.

26Shinallatac maipimi

“cancunaca mana ñuca

huahuacunachu canguichic” nircani,

chaillapitacmi

“cancunaca causac Diospac

huahuacunami canguichic” nisha» nishcami.

27Isaías israelcunamanta huillashpaca: «Israelpac huahua huahuacuna tiyu shina achca cashpapish, ashallami quishpiringa.

28Chaica, Diosca utcami cai pachapi causaccunataca cashcata ruhuashpa taripashpa llaquichinga» nircami.

29Utcapi Isaías huillashpaca:

«Tucuita Mandac Dios

shucllatapish mana saquishpa,

tucui huahua huahuacunata

mana saquishca cacpica,

cunanllatacmi Sodoma shina,

Gomorra shina tucunchicman carca» nishcami.

Alli huillaica israelcunamanpish cashcamanta

30Shina cacpica, ¿imatatac nishun? Diosca mana israelcunataca paita crishcamantami chasquirca. Mana paicuna cashcata ruhuac cashcamantachu chasquirca.

31Ashtahuanpish israelcunaca Moisés mandashcacunata pactachishpa, Dios chasquishca canata munashpapish mana pudircachu.

32¿Imamantatac chashnaca carca? Paicunaca crishcallamanta Dios chasquishca canataca mana munarcacunachu, ashtahuanpish mandashcacunata pactachishpami, chasquishca canata munarcacuna. Chaimantami mitcarina rumipi mitcarircacuna.

33Chaitaca, Dios quillcachishcapica:

«Sión pueblopimi

shuc rumita churani.

Chai rumipi

mitcarishpami urmangacuna.

Pipish chai rumipi shunguta churacca

mana pingaichishcachu canga» ninmi.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help