MARCOS 7 - Biblia Quichua Cañar 2010

Mana alli yuyaicuna juchayucta ruhuac cashcamanta(Mt 15.1-20)

1Jerusalenmanta shamuc fariseocunapish, maijan mandashcacunata yachachiccunapish Jesuspacmanmi cuchuyarca.

2Paicunaca Jesuspac maijan yachacuccuna maquita mana jahuashpa micucucta ricurca.

3(Fariseocunapish, tucui israelcunapish ñaupa taitacuna yachachishcata catishpami, maquita jahuashpalla micuc carca.

4Plazamanta cutimushpapish, maquita mana jahuashpaca, mana micucchu carca. Shinallatac shuctac yachachishcacunatapish pactachiccunami carca. Chaimantami vasocunatapish, jarrocunatapish, platocunatapish jahuac, shinallatac camacunatapish tacshac carca).

5Chaimantami fariseocunapish, mandashcacunata yachachiccunapish Jesusta tapushpaca:

—¿Ima nishpatac cambac yachacuccunaca ñaupa taitacuna yachachishcata mana cazushpa, maquita mana jahuashpa micun?— nirca.

6Shina nicpimi, Jesusca paicunataca:

—¡Mishqui shimi, jayac shungucuna canguichic! Allimi, Dios ima nishcata huillac Isaías cancunamanta quillcashpaca:

“Cai gentecunaca shimillahuanmi

ñucataca alli nincuna.

Ashtahuanpish shunguca

ñucamanta carupimi.

7Paicunaca yangallami

ñucata alli nincuna.

Runacuna yachachishcallatami

yachachincuna” nishcami.

8Cancunaca Dios mandashcacunata saquishpami, runacuna yachachishcallata caticunguichic— nirca.

9Shinallatac Jesusca:

—Dios mandashcacunataca saquishpami, ñaupa taitacuna yachachishcallata cazunguichic.

10Moisés yachachishpaca: “Taita mamata cuyangui. Maijanpish taita mamata mana alli nicca, huañunami canga” nishcami.

11Ashtahuanpish cancunaca: “Taita mama imata mañacpica, ‘ñuca charishcacunaca Diosman cushca ofrendami. Chaimanta mana ayudai pudinichu’ ninallami” nishpami yachachinguichic.

12Chashna yachachishpami, taita mamata ayudachunca mana saquinguichic.

13Chashnami Dios mandashcacunata saquishpa, runacuna yachachishcallata catinguichic. Shinallatac shuctac chai shinacunatami catinguichic— nirca.

14Jesús tucui gentecunata cayashpaca:

—Tucui mashna uyashpa, alli entendichic:

15Imapish shimita yaicucca mana juchayucta ruhuanchu, ashtahuanpish shungumanta llucshic mana alli yuyaimi juchayuctaca ruhuan.

16Ringrita chariccunaca, alli uyaichic— nirca.

17Jesús gentecunamanta raquirishpa, huasiman yaicucpica, paipac yachacuccunaca chimbapurashpa parlashcamantami tapurca.

18Chaimantami Jesusca paicunataca:

—Cancunapish ñuca huillacushca imata nisha nishcataca, ¿manaracchu entendinguichic? Ima micunapish shimita yaicucca mana juchayucta ruhuac cashcataca, ¿manachu entendinguichic?

19Micunaca shunguman mana yaicushpami, huicsallaman yaicun. Quipamanca llucshinllami— nirca.

Chashna nishpaca, ima micunatapish micunallami nishpami yachachirca.

20Jesús cutin rimashpaca: «Shungu ucumanta llucshicmi juchayucta ruhuan.

21Shungu ucumanta millai yuyaicuna llucshicpimi, huainayancuna, millaita ruhuancuna, huañuchincuna,

22shuhuancuna, charicyanata munancuna, pitapish llaquichincuna, umancuna, mana pingancuna, envidiancuna, llullancuna, jatun tucuncuna, yuyai illac tucuncuna.

23Tucui cai yuyaicunami shungumanta llucshishpa, juchayuctaca ruhuan» nirca.

Sirofenicia huarmi crishcamanta(Mt 15.21-28)

24Jesusca chaimanta rishpaca Tiro llacta, Sidón llactamanmi chayarca. Chaipi cashcata pipish ama yachachunmi, shuc huasiman yaicurca. Chashna cacpipish gentecunaca Jesús maipi cashcata yachac chayarcami.

25Shuc huarmimi Jesús chaipi cashcata yachashpa shamurca. Chai huarmica supai japishca shuc huarmi huambratami charirca.

26Chai huarmica mana israelcunapuramantachu carca. Ashtahuanpish Sirofenicia llacta huarmimi carca. Paimi, paipac huambramanta supaita llucchishpa cachachun mañarca.

27Shina nicpimi, Jesusca huarmitaca:

—Huahuacunarac micuchun saqui. Huahuacunamanta micucucta quichushpa, allcunaman caranaca, mana allichu— nirca.

28Shina nicpimi, chai huarmica:

—Apunchic Jesús, chashnami. Shina cacpipish allcunaca huahuacuna micucushpa urmachishcataca micunllami— nirca.

29Shina nicpimi Jesusca:

—Canca allitami nishcangui. Cambac huahuamantaca, supaica ñami llucshirca. Cunanca huasiman rilla— nirca.

30Huarmi huasiman cutishpaca, huambra camapi siricuctami ricurca. Supaica huambramantaca ñami llucshishca carca.

Jesús ringri mana uyac,mana rimac runata alliyachishcamanta

31Jesusca Tiro llactamanta llucshishpaca, Sidón llactata, Decápolis llactata rishpami, Galilea cuchaman chayarca.

32Chaiman ringri mana uyac, mana rimac runata pushamushpami, Jesús chai runapac uma jahuapi maquita churashpa, alliyachichun mañarca.

33Shina mañacpimi, Jesusca chai runata gentecunamanta caruyachishpa, callupi tucata churashpa, ishcai ringripi dedota satirca.

34Chashna ruhuashpami, Jesusca jahua pachata ricushpa, shungupi llaquirishpa:

—¡Efata!— nirca. Chaica: “Pascari” nisha ninmi.

35Chashna nicpica, chai runapac ringricunaca pascarircami. Callupish alli tucucpimi, ña rimarcalla.

36Ña alliyachishpaca, Jesusca piman ama huillachunmi cutin cutin rimashpa mandarca.

Chashna nicpipish, ashtahuanmi pimanpish parlashpa purirca.

37Chashna parlacpica, tucui gentecunami mancharishpami: “Paica allita ruhuan. Ringri mana uyaccunatapish uyachin, mana rimaccunatapish rimachinmi” nircacuna.