2 CRÓNICAS 11 - Biblia Quichua Cañar 2010

Roboam israelcunata llaquichinata jarcarishcamanta

1Roboam Jerusalenman shamushpaca israelcunahuan macanacungapacmi Judapac aillumantapish, Benjaminpac aillumantapish macanacunata alli yachac patsac pusac chunga huaranga soldadocunata tandachirca. Roboamca pai mandacushca llactata cutin japingapacmi chashna ruhuarca.

2Ashtahuanpish Mandac Diosca paipaclla cac Semaiasman huillashpaca:

3«Salomonpac churi Judá llactata jatun mandac Roboamtapish, Judapac, Benjaminpac tucui aillucunatapish

4Mandac Diosca: “Cancunapac huauquicunahuan macanacungapacca ama richicchu. Cancunapac huasicunaman cutichiclla. Caitaca ñucallatacmi chashna ruhuacuni” ninmi nigri» nirca. Mandac Dios chashna nishcata huillacpica, Jeroboamhuan mana macanacungapac rishpami cutircacuna.

Roboam tucuipi alli llucshishcamanta

5Roboamca Jerusalenpi causashpami Judá llactata ashtahuan sinchiyachingapac shuc pueblocunatapish ruhuachirca.

6Paica Belén, Etam, Tecoa,

7Bet-sur, Soco, Adulam,

8Gat, Maresa, Zif,

9Adoraim, Laquis, Azeca,

10Zora, Ajalón, Hebrón pueblocunatami ruhuachirca. Chai pueblocunaca Benjaminpac, Judapac llactacunatami muyundita jatun pircacunahuan ruhuashca carca.

11Torrecunatapish ashtahuanmi sinchita ruhuachirca. Chaicunapica soldadocunata mandaccunata cuidachun churashpami granota, vinota, aceiteta churarca.

12Tucuimanmi tucui pueblocunapi escudocunatapish, lanzacunatapish curca. Chashna ruhuacpimi, Judapac, Benjaminpac llactacunaca pai mandashca causarcacuna.

13Tucui Israel llactamantami curacunapish, levitacunapish paicuna maipi causacushca pushtumantaca Roboamhuan tandanacungapac Jerusalenman shamurca.

14Levitacunaca paicunapac michina pambacunata, ima shuc charishcacunatapish saquishpami Judaman, Jerusalenman shamurcacuna. Diospacta ruhuanamanta Jeroboampish, paipac churicunapish paicunata llucchishpa cachashcamantami chashna shamurcacuna.

15Jeroboamca shuctac curacunatami lomacunapi tiyac altarcunata, supaicunata, pai ruhuachishca beci dioscunata ricuchun churarca.

16Levitacunapac huashataca israelcunata Mandac Diosta tucui shunguhuan catinata munac gentecunami tucui Israel aillupuramanta Jerusalenman shamurca. Paicunaca ñaupa taitacunapac Mandac Diosman animalcunata cushpa huañuchingapacmi Jerusalenman shamurcacuna.

17Shinami Judá llactatapish, Salomonpac churi jatun mandac Roboamtapish quimsa huatacaman sinchita mandachun churarca. Quimsa huatacamanmi David shinallatac, Salomón shinallatac Diosta cazushpa causarca.

Roboampac familiamanta

18Roboamca Abihail huarmipi David charishca Jerimotpac ushi Mahalathuanmi cazararca. Abihailca Eliabpac ushimi carca. Eliabca Isaipac churimi carca.

19Roboam Mahalat huarmipi charishca churicunaca: Jeús, Semarías, shinallatac Zahammi carca.

20Mahalathuan cazarashca quipaca Absalonpac ushi Maacahuanmi cazararca. Chai huarmipi charishca churicunaca: Abías, Atai, Ziza, shinallatac Selomitmi carca.

21Roboamca chunga pusac huarmicunatami charirca. Caishuc huarmicunataca sucta chunga huarmicunatami charirca. Tucui chai huarmicunamantaca Absalonpac ushi Maaca huarmitami ashtahuan cuyarca. Chai tucui huarmicunahuanca ishcai chunga pusac churicunata, sucta chunga ushicunatami charirca.

22Roboamca Maaca huarmipi charishca Abías churitami huauquicunata mandac cachun churanata munarca. Paitaca jatun mandac cachunmi munarca.

23Caishuc churicunataca alli yuyarishpami Judapac, Benjaminpac llactacunaman, shinallatac muyundi jatun pircahuan jarcashca pueblocunaman, caiman chaiman cacharca. Chai pueblocunapi churashpaca, achca micunatami curca, shinallatac achca huarmicunahuanmi cazarachirca.