1Mandac Dios mandashcacunata cazushpa,
ima millaitapish mana ruhuashpa
causaccunaca maimi cushicun.
2Ima shina causanata
yachachishcata pactachingapac
tucui shunguhuan mashcaccunaca
maimi cushicun.
3Pai munashca shina causaccunaca
ima millaita mana ruhuancunachu.
4Dioslla,
canmi tucui mandashcacunata
pactachichun mandarcangui.
5¡Mandashcacunata pactachingapac
ñuca causai alli cashpachari
alli caiman!
6Can mandashcacunata
tucui pactachishpaca,
mana pingaichishcachu casha.
7Cashcata ruhuac cambac
shimicunata yachacushpaca,
tucui shunguhuanmi canta alabasha.
8Can mandashcacunata
pactachishpami causasha.
Ñucata amatac cungaringuichu.
Bet9¿Ima shinatac quipa huiñaicunaca
paipac causaipi chuya canga?
Cambac rimashcata cazushpami
chuya canga.
10Tucui ñuca shunguhuanmi
cantaca mashcarcani.
Can mandashcacunamanta
anchurichunca amatac saquinguichu.
11Juchallishpa canta
mana llaquichingapacca
ñuca shungupimi,
can rimashcacunata huacaichircani.
12¡Mandac Dioslla,
canca alli nishcami cangui!
Can mandashcacunata yachachiyari.
13Can mandashpa rimashcataca
ñuca shimihuanmi callarishpa
huillarcani.
14Ima shina causanata
can yachachishcata
yachacushpaca
tucui charishcacunamanta
yallimi cushicurcani.
15Can mandashcacunatami
allita yuyarishpa,
can munashca shina causasha.
16Quillcashpa mandashcacunahuanmi
cushicuni.
Cambac rimashcacunataca
manatac cungarishachu.
Guímel17Can rimashcacunata
cazushpa causangapac
canta servic ñucaman
allita ruhuaiyari.
18Cambac sumaimana mandashcata
ricungapac ñuca ñahuita pascaiyari.
19Cai pachapica
shamushpallami causacuni.
Ñuca ñaupamanta
can mandashcacunata ama pacaichu.
20Ñuca almaca can mandashcacunata
yachanata munashpami punzhanta
mai llaquiricun.
21Jatun tucushcacunataca
llaquichircanguimi.
¡Can mandashcacunamanta
anchuricca llaquichishca cachun!
22Ñucaca ima shina causachun
can yachachishcacunatami cazurcani.
Chaimanta pita mana valichishpa,
yangapi churashpa rimana yuyaita
ñucamanta anchuchiyari.
23Mandaccuna paicunapura
tiyarishpa, ñucata rimacucpish,
canta servic ñucaca pactachichun
can cushca shimicunatami
yuyaricurcani.
24Ima shina causanata
can yachachishcacunaca cushichinmi,
shinallatac alli yuyaitapish cunmi.
Dálet25Ñucaca huañunallami
allpapi siricuni.
Cambac shimihuan rimashca shina
causaita cuiyari.
26Ñuca causaimanta
canman huillacpica, uyarcanguimi.
Can mandashcacunata yachachiyari.
27Cambac sumaimana shimicunataca
yuyarirasha ninimi.
Can mandashcacunata
entendichiyari.
28Ñuca almaca llaquihuan
tucuricunmi.
Cambac shimihuan rimashca shina
sinchiyachiyari.
29Llulla causaimanta anchuchishpa,
can mandashcacunata yachachiyari.
30Mana llullashpa cantanatami
acllarcani.
Can mandashcacunataca
punzhantami ñuca yuyaipi charini.
31Mandac Dioslla, pactachichun
can cushca shimicunapimi
llutarishca shina causani.
Amatac pingaipi saquinguichu.
32Can ñuca shungupi cushicuita
cushcamantami can mandashcacunataca
utca pactachisha.
He33Mandac Dioslla,
mandashcacunata cazushpa
causanata yachachiyari.
Tucui ñuca causaipimi
pactachishpa causasha.
34Alli yuyaita cuiyari.
Can mandashcacunata cazushami.
Chaitaca tucui shunguhuanmi
pactachisha.
35Can mandashcacunapi
nishca shina pushaiyari.
Ñucaca chaicunahuanmi cushicusha.
36Ñuca shungutaca
ima shina causanata
can yachachishcata
cazuchun ayudaiyari.
Charinallata munachunca
ama saquinguichu.
37Ñuca ñahui ima mana allicunata
ricuchunca ama saquinguichu.
Cambac ñanpi alli catingapac
sinchiyaichicyari.
38Can imata cusha nishcataca
canta manchac canta
servicman pactachiyari.
39Camiccunamanta
ñucata caruyachiyari.
Can mandashcacunaca mai allimi.
40Riqui, ñucaca
can mandashcacunata
yachanatami munani.
Canca imatapish cashcata
ruhuashcahuan causaita cuiyari.
Vav41Mandac Dioslla,
can cusha nishca shina
can llaquinatapish,
quishpichinatapish
pactachiyari.
42Chashna ruhuacpimi,
ñucata piñaccunamanca
cambac rimashcapi shunguta
churashpa causashcata huillasha.
43Ñucaca canllatami shuyani.
Chaimanta ñuca shimi manapish
cashcata rimachunca
amatac saquinguichu.
44Ñucaca huiñai huiñaitami
can mandashcataca
cazushpa causasha.
45Can mandashcacunata
tucui yuyaihuan
mashcashcamantaca,
pi mana llaquichishcami purisha.
46Ima shina causanata
can yachachishcataca
jatun mandaccunapac
ñaupapimi huillasha.
Shinallatac mana
pingaichishcachu casha.
47Can mandashcacunataca cuyarcanimi.
Chai mandashcacunahuanmi cushicuni.
48Can mandashcacunataca
cuyarcanimi.
Chaimantami ishcai maquihuan
chasquishpa, chai mandashcacunata
yuyarishpa causani.
Zayin49Canta servic ñucaman
can cusha nishcataca yuyariyari.
Ñucaca chai yuyaillami shuyacuni.
50Can cusha nishcamantami
llaquihuan cashpapish cushicuni.
Chaillatacmi ñucamanca causaita cun.
51Jatun tucushcacunaca
yallitami burlashpa asircacuna.
Shina cacpipish
can mandashcamantaca
manatac caruyarcanichu.
52Mandac Dioslla,
ñaupa huatacunapi
taripashpa allita ruhuashcata
yuyarishpami cushicurcani.
53Can mandashcacunata saquishpa
millaita ruhuacta ricushpami
yallita piñarircani.
54Caru llactapi puricucpica,
can mandashcacunaca
ñucamanca cantanami carca.
55Mandac Dioslla,
cambac shutitaca
tutacunami yuyarircani.
Can mandashcataca cazurcanimi.
56Can mandashcacunata
pactachishcamantami
cashna allicunataca chasquircani.
Jet57Mandac Dioslla,
canllami ñucapac japinaca cangui.
Can mandashcacunataca
pactachishami nircanimi.
58Tucui shunguhuanmi
alli cangapac canta mañarcani.
Can nishca shina ñucataca
llaquiyari.
59Ñuca causacushcata yuyarishpami,
can yachachishca shina
causai callarircani.
60Can mandashcacunataca
mana unaiyashpa,
utcami pactachi callarircani.
61Canta mana manchaccuna
tucllahuan urmachisha nishpa
muyunacucpipish,
can mandashcacunataca
mana cungarircanichu.
62Can cashcata ruhuashpa
taripashcamantami,
canta pagui ningapac chaupi
tuta jatarini.
63Ñucaca tucui canta
manchaccunahuan,
can mandashcacunata
cazuccunahuanmi apanacuni.
64Mandac Dioslla,
tucui cai pachapi
causaccunatami llaquingui.
Can mandashcacunataca
yachachiyari.
Tet65Mandac Dioslla,
can nishca shinami
canta servicmanca
allita ruhuashcangui.
66Can mandashcacunataca
ñucaca crircanimi.
Alli yuyaita cushpa,
allita yachachiyari.
67Ñaupa can manarac llaquichicpimi
pandarishpa causarcani.
Ashtahuanpish cunanca
cambac rimashcacunata
cazushpami causani.
68Canca allimi cangui.
Imatapish allitami ruhuangui.
Can mandashcacunataca yachachiyari.
69Jatun tucushca gentecunaca
ñucata yangami juchanchircacuna.
Shina ruhuacpipish,
tucui shunguhuanmi
can mandashcacunata cazusha.
70Paicunapac shunguca
huira tapashca shinami
rumi shungu tucurca.
Ashtahuanpish ñucaca
can mandashcacunahuanmi cushicuni.
71Allitami llaquichircangui.
Chashna ruhuacpimi,
can mandashcacunataca cazuni.
72Ñucamanca can mandashcacunaca
huaranga huaranga curitapish,
cullquitapish yalli allimi.
Yod73Cambac maquihuanmi
ñucata ruhuarcangui.
Can mandashcacunata
allita yachacungapac
ñucata entendichiyari.
74Canta manchaccuna ñucata
ricushpaca cushicungami.
Cambac rimashcapimi
shunguta churashpa shuyacurcani.
75Mandac Dioslla,
can cashcata ruhuashpa
taripac cashcataca ricsinimi.
Shinallatac ñucataca
llaquichina cacpitacmi
llaquichishcangui.
76Canta servic ñucaman can cushami
nishca shina llaquishpa cushichiyari.
77Ñucaca can mandashcacunahuanmi
cushicuni.
Chaimanta ñuca causashpa
catingapac llaquiyari.
78Jatun tucushcacunaca
pingaichishca cachun.
Paicunaca yanga llullashpami
ñucataca llaquichirca.
Shina cacpipish,
can mandashcacunatami
allita yuyarishpa causasha.
79Canta manchaccunapish,
can yachachishca
ima shina causanata
ricsiccunapish
ñucahuan tandanacuichic.
80Mana pingaichishca cangapacca
can mandashcacunata tucui shunguhuan
allita pactachicta ruhuaiyari.
Caf81Can quishpichinata shuyashpami
ñuca almaca huañucun.
Cambac rimashcapi
shunguta churashpami shuyacuni.
82Can nishcata pactachingapac
shamucta shuyashpa,
ñahui amsayashpaca:
«¿Ima horastac ñucata
cushichingapac shamunguiyari?»
nircani.
83Cushnipi huarcushca
cara shina cashpapish,
quillcashpa mandashcataca
mana cungarircanichu.
84¿Canta servicca
ima horascamantac causagrinyari?
¿Ima horastac ñucata
llaquichiccunataca
llaquichigringuiyari?
85Can mandashcacunata
mana cazuc, jatun tucushcacunaca
ñuca urmachunmi jutcuta ruhuashcacuna.
86Can mandashcacunaca
cashcata nic shimicunami.
Yangami llaquichincuna,
chaimanta ayudaiyari.
87Cai allpamanta ñucata
ña chingachigricucpipish,
can mandashcacunataca
manatac saquishcanichu.
88Can llaquishca shinallatac
causaita cuiyari.
Can rimashpa yachachishcataca
pactachishami.
Lámed89Mandac Dioslla,
can rimashcaca huiñaicamanmi
jahua pachapi tiyacun.
90Huahua huahuacamanmi
canca tucuita pactachicungui.
Cai pachataca pi mana cuyuchipacta
sinchitami ruhuarcangui.
91Can mandacpimi,
imapish cunancaman tiyacun.
Tucui chaicunaca
canta serviccuna can.
92Can mandashcacuna
ñucata mana cushichishca cacpica,
ñucaca llaquipi huañuimanmi carcani.
93Can mandashcacunahuanmi
ñucamanca causaita curcangui.
Chaimanta jaicapi
can mandashcacunataca
mana cungarishachu.
94Cambacmi cani,
can mandashcacunatami
mashcarcani.
Chaimanta quishpichiyari.
95Canta mana manchaccuna
ñucata tucuchingapac
chaparacucpipish,
can ima shina causanata
yachachishcatami yuyarisha.
96Ima allita ruhuashcapish
tucurinallami.
Ashtahuanpish can mandashcacunaca
mana tucurinchu.
Mem97¡Can mandashcacunataca
yallitami cuyani!
Punzhantami chai yuyailla cani.
98Can mandashcacunahuanmi
ñucata piñaccunamanta yalli,
ashtahuan yachacta ruhuashcangui.
Can mandashcacunaca
tucui causaipimi ñucapac can.
99Ima shina causanata
can yachachishcacunaca
ñuca yallita yuyarishpa
causangapacmi can.
Chaimantami ñucata
tucui yachachiccunatapish
yalli ashtahuan yachacurcani.
100Can mandashcacunata
cazushcamantami yuyaccunatapish
atishpa entendini.
101Can rimashcata pactachingapacmi
ñuca chaqui mana alli ñanta
rigricucpipish jarcarcani.
102Canmi ñucata yachachic cangui.
Chaimantami can yachachishcamantaca
manatac anchurircani.
103¡Cambac rimashcacunaca
ñuca callupica mai mishquimi!
¡Mishquitapish yalli mishquimi!
104Can mandashcamantami
alli yuyaita japircani.
Shina cashcamantami
llulla causaitaca piñani.
Nun105Can rimashcaca
ñuca chaqui sarunata achicyachicmi.
Ñuca ñanta ricuchic luzmi.
106Imatapish cashcata ruhuangapacca
can mandashcacunataca
pactachishatacmi nishpami ari nircani.
107Mandac Dioslla,
yallita llaquihuanmi cani.
Can nishca shinallatac
causaita cuiyari.
108Mandac Dioslla,
ñuca shimihuan canta
alli nishcataca chasquiyari.
Can yachachishcatapish yachachiyari.
109Ñuca causaica punzhantami
chingarinalla.
Shina cacpipish can mandashcacunataca
mana cungarircanichu.
110Canta mana manchaccuna
ima shinapish urmachisha nicucpipish,
can mandashcacunataca
mana cungarircanichu.
111Ima shina causanata
can yachachishcaca
ñucata cushichicmi.
Chaimantami huiñaipac
ñuca japina can.
112Can mandashcacunata
huañungacaman punzhanta
ñuca shungupica pactachina
yuyaillami cani.
Sámej113Mishqui shimi
jayac shungucunataca piñanimi.
Ashtahuanpish can mandashcataca
cuyanimi.
114Canca ñuca miticuna,
ñucata pacac escudomi cangui.
Can nishca pactachunmi shuyacuni.
115Millai runacuna,
ñucamanta anchurichic.
Ñucaca,
ñuca Dios mandashcacunatami
pactachisha nini.
116Can nishca shina ñucata
ayudacpica causashami.
Canllatami shuyacuni.
Ama pingaichinguichu.
117Cambac maquihuan ayudacpica
quishpirishami.
Can mandashcacunahuanmi
punzhanta cushicusha.
118Can mandashcacunata
mana cazuccunataca
millanayachinguimi.
Paicunaca yangallatami
yuyashpa causan.
119Tucui cai pachapi
causac canta mana cazuccunataca
mapata shinami chingachircangui.
Chaimantami ima shina causanata
can yachachishcataca cuyani.
120Cambac ñaupapica ñuca cuerpoca
chucchucunmi.
Can llaquichinataca manchacunimi.
Ayin121Ñucaca cashcata ruhuashpami
allita ruhuarcani.
Ama ñucata piñaccunapac
maquipi saquichu.
122Canta servic ñucataca
allita pushaiyari.
Chai jatun tucushcacuna
ama yallita llaquichichunca
jarcanguiyari.
123Can cashcata ruhuashpa
quishpichicucta ricusha nishpami,
shuyacushpalla
ñuca ñahuipish amsayan.
124Canta servicmanca
can llaquishca shina,
can mandashcacunataca
yachachiyari.
125Ñucaca canta servicmi cani.
Can mandashca shina causanata
yachacungapac alli yuyaita cuiyari.
126Mandac Dioslla,
can mandashcacunataca
yangata ruhuashpami
mana cazuncuna.
Paicunataca ñami imatapish
ruhuana cangui.
127Chaimantami
can mandashcacunataca
curitapish, ashtahuan
alli curitapish yalli cuyani.
128Chaimantami tucui can
mandashcacunataca huacaichircani.
Llulla causaitaca piñanimi.
Pe129Ima shina causanata
yachachishcaca sumacmi.
Chaimantami ñucaca
tucui yuyaihuan cazuni.
130Can yachachishpa rimashcaca
achicyachinmi.
Imata mana yachaccunamanpish
alli yuyaita cunmi.
131Shimita pascashpa
samaita aisac shinami,
can mandashcacunataca
tucui munaihuan yachacuni.
132Ñucapacman tigramuiyari.
Cambac shutita cuyaccunata
shinallatac ñucataca llaquiyari.
133Can yachachishca shina
ñucataca pushaiyari.
Imapish juchacuna
ñucata mishachunca ama saquichu.
134Millai gentecunamanta
quishpichiyari.
Can mandashcacunataca
pactachishami.
135Canta servic ñucataca
cambac ñahuihuan achicyachishpa,
can mandashcacunataca
yachachiyari.
136Shuctac gentecuna
can mandashcacunata
mana cazucpica, huiqui yacu shina
callpactami huacani.
Tsade137Mandac Dioslla,
cashcata ruhuacmi cangui.
Allita ruhuashpami taripangui.
138Ima shina causanata
can yachachishcacunaca
cashcallata yachachicmi.
Shinallatac cashcata
nic yachachishcacunami.
139Ñucata piñaccunaca
cambac rimashcata
cungarishcamantami,
yallita llaquirishpa huañucuni.
140Cambac rimashcacunaca chuyami.
Chaimantami canta servic
ñucaca cuyani.
141Ñucaca imapac mana
valichishca yangalla
runa cashpapish,
can mandashcacunataca
mana cungarircanichu.
142Canca huiñaita cashcata
ruhuacmi cangui.
Can mandashcacunaca
cashcata nicmi.
143Llaqui huacaicuna japicpipish,
can mandashcacunahuanmi cushicurcani.
144Ima shina causanata
can yachachishcaca
huiñaita cashcata yachachicmi.
Chai shina causangapac
alli yuyaita cuiyari.
Qof145Ñucaca tucui shunguhuanmi
caparishpa mañani.
Ñucata uyaiyari.
Can mandashcacunataca cazushami.
146Cantami caparishpa mañani.
Chaimanta quishpichiyari.
Ima shina causanata
can yachachishcata pactachishami.
147Manarac pacaricpi
jatarishpami mañani.
Can rimashcatami shuyacuni.
148Can mandashcacunata
yuyaringapacmi,
tutacunapish mana riccharina
horaspi riccharircani.
149Mandac Dioslla,
can cuyashca shina
ñuca mañashcataca uyaiyari.
Can cashcata ruhuac cashca
shinallatac causaita cuiyari.
150Ñucata piñaccunaca
ñami cuchuyamucuncuna.
Can mandashcacunamanta
anchurishpami puricuncuna.
151Mandac Dioslla,
canca ñuca cuchullapimi cangui.
Can mandashcacunaca
cashcata nic rimashcacunami.
152Ima shina causanata
can yachachishcataca
ña unaitami yachani.
Chaitaca huiñaipacmi
churarcangui.
Resh153Ñuca huacacucta ricushpa
quishpichiyari.
Ñucaca can mandashcataca
mana cungarishcanichu.
154Ñucata ayudashpa quishpichiyari.
Can nishca shina causaita cuiyari.
155Canta mana manchaccunaca
can mandashcacunataca
mana mashcancunachu.
Chaimanta paicunaca
mana quishpichishcachu canga.
156Mandac Dioslla,
canca yallita llaquicmi cangui.
Can cashcata ruhuac cashcamanta
causaita cuiyari.
157Ñucata llaquichiccunapish,
piñaccunapish taucami.
Shina cacpipish,
can mandashcacunamantaca
mana anchurircanichu.
158Mana cazuccunaca can mandashpa
rimashcacunataca mana cazunchu.
Chaicunataca mana ricunayanchu.
159Mandac Dioslla,
can mandashcacunata
ñuca cuyactaca
canllatacmi yachangui.
Can llaquic cashca shinallatac
causaita cuiyari.
160Tucui can rimashcacunaca
cashcata nicmi.
Cashcata ruhuashpa
taripanaca huiñaipacmi.
Sin161Mandaccuna yanga ñucata
llaquichicpipish, ñuca shunguca
cambac rimashcacunata mancharcami.
162Macanacushpa achcata japishpa
cushicuc shinami,
can rimashcahuanca
yallitami cushicuni.
163Llullanataca piñashpa millanimi.
Ashtahuanpish can mandashcataca
cuyanimi.
164Cashcata can ruhuac cashcamantaca
shuc punzhapi canchis cutinmi alabani.
165Can mandashcacunata
cuyaccunaca yallita cushillami
causancuna.
166Mandac Dioslla,
can quishpichichunmi shuyashcani.
Can mandashcacunata
ruhuashpami causarcani.
167Ima shina causanata
can yachachishcataca
tucui yuyaihuanmi cazuni.
Chaicunataca yallitami cuyarcani.
168Tucui ñuca causaitaca
canllatacmi yachangui.
Ima shina causanata
yachachishcatapish,
mandashcatapish
cazushpami causani.
Tav169Mandac Dioslla,
ñuca caparishpa mañashcaca
cambac ñaupaman chayashca cachun.
Can rimashca shina
alli yuyaicunata cuiyari.
170Ñuca mañashcaca cambac
ñaupaman chayashca cachun.
Can nishca shina quishpichiyari.
171Can quillcashpa
mandashcacunata yachachicpica,
cantaca mana shaicushpami alabasha.
172Tucui can mandashcacunaca
cashcata ruhuacmi.
Chaimantami ñuca calluca
chai mandashcacunata cantanga.
173Can mandashcacunata
cazungapacmi acllarcani.
Chaimanta cambac maquihuan
ayudac shamuiyari.
174Mandac Dioslla,
can quishpichichunmi shuyacuni.
Can mandashcacunahuanmi cushicuni.
175¡Ñuca almaca
canta alli nishpa causachun!
¡Can mandashcacunallatac
ñucataca ayudachun!
176Ñucaca chingarishca
oveja shinami purircani.
Ñuca can mandashcacunata
mana cungarishcamantaca,
canta servic ñucata mashcaiyari.
Who We AreWhat We EelieveWhat We Do
2025 by iamachristian.org,Inc All rights reserved.
