1 PEDRO 3 - Biblia Quichua Cañar 2010

Cusandi huarmindi ima shina causanamanta

1Shinallatac huarmicuna, cancunapac cusacunata alli cazuichic. Chashna cazucpimi, mana cric cusapish Dios rimashca shimita mana uyasha nicushpapish,

2cancuna cazushpa, allita ruhuacpica, cancuna mana huillacpipish cric tucungalla.

3Huarmicuna ama allichirishpa ñaccharishpa, curimanta ruhuashcacunata churarishpa, valishca churanacunata churarishpa, jahualla allichirichicchu.

4Chaipac randica cancunapac ucu shungumantatac allichirishpa, mana piñaric, alli shungu caichic. Chashna allichirishpami, Diospac ñaupapica huiñaita mai alli nishcacuna canguichic.

5Diospaclla causac ñaupa huarmicunaca Dios yuyailla causashpa, cusata cazushpami, chashna allichirishca shinata ricuchic carca.

6Sarapish paipac cusa Abrahamta cazushcamantaca, “ñucata mandac” nicmi carca. Cancunapish tucui imatapish allita ruhuashpa, imata mana manchashpaca, Sara huarmipac huahuacunami tucunguichic.

7Shinallatac cusacunapish, cancunapac quiquin huarmicunahuanca alli yuyaihuan causaichic. Huarmicunaca mana caricuna shina fuerzata charinchu. Chaimanta paicunataca sumacta pushashpa causaichic. Cusacunapish, huarmicunapish Dios cuyashcallamanta cusha nishca, huiñai causaita japichun cayashcacunami canguichic. Chashna causacpimi, Diosca cancuna mañashcataca uyanga.

Criccuna ima shina canamanta

8Ashtahuanpish cancunaca caishuc chaishuc-huan cuyanacushpa, llaquinacushpa, shuc shinalla yuyashpa, pihuanpish alli causaichic.

9Shuccuna mana allita ruhuacpipish, ama cancunapish chai shinallatac ruhuaichicchu. Camishpa rimacpipish, ama cancunapish camishpa rimaichicchu. Chaipac randica Dios allicunata cuchun nishpa munaichic. Diosca allicunata chasquichunmi, cancunataca cayarca.

10Dios quillcachishcapica:

«Maijanpish causaita cuyashpa,

unaicaman cushilla causasha nishpaca,

quiquin calluhuan

mana allita rimanamantapish,

quiquin shimihuan

llullanamantapish jarcarinami can.

11Millaimanta anchurishpa,

allita ruhuanami can.

Shuccunahuan sumacta causanata munashpa,

chashnalla catinami alli can.

12Mandac Diosca

cashcata ruhuaccunataca cuidanmi,

shinallatac mañashcata

uyangapacpish shuyaracunmi.

Ashtahuanpish mana allita

ruhuaccunataca piñanmi» ninmi.

13Cancuna allita ruhuana yuyailla cacpica, ¿pitac cancunataca mana allita ruhuangayari?

14Cancuna allita ruhuacushca jahua maijan llaquichicpica, cancunamanca mai cushicuimi canga. Cancunata piñaccunataca ama manchaichicchu, llaquillapish ama caichicchu.

15Chaipac randica “Cristoca ñucanchic Mandacmi” nishpa, cancunapac shungupi alli nichic. Cancuna imata japina cashcata shuyacushcamanta maijan tapucpipish, huillangapac allichirishca caichic.

16Cancuna Apunchic Jesusta crishpa, allita causacushcamanta maijanpish mana allichu nishpa, rimashcamanta pingachunca, mana pi juchanchishca canata yuyashpa, allita ruhuashpa catichic.

17Dios chai shina munacpica, mana allita ruhuashcamanta llaquita apanapac randica, allita ruhuashcamanta llaquita apanami ashtahuan alli.

18Cristoca ñucanchic juchacunamantami, ñucanchicta Diospacman pushangapac, manapish juchayuc cashpa, millaicunamanta llaquita apashpa shuc cutinlla huañurca. Paica aichallapimi huañurca. Shina cashpapish Dios causachicpimi, espiritupica huiñaita causacun.

19Paica chashna cashpami, huichcashca cac almacunaman huillangapac rirca.

20Chai almacunaca ñaupa taita Noé huambuc huasita ruhuangacaman, Dios manarac piñarishpa, shuyacui punzhacunapi mana cazuc gentecunami carca. Chai punzhacunaca pusaccunallami yacullapitac quishpirircacuna.

21Chai yacuca bautizarinatami ricuchicurca. Yacupi bautizarishpaca, Jesucristo huañushcacunapuramanta causarishcamantami, cunanca quishpirishca canchic. Bautizaricpica ima mapata mana anchuchinchu, ashtahuanpish mana alli yuyaicuna ama tiyachun Diosta mañana yuyaicunatami cun.

22Jesucristomi jahua pachaman rishpa, Diospac alli maquiman tiyacun. Paimi angelcunatapish, poderta charic mandac espiritucunatapish mandacun.