1Mandac Dioslla, can llaquic
cashcataca huiñaitami
cantacushalla.
Can nishcata pactachic cashcataca
huahua huahuamanmi huillasha.
2Ñucaca: «Canca alli rumicunahuan
huasichishca shina
huiñaita llaquicmi cangui.
Can cashcata nic cashcapish, jahua
pacha shina sinchimi» nircani.
3Can acllashca, canta servic
Davidhuan ari nishpaca:
4«Huiñaitami cambac huahuacunatapish
mandachun churasha.
Cambac jatun tiyarinapica paicunami
huahua huahuacunacaman tiyaringa»
nircanguimi.
5Mandac Dioslla, can sumaimanacunata
ruhuashcataca jahua pachapi caccunami
alli ningacuna.
Can cashcata nic cashcataca
cambaclla chicanyachishcacunami
alli ningacuna.
6¿Pitac jahua pachapica
can Mandac Dios-huanca
chimbapurai pudinyari?
Jahua pachapi causaccunapurapica,
¿pitac Mandac Dios shina
jatunca tiyangayari?
7Cambaclla tandanacushcapica
manchana Diosmi cangui.
Tucui cambac muyundipi tiyaccunapac
cumurina Diosmi cangui.
8Tucuita ruhuac Mandac Dioslla,
¿pitac can shinaca tiyanyari?
¡Canca tucuita mandacmi cangui!
Cashcata nic Diosmi cangui.
9Piñarishca mama cuchatapish
canmi mandangui.
Yacu jatarishpa huaj nicuctapish
canmi casillata ruhuangui.
10Canmi Rahab manchana
animaltaca macanacuipi
chugrichic shina llaquichircangui.
Canta piñaccunatapish
cambac tucuita ruhuac maquihuanmi
shic-huarcangui.
11Jahua pachapish,
cai pachapish cambacmi.
Canmi cai pachapi imalla
tiyaccunatapish ruhuarcangui.
12Jahuaman tiyaccunatapish, uraman
tiyaccunatapish canmi ruhuarcangui.
Tabor urcupish, Hermón urcupish
cambac shutitami cantangacuna.
13Cambac maquica tucuita ruhuac,
sinchi maquimi.
Cambac alli lado maquica
alli nishcami.
14Can mandashpa tiyarina callari
rumi shinaca cashcata ruhuana,
imatapish allita ruhuanami.
Cambac ñaupataca llaquina,
cashcata nina yuyaimi ricun.
15¡Canta caparishpa cantaccunaca
yallita cushicuchun!
Mandac Dioslla, cambac ñahuihuan
achicyachishcapimi puringacuna.
16Cambac shutimantami
punzhanta cushicungacuna.
Can cashcata ruhuac cashcamantami
jatunyachingacuna.
17Canmi sumaimanapish,
sinchiyachicpish cangui.
Can yallita cuyashpami ñucanchic
mandanataca sinchiyachingui.
18¡Mandac Diosca ñucanchic
jarcarina escudomi!
¡Ñucanchic Jatun Mandacca
israelcunapac jucha illac Diosmi!
19Cambaclla runacunaman
muscuipi shina ricurishpaca:
«Shuc sinchi runatami ayudarcani.
Ñuca acllashcapuramantami
shuc runata jatunyachircani.
20Ñucata servic Davidta japishpami,
ñucapaclla cachun aceitehuan
cahuircani.
21Tucuita ruhuac ñuca maquimi
tucui causaipi paihuan canga.
Ñuca rigrapish
paita sinchiyachingami.
22Paita piñacpish
mana paita llaquichingachu.
Mana allita ruhuaccunapish
mana mishangachu.
23Ashtahuanpish paita piñaccunataca
paipac ñaupapimi llaquichisha.
Paita millanayachiccunataca
chugrichishami.
24Ñucaca cashcata ruhuashpami
paitaca llaquicushalla.
Ñuca shutimantami paica
poderta charinga.
25Shinallatac paipac maquitaca
mama cuchata mandachunmi churasha.
Jatun yacucunatapish paipac
alli lado maquihuanmi mandanga.
26Pai ñucata mañashpaca:
“Canca ñuca taitami cangui.
Ñuca Diosmi cangui.
Ñuca miticuna quishpichic
jatun rumimi cangui” ningami.
27Ñucapish paitaca
punta churi cachunmi churasha.
Shinallatac cai pacha jatun
mandaccunapac jahuapimi churasha.
28Ñucaca paitaca huiñaitami
llaquicushalla.
Ñuca paihuan ari nishcataca
manatac paquishachu.
29Paipac huahua huahuacunataca
huiñaitami mandac cachun
churasha.
Pai mandashpa tiyarinapish
jahua pacha shinami
huiñaita canga.
30Shina cacpipish, paipac
huahua huahuacuna ñuca mandashcata
saquishpa, ñuca mandashcacuna
nishca shina mana causacpi,
31ñuca quillcashpa mandashcacunata
yangata ruhuacpi,
ñuca mandashcacunata mana cazucpica,
32chashna ñucata mana cazushpa,
millaita ruhuashcamantaca
varahuan azotishpami llaquichisha.
33Shina cacpipish, Davidta
llaquinataca manatac saquishachu.
Cashcata ninatapish
mana saquishachu.
34Paihuan ari nishcatapish
mana yangata ruhuashachu.
Ñuca nishcacunataca mana
nishcanichu nishpaca mana nishachu.
35Ñuca jucha illac cashcamantaca
shuc cutinllami ari nircani.
Davidmanca manatac llullashachu.
36Huiñaitami paipac
huahua huahuacunaca causanga.
Pai mandashpa tiyarinapish
ñuca ñaupapica inti shinami canga.
37Quilla shinami huiñaita
sinchi tiyacungalla.
Jahua pachapica mana llullashpa
huillac runa shinami tiyacun»
nircanguimi.
38Ashtahuanpish canllatacmi jatun
mandac cachun aceitehuan cahuishca
mandactaca yangapi churashcangui.
Canllatacmi paihuan piñarishcangui.
39Canta servic-huan ari nishcatapish
paquishcanguimi.
Paipac coronatapish sarushpami
yangapi churashcangui.
40Pueblo muyundi pircashcatapish
tuñishpami, sinchi torrecunatapish
urmachishcangui.
41Ñanta pasaccunaca tucuimi
shuhuashpa rincuna.
Cuchullapi causaccunapish
burlashpami asincuna.
42Paita piñaccunapac alli lado
maquitami sinchiyachishcangui.
Paita mana ricunayachiccunatami
cushichishcangui.
43Paipac espadataca filo
illactami ruhuashcangui.
Jatun macanacuipipish
mana ayudarcanguichu.
44Pai sumac cashcatapish
tucuchircanguimi.
Pai mandashpa tiyarinataca
pambatami shitarcangui.
45Huambrarac causana huatacunatapish
ashallayachishcanguimi.
Churanahuan pilluc shinami
pingaihuan pillushcangui.
46Mandac Dioslla, ¿ima horascamantac
caruyashpa ñahuita pacagringui?
¿Huiñaitachu ñucanchic-huanca
nina japiric shina piñarigringui?
47Ñuca causaica llandu shinalla
cashcataca yuyaringuiyari.
¿Imapactac aichayuc runapac
huahuacunataca ruhuarcanguiyari?
48¿Pi runata mana huañushpa
causacungalla?
¿Pitac Seolman rinamantaca
quishpiringa?
49Jatun Dioslla,
¿utcapi llaquinaca imatac tucurca?
Cashcata nic cashcamantami
Davidhuan ari ninacurcangui.
50Jatun Dioslla, canta servicta
burlashpa llaquichicucta ricuiyari.
Tauca gentecuna mana alli nishpa
rimashcataca ñuca
shungupimi charicuni.
51Mandac Dioslla, canta piñaccunami
ñucanchicta camincuna.
Jatun mandac cachun aceitahuan
cahuishca jatun mandactaca
punzhantami pingaichincuna.
52¡Mandac Diosca huiñaita
alli nishca cachun!
¡Chashna cachun, chashna cachun!
Who We AreWhat We EelieveWhat We Do
2025 by iamachristian.org,Inc All rights reserved.
