1Job cashcata ruhuac cashcamantami chai quimsa runacunaca Job rimashcataca mana cutichi pudircacuna.
2Chaimantami Buz llactamanta Rampac familiapura Beraquielpac churi Eliuca Jobhuan sinchita piñarirca. Diosmi cashcata ruhuac ninapac randica pai cashcata ruhuacmi cani nishcamantami chashnaca piñarirca.
3Jobta juchanchishpapish pai ima nishcata mana cutichi pudic paihuan apanacuc quimsa runacunahuanpish yallitami piñarirca.
4Eliuca quipa huiñai cashcamantami caishuc yuyac runacuna Jobhuan parlangacaman upalla shuyacurca.
5Shina cashpapish chai quimsa runacuna Job ima nishcata mana cutichi pudicta ricushpami paicunahuanca yallita piñarirca.
6Chaimantami Buz llactamanta Beraquielpac churi Eliuca:
«Ñucaca quipa huiñaimi cani.
Cancunaca yuyaccunami canguichic.
Chaimantami cancunata manchashpa
ñuca ima yuyacushcatapish manarac nircani.
7Ñucaca: “Tauca punzhacunata
chariccunami yallita rimanga,
unai huatata chariccunami
yachaccuna canga” yuyarcanimi.
8Runataca paipi tiyac
espiritumi yachachin.
Tucuita ruhuac Diospac samaimi
alli yuyaita cun.
9Mana unai huatacunata
chariccunallachu
alli yachaccuna can.
Mana yuyaccunallachu cashcata
ruhuactaca allita entendincuna.
10Chaimantami cancunataca:
“Ñucatapish uyaichic.
Ñucapish ñuca imalla yachashcatami
nigrini” nirca.
11Riquichic, ñucaca cancunarac
rimachunmi shuyarcani.
Cancuna rimashcataca
allitami uyarcani.
Cancuna rimangapac rimaicunata
mashcacuctapish ricurcanimi.
12Cancuna rimashcataca tucuitami
allita uyarcani.
Shina cacpipish cancunamanta
maijanpish Job pandaricushcata
mana ricuchi pudircanguichicchu.
Pai imata nicpipish,
imata mana cutichi pudircanguichicchu.
13Ama cancunallatac:
“Alli yachacmi canchic” nirichicchu.
Diosllami mishanga.
Runaca mana mishai pudinchu.
14Jobca ñucataca imata mana rimarcachu.
Ñucapish paitaca cancuna
yuyarishca shina mana rimashachu.
15Job, cai runacunaca mancharishpami
imata mana cutichi pudirca.
Paicunamantaca yuyaicuna chingarircami.
16¿Ñucaca paicuna imata mana rimashpa
upalla saquiricpica shuyacushallachu?
17Ñucapish imalla yachashcata,
imata yuyarishcata huillasha ninimi.
18Ñuca shungupi tauca
yuyaicunata charishpami,
yallita rimana munaihuan cani.
19Ñuca yuyaicunaca,
cunanlla ruhuashca vinota
mushuc capachupi churacpi,
yallita timbushpa, tucyacuc shinami.
20Imallatapish rimashpami cushilla casha.
Can ima nishcacunata cutichingapacmi
ñuca shimihuan rimasha.
21Ñucaca pitapish mana ñahuita
ricushpalla rimashachu.
Shinallatac pitapish
mana allimi cangui nishachu.
22Ñucaca pitapish allimi cangui
mana ninillachu.
Shina ruhuacpica, ñucata ruhuac Diosca
utcami llaquichinman.
Who We AreWhat We EelieveWhat We Do
2025 by iamachristian.org,Inc All rights reserved.
