1Israel llactata jatun mandac Joacazpac churi Joás ña ishcai huatata mandacucpimi, Judá llactata jatun mandac Joaspac churi Amasiasca Judá llactata mandai callarirca.
2Amasiasca ishcai chunga pichca huatata charishpami mandai callarirca. Paica ishcai chunga iscun huatatami Jerusalenpi mandarca. Paipac mamaca Jerusalenmanta Joadanmi carca.
3Amasiasca Mandac Diospac ñaupapica allitami ruhuashpa causarca. Shina cashpapish mana paipac ñaupa taita David shina ruhuashpami paipac taita Joás ruhuashca shinallatac tucuita ruhuarca.
4Chashna ruhuashpapish lomacunapi cac altarcunataca mana anchuchircachu. Chai altarcunapimi gentecunaca animalcunata cushpa, inciensotapish rupachishpa catirca.
5Amasías ña sinchita mandacushpaca, paipac taita jatun mandacta chugrichishpa huañuchic serviccunatami huañuchirca.
6Ashtahuanpish Moisés mandashpa, quillcashca shinallatacmi chai huañuchiccunapac churicunataca mana huañuchirca. Mandac Diosca Moisestaca: «Churicunapac juchacunamantaca mana taitacuna huañungachu. Shinallatac taitacunapac juchacunamantapish mana churicuna huañungachu. Ashtahuanpish maijan cashpapish quiquin juchamantami huañunga» nishpa mandarca.
7Amasiasca chunga huaranga edomitacunatami Cachi cucha pambapi huañuchirca. Chai macanacuipimi Sela pueblota quichushpa Jocteelta shutichirca. Chai puebloca cunancamanmi chai shutillatac can.
8Chai quipami Amasiasca Jehupac nieto Joacazpac churi Israel llactata jatun mandac Joaspacman huillaccunata cacharca. Paicunataca: «Shamui ñahui ñahui ricunacushun» nichunmi cacharca.
9Shina cachacpimi, Israel llactata jatun mandac Joasca Judá llactata jatun mandac Amasiastaca «Líbano urcupi tiyac uchilla casha yurami, Líbano urcullapitac tiyac cedro yurataca: “Cambac ushita ñuca churihuan cazarachingapac cui” nichun cacharca. Ashtahuanpish Líbano urcumanta sacha animal shamushpami, uchilla casha yurataca sarurca.
10Ari, chai shinallatac Edom llactapi causaccunataca misharcanguimi. Chaimantami cambac shungupi cari tucushca cangui. Chaimanta cushicucushpapish cambac huasillapitac tiyacui. Canpish, Judá llactapish llaqui tucunataca ¿imapactac mashcangui?» nichun cacharca.
11Ashtahuanpish Amasiasca mana uyasha nircachu. Chaimantami Israel llactata jatun mandac Joasca huichai rishpa, Judá llactata jatun mandac Amasias-huan Judá llacta Bet-semes pueblopi macanacungapac shayarirca.
12Judá gentecunaca israelcuna aticpimi, paicunapac quiquin carpa huasicunaman miticushpa callparca.
13Israel llactata jatun mandac Joasca chai Bet-semes pueblopimi Judá llactata jatun mandac Amasiasta prezu japirca. Amasiasca Joaspac churi, Ocoziaspac nietomi carca. Judá llactata jatun mandacca Jerusalenman shamushpami, Jerusalén pircata Efraín pungumantaca esquinapi tiyac pungucaman chuscu patsac metro anchota tigrachirca.
14Chashnallatac Mandac Diospac huasipi tiyac tucui curita, cullquita shinallatac tucui chai ucupi tiyashcacunata, jatun mandacpac huacaichinapi tiyac allicunatapish aparcami. Shinallatac jatun mandacpac maijan gentecunatapish prezushpami, Samaria puebloman cutimurca.
15Joaspac shuctac ruhuashcacunapish, imacunallata ruhuashcacunapish, Amasias-huan macanacushcapish, Israel llactata jatun mandaccuna imata ruhuashcata quillcashcapimi tiyacun.
16Joás huañushpa, paipac ñaupa taitacunahuan tandanacugricpica, Israel llactata jatun mandaccunata enterrashcallapitacmi Samaria pueblopi enterrarca. Paipac randica paipac churi Jeroboammi mandarca.
17Judá llactata jatun mandac Joaspac churi Amasiasca, Israel llactata jatun mandac Joacazpac churi Joás huañushcamanta pachaca chunga pichca huatatami causarca.
18Amasías shuctac ruhuashcacunaca Judá llactata jatun mandaccuna imata ruhuashcata quillcashcapimi tiyacun.
19Paita huañuchingapacmi Jerusalenpi pacalla parlanacurca. Chaimantami paica Laquis puebloman miticushpa rirca. Chai puebloman ricpipish, catishpa rishpami, chai pueblopi huañuchirca.
20Paitaca caballopi apachishpa rishpami, paipac ñaupa taitacunata enterrashca lado Jerusalenllapitac enterrarca. Chai puebloca Davidpac pueblomi carca.
21Chaimantami tucui Judá llactapi causaccunaca Amasiaspac randi paipac churi Azariasta jatun mandac cachun churarca. Azariasca chunga sucta huatatami charirca.
22Paipac taita jatun mandac huañushca quipaca Elat pueblota cutin shayachishpami, Judá llactaman curca.
Ishcainiqui Jeroboam mandashcamanta23Judá llactata jatun mandac Joaspac churi Amasías chunga pichca huatata mandacucpimi, Joaspac churi Jeroboamca Israel llactata mandai callarirca. Paica chuscu chunga shuc huatatami Samaria pueblopi mandarca.
24Mandac Diospac ñaupapica mana allitami ruhuarca. Nabatpac churi Jeroboam israelcunata juchata ruhuachishca shinallatacmi juchata ruhuashpa catirca.
25Israelcunata Mandac Dios paita servic Jonasman ima shina huillashca shinallatacmi Israel llacta punta linderotaca Hamat puebloman yaicuna ladomantaca Arabá mama cucha ladocaman cutin allichishpa japirca. Jonasca Gat-hefer pueblomanta Amitaipac churimi carca.
26Mandac Diosca israelcuna yalli llaquita causacuctami ricurca. Paicunata ayudangapacca servishpa causacpish, mana servishpa causacpish pipish mana tiyarcachu.
27Mandac Diosca israelcunapac shutitaca cai pachamanta mana anchuchisha nircachu. Chaimantami Joaspac churi Jeroboampac maquihuan quishpichirca.
28Jeroboampac shuctac ruhuashcacunapish, imacunallata ruhuashcacunapish, sinchi macanacushcapish, shinallatac Damasco pueblotapish, Hamat pueblotapish Israel llactaman cutichishcapish, Israel llactata jatun mandaccuna imata ruhuashcacunata quillcashcapimi tiyacun.
29Jeroboam huañucpica, Israel llactata jatun mandaccuna enterrashcallapitacmi enterrarca. Paipac randica paipac churi Zacariasmi mandarca.
Who We AreWhat We EelieveWhat We Do
2025 by iamachristian.org,Inc All rights reserved.
