JEREMÍAS 35 - Biblia Quichua Cañar 2010

Recabitacuna alli cazushcamanta

1Josiaspac churi jatun mandac Joacim Judá llactata mandacui punzhacunapi Mandac Dios Jeremiasta rimashpaca:

2«Ricabitacunapacman rishpa, paicunahuan parlashpa, ñuca huasipi tiyac shuc ucuman pushamushpa vinota ubiachingui» nirca.

3Shina nicpimi, ñucaca Jeremiaspac churi Habasiniaspac nieto Jazaniasta paipac huauquicunandi, paipac churicunandi, ricabitacunapac familiacunandi

4Mandac Diospac huasiman pushamurcani. Chaica, Diosta servic Hananpac churicunapac huasimi carca. Hananca Igdaliaspac churimi carca. Chai huasica mandaccunapac huasi ladopi, Diospac huasi pungupi cuidac Maasiaspac huasi jahua altopimi carca. Maasiasca Salumpac churimi carca.

5Chaiman pushashpami Rebecapac huahua huahuacunapac ñaupapi vino vasocunata, vino jarrocunata churashpaca: «Cai vinota ubiaichic» nircani.

6Shina nicpimi paicunaca: «Ñucanchicca vinotaca mana ubiashunchu. Chaica, Ricabpac churi ñucanchic ñaupa taita Jonadab ñucanchicta mandashpaca: “Cancunapish, cancunapac huahua huahuacunapish jaicapi ama vinota ubianguichicchu.

7Huasicunatapish ama shayachinguichicchu, muyucunatapish ama tarpunguichicchu, uvas chagratapish ama ruhuanguichicchu. Chaicunataca ama charinguichicchu. Ashtahuanpish cancuna causacuc llactapica unai huatacunata causangapacca tucui cancunami carpa huasicunallapi causana canguichic” nirca.

8Recabpac churi ñucanchic ñaupa taita Jonadab mandashcatami cazunchic. Pai mandashca shinallatacmi ñucanchic huarmicunapish, ñucanchic churicunapish, ushicunapish vinotaca mana ubianchic.

9Shinallatac ñucanchic causana huasicunatapish mana shayachinchicchu. Ñucanchic allpapica uvas chagracunatapish, ima tarpushcatapish mana charinchicchu.

10Chashnami ñucanchic ñaupa taita Jonadab tucui mandashcacunata cazushpa carpa huasicunallapi causanchic.

11Shina cashpapish, Babilonia llactata jatun mandac Nabucodonosor cai llactata llaquichingapac shamucpimi ñucanchicca: “Chai caldeo soldadocunamanta, Siria llacta soldadocunamanta Jerusalenpi miticungapac shamuichic” ningapacmi shamurcanchic. Shina shamushpami Jerusalenpi causacunchic» ninacurca.

12Mandac Dios Jeremiasta rimashpaca:

13«Israelcunapac tucuita Mandac Diosca: Judá llactapi, Jerusalenpi causaccunapacman rishpa: ¿Ima nishpatac ñuca yachachishcataca mana yachacunguichic? ¿Ima nishpatac ñuca mandashcacunataca mana cazunguichic? Chaitaca Mandac Dios ñucami nini.

14Recabpac churi Jonadab vinota ama ubiachun nicpica, allimi pactachincuna. Paicunapac ñaupa taita mandashcata cazushpami, vinota cunan punzhacaman mana ubiancuna. Shina cashpapish, ñuca cancunata punzhanta rimacucpipish manatac cazunguichicchu.

15Ñucata servic huillaccunata punzhanta cancunapacman cachashpa: “Tucui cancuna mana alli causaita saquishpa, ñucapacman cutirichic. Shuctac dioscunatapish ama servinguichicchu. Chashna causashpami cancunamanpish, cancunapac taitacunamanpish ñuca cushca cai llactapica causanguichic nishpa huillachicucpipish, cancunaca manatac uyarcanguichicchu, manatac cazurcanguichicchu.

16Recabpac churi Jonadab huahua huahuacunaca ñaupa taita mandashcataca tucuita cazushcacunami. Ashtahuanpish cai gentecunaca manatac cazuncunachu” ninmi ningui.

17Chaimantami israelcunapac tucuita Mandac Dios ñucaca: Judá llactapi causaccunapish, Jerusalenpi tucui causaccunapish ñuca rimashcata, ñuca cayashcataca mana uyarcacunachu. Chaimantami paicunata llaquichishami nishpa rimashca shinallatac llaquichigrini nini» ninmi.

18Shina cacpimi, Jeremiasca Recabpac huahua huahuacunataca: «Israelcunapac tucuita Mandac Diosca: “Cancunaca, cancunapac taita Jonadab mandashcataca tucuimi cazushcanguichic. Chashnami tucui pai mandashca shinallatac causashcanguichic.

19Chaimantami Recabpac churi Jonadabpac huahua huahuacunamantaca punzhanta ñucata servicca mana illanga. Chaitaca israelcunapac tucuita Mandac Dios ñucami nini” nishpa huillani» ninmi.