1 CRÓNICAS 16 - Biblia Quichua Cañar 2010

1Chashna apamushpami, Diospac Arcataca David ruhuashca carpa huasipi churana cashcapi churarcacuna. Chai quipaca Mandac Dios-huan alli tucungapacmi animalta huañuchishpa, shinallatac tucui rupachishpa Diospac ñaupapi curca.

2David Diosman cushpa tucuita rupachishca, shinallatac Dios-huan alli tucungapac animalta cushca quipaca, Mandac Diospac shutipimi tucui israelcunata bendiciarca.

3Chai quipaca tucui Israel caricunamanpish, huarmicunamanpish cada shucmanmi shuc tandata, asha aichata, shuc pasas tortata curca.

4Mandac Diospac Arca ñaupapimi israelcunapac Diosta servichun, pagui nishpa cantachun, Diosta servic levitapuramanta acllashpa churarca.

5Paicunata mandacca Asafmi carca. Quipa mandacca Zacariasmi carca. Paicunapac caticca Jeiel, Semiramot, Jehiel, Matatías, Eliab, Benaía, Obed-edommi, shinallatac Jeielmi mandacurca. Paicunaca salteriocunapi, arpacunapimi tocaccuna carca. Asafca platillocunapimi tocac carca.

6Shinallatac Benaía, Jahaziel curacunapish Dios ari nishca quillcata huacaichina Arca ñaupapimi punzhanta trompetapi tocaccuna carca.

David Diosta pagui nishcamanta(Sal 96.1-13; 105.1-15; 106.47-48)

7Chai punzhapi, David punta cutin Asaftapish, paipac aillucunatapish Mandac Diosta cantachun mandashpaca:

8«¡Mandac Diosta alli nichic!

¡Paipac shutita huillaichic!

¡Pai ima ruhuashcata,

gentecunaman huillaichic!

9¡Paiman Salmocunata cantaichic.

Pai tucui sumaimana,

ruhuashcacunata parlaichicyari!

10Paipac jucha illac shutipi

cushicuichicyari.

Mandac Diosta mashcaccunaca,

shungupi cushicuichicyari.

11Mandac Diosman cuchuyaichic.

Paipac poderta mashcaichic.

Paipac ñahuita punzhanta,

mashcaichicyari.

12Pai mancharina allicunata,

sumaimanacunata,

paipac shimihuan mandashpa

ruhuashcatapish yuyarichic.

13Diosta servic israelcunapac

huahua huahuacunapish,

pai acllashca Jacobopac

huahua huahuacunapish yuyarichic.

14Mandac Diosmi, ñucanchic Diosca.

Pai llaquichishcacunaca,

tucui cai pachapimi ricuricun.

15Pai ari nishcataca,

huiñaitami yuyaricun.

Huaranga huahua huahuacunaman,

pai rimashcataca mana cungarinchu.

16Abrahamhuan, Isaac-huan

ari nishcataca,

mana cungarinchu.

17Chaitaca mandashca cachunmi,

Jacoboman curca.

Israelmanca huiñaipacmi,

ari nirca.

18Paica: “Can japinataca

Canaán llactatami cusha” nircami.

19Paicuna mana achca cacpipish,

caru llactamanta shamushca,

ashallacuna shina cacpipish,

20llacta llacta puricucpipish,

Jatun llactamanta,

shuctac llactaman ricucpipish,

21paicunata pi llaquichichunca,

mana saquircachu.

Paicunata cuyashcamantami

jatun mandaccunata llaquichishpa,

22¡Ñuca acllashcacunataca,

ama tuparinguichicchu,

ñuca ima nishcata huillaccunataca,

ama llaquichinguichicchu!

23¡Tucui cai pachapi causaccuna,

Mandac Diosta cantaichic!

Pai quishpichic cashcataca

punzhanta huillacuichic.

24Pai sumaimana cashcataca,

tucui llactacunapi cantaichic.

Pai allicunata ruhuashcataca,

tucui gentecunaman huillaichic.

25Mandac Diosca jatunmi.

Jatunyachishca canatami can.

Ruhuashcalla dioscunata atishpa,

manchana Diosmi.

26Gentecunapac dioscunaca,

imapish mana cac yanga dioscunami.

Ashtahuanpish Mandac Diosmi

jahua pachacunataca ruhuarca.

27Paipac ñaupapica,

sumaimana achicllami tiyan.

Pai causanapica poderpish,

cushicuipish tiyanmi.

28Tucui llacta aillucuna,

Mandac Diosman cuichicyari.

Mandac Diosman sumac achic canata,

ima ruhuai pudinatapish cuichic.

29Mandac Diospac shutita,

sumacyachichic.

Paiman ofrendata apashpa,

paipac ñaupaman shamuichic.

Paipac jucha illac huasipi

cungurishpa alli nichic.

30¡Paipac ñaupapica, tucui cai

pachapi causaccuna chucchuchun!

Paimi cai pachataca maita mana

cuyuripacta ruhuarca.

31¡Jahua pachapish, cai pachapish

yallita cushicuichic!

Llactacunapica “Mandac Diosmi

mandacun” nishpa huillaichic.

32¡Mama cuchapish tucui,

chaipi tiyashcahuan caparichun!

¡Pambacunapish, chaipi tucui

tiyashcahuan cushicuchun!

33Mandac Diospac ñaupapica,

maipi tiyashca yuracuna caparichun.

Paica allpapi causaccunata,

mandangapacmi shamun.

34Mandac Diosta alli nichic,

Paica allimi can.

Paipac cuyaica huiñaipacmi can

35Cancunaca: “¡Ñucanchic

quishpichic Dioslla,

quishpichiyari!

Llactacunapi causaccunamanta,

tandashpa quishpichiyari.

Cambac jucha illac shutitaca,

huillashunmi.

Cantaca cantashpami,

cushichishun” nichicyari.

36¡Israelcunata Mandac Diosca,

huiñaita alli nishca cachun!» nirca.

Shina nicpimi, tucui gentecunaca: «¡Chashna cachun!» nishpa Mandac Diostaca alli nircacuna.

Dios-huan tupana carpa huasipi serviccunamanta

37Davidca Dios ari nishca quillcata huacaichina Arca ñaupapimi Asafta, paipac huauquicunata, chaipi punzhanta imata ruhuana cashcata ruhuachun saquirca.

38Shinallatac Obed-edomtapish, sucta chunga pusac paipac huauquicunahuanmi saquirca. Cutin Jedutunpac churi Obed-edomta, shinallatac Hosataca pungupi cuidachunmi saquirca.

39Sadoc curataca caishuc paipac huauqui curacunahuanmi Mandac Diospac huasipi Diosta servichun Gabaón lomapi tiyac altarpi saquirca.

40Israelcunata mandashpa, Mandac Dios quillcashcapi nishca shinallatacmi Mandac Diosman punzhanta animalcunata cushpa, huañuchichun, tucuita rupachina altarpi chishipish, tutamantapish animalcunata Diosman cushpa tucui rupachichun chaipi saquirca.

41Shinallatac mandac Diosta cantachunca Hemanta Jedutuntami caishuc acllashcacunahuan chaipi saquirirca. Mandac Diospac cuyaica huiñai huiñaita cashcamantami chaipi cantachun saquirca.

42Paicunahuanca Hemán, Jedutún runacunatami trompetapi, platillopi shuc tocanacunapipish tocashpa Diosta alli nichun saquirca. Jedutunpac churicunataca Diospac carpa huasi punguta cuidachunmi saquirca.

43Chai quipaca tucui gentecunami paicunapac quiquin huasiman rircacuna. Davidpish paipac huasi familiata bendiciangapacmi paipac huasiman cutimurca.