HEBREOS 13 - Biblia Quichua Cañar 2010

Criccuna ima shina causana cashcamanta

1Criccunaca, caishuc chaishuc cuyanacunguichic.

2Huasiman chayaccunata alli chasquinguichic. Maijancunaca pi cashcata mana yachashpa chasquishpami, angelcunata chasquishca carca.

3Cancunapish carcelpi cashca shinallatac, carcelpi caccunata yuyaringuichic. Llaquihuan caccunataca cancunapish llaquihuan cashca shina yuyaichic.

4Tucuimi cazado causaica, valishca cashcata yuyana can. Ama huainayaichicchu. Huainayaccunatapish, huaclliccunatapish Diosca taripashpa llaquichingami.

5Diosca: «Mana saquishachu, manatac cungarishachu» nishcami. Chaimanta cancunaca charishcallahuan cushi caichic. Ama chayucyana yuyailla caichicchu.

6Chaimantami tucui shunguhuan:

«Mandac Diosca ñucata ayudacmi.

Pipish ñucata

imata ruhuanamantaca

mana manchanichu» ni pudinchic.

7Diospac shimita huillashpa, cancunata pushaccunata yuyarichic. Paicuna causashcata ricushpa, paicuna shina crishpa causaichic.

8Jesucristoca sarunpish, cunanpish, huiñai huiñaipacpish Paillatacmi.

9Cancuna mana ricsishca shuctac doctrinacunata ama chasquinguichicchu. Imacunallata micuna, imacunallata mana micuna nishpa mandashcaca ima allita mana ruhuashcachu. Chaipac randica, Diospac cuyaita shungupi charishpa, sinchiyaichic.

10Ñucanchicca Diosman cushpa, rupachina shuc altartami charinchic. Chai altarmantaca, Dios-huan tupana huasipi servic curacunaca mana micui pudinchu.

11Chaica, jatun mandac cura juchacunamanta cushca animal yahuartaca Diospaclla chicanyachishca ucumanmi apan. Ashtahuanpish chaitaca chai huasimanta llucchishpami, carupi rupachin.

12Chashnallatacmi Jesuspish gentecunapac juchacunata anchuchingapacca, pueblomanta carupi paipac yahuarta jichashpa, llaquita apashpa huañurca.

13Chaimanta ñucanchicpish Jesús shinallatac pingai tucushpa, llaquita apangapac pueblomanta llucshishunchic.

14Cai pachapica huiñaita mana chingaric pueblotaca mana charinchicchu, ashtahuanpish shamuc punzhapacmi shuc pueblota mashcacunchic.

15¡Chaimantami Diostaca, Jesucristomanta huiñaita alabacunalla canchic! Chaimi Diosman cushca ofrenda shina can. ¡Chaimanta ñucanchic shimihuan Diospac shutita alli nicushunchic!

16Caishuc chaishuc ayudanacushpa, allita ruhuanataca amatac saquinguichicchu. Chaimi animalta Diosman cushpa rupachic shina can. Chaitami Diosca cushilla chasquin.

17Cancunata pushaccunata cazuichic. Diosca paicunatami cancunamanta tapunga. Chaimantami paicunaca mana samarishpa cancunataca ricuracun. Paicuna mana llaquirishpa, cushilla servichunca, paicunahuan alli caichic. Chaimi paicunamanca alli canga.

18Ñucanchicmanta Diosta mañaichic. Imapish alli cachunmi allita pushana yuyailla, pipacpish mana juchanchishca cashcata yachanchic.

19Ashtahuancarin ñuca cancunahuan cangapac utca cutichunca, Diosta mañaichic nini.

Ña tucuchingapac bendiciashcamanta

20Cushi causaita cuc Diosmi, ñucanchic Apunchic Jesustaca huañushcacunapuramanta causachirca. Paimi yahuarta jichashpa, Dios-huan huiñaipac ari nishcata pactachishpa, ñucanchic Jatun Michic tucurca.

21Chai Diosllatac pai munashca shina allicunata ruhuachichun, cancunata yachachichun, Jesucristomanta tucui ñucanchicta paipac allipac ruhuachichun. ¡Apunchic Jesusca huiñai huiñaita alli nishca, sumaimana nishca cachun! Chashna cachun.

Tucuchingapac allillachu cangui nishcamanta

22Cuyashca criccuna, cai ñuca asha quillcashcataca mana piñarishpa chasquichunmi mañani. Caitaca cancuna alli catichunmi quillcani.

23Ñucanchic huauqui Timoteo ña carcelmanta llucshishcata yachachunmi munani. Pai utca shamucpica, paihuanmi cancunata ricungapac risha.

24Tucui pushaccunatapish, Diospaclla cac criccunatapish saludanchicmi. Italia llactapi causac criccunapish saludancunami.

25Diospac sumaimana cuyai tucui cancunahuan cushca cachun ninchicmi.