2 SAMUEL 15 - Biblia Quichua Cañar 2010

Absalón Davidta llaquichingapac jatarishcamanta

1Chai quipami Absalonca macanacuna carretacunata, caballocunata randirca. Shinallatac paita cuidac pichca chunga soldadocunatapish tandachircami.

2Absalonca utca jatarishpami, puebloman yaicuna ñanpi shuyagrirca. Chaipimi maijan piñanacushpa, ima llaquihuan cashpa jatun mandacta allichichun mañac shamuccunataca: «¿Maijan pueblomantatac canguichic?» nishpa tapuc carca. Shina tapucpimi maijancunaca «Canta servic ñucaca Israel aillupuramantami cani» nic carca.

3Shina nicpimi Absalonca: «Canca allitami mañac shamungui. Shina cacpipish, jatun mandacpuramantaca mañashcata uyacca pipish mana tiyanchu» nic carca.

4Shinallatac Absalonca: «Ñuca juez cashpachari alli caiman. Ima piñanacushcata, ima llaquicunatapish allichichun mañac shamuccunataca cashcata ruhuashpami allichiman» nic nirca.

5Maijan chayarishpa, paipac ñaupapi cumuriccunataca maquita chutashpami ucllarishpa muchac carca.

6Ima piñanacushcatapish, ima llaquicunatapish allichichun jatun mandacman mañan shamuccunataca tucui israelcunatami chashna ruhuarca. Chashnami tucui israelcunapac cuyashca tucurca.

7Chuscu huata quipami Absalonca jatun mandactaca:

—Mandac Diosman cusha nishcata cungapac Hebrón puebloman richun saqui.

8Canta servic ñucaca Siria llacta Gesur pueblopi cashpami Mandac Diostaca: “Can Jerusalenman cutichicpica, canta servishami” nircani— nirca.

9Shina nicpimi jatun mandacca:

—Shinashpaca mana manchashpa rilla— nirca.

Shina nicpimi, Absalonca jatarishpa Hebrón puebloman rirca.

10Ashtahuanpish Absalonca chai punzhallatac tucui Israel aillucunapacman huillaicunata cachashpaca: «Corneta tocashca uyaricpica: “Cai Hebrón pueblopica Absalontami mandac cachun acllashca” nichun yachachinguichic» nirca.

11Absalonhuanca ishcai patsac gentecunatami Jerusalenmanta cayashpa aparirca. Paicunaca imata ruhuagricushcata mana yachashpami rirca.

12Absalonca Diosman animalta cushpa rupachicushpaca, Davidta cunaccunapuramanta Gilo pueblomanta Ahitofel yuyac runatami cayachun cacharca. Shinami Absalonca jatun mandac-huan piñanacushpa cariyangapac huashalla allichirirca. Absalonta caticcunapish ashtahuan miraricpimi, jatun mandacta llaquichinaca ashtahuan sinchiyarca.

David Jerusalenmanta miticushpa rishcamanta

13Shuc huillac runa Davidman huillangapac shamushpaca: «Israelcunaca tucuimi Absalonta cati callarincuna» nirca.

14Chaita uyashpami jatun mandac Davidca Jerusalenpi paita servic runacunataca:

—Cunanllatac miticungapac jacuchic. Absalontaca mana atishunchu, utca rishun. Mana utca ricpica, pacta ñucanchicta caipi japishpa jatun llaquita ruhuashpa, cai pueblopi causaccunata espadahuan tucuita huañuchinman— nirca.

15Shina nicpimi paicunaca:

—Ñucanchicca can jatun mandac ima nishcataca ruhuashunllami— nirca.

16Shina nishpami, paipac tucui familiacunahuan rirca. Paipac caishuc chunga huarmicunallatacmi mandana huasita cuidachun saquirca.

17Shina llucshishpaca, tucui paihuan riccunandimi jatun mandacca chai pueblo tucuri huasipi shayarirca.

18Chaipimi pai churashca tucui mandaccunaca paipac muyundipi shayarirca. Chaipica cereteocunapish, peleteocunapishmi carca. Gat pueblomanta paihuan shamushca sucta patsac geteocunami jatun mandacpac ñaupata rirca.

19Chaipimi jatun mandac Davidca geteocunapuramanta Itai runata cayashpaca:

—¿Imapactac canpish ñucanchic-huan shamungui? Canca shuctac llactamanta llucchishpa cachacpi, shamushcallami cangui. Chaimanta caishuc mandac-huan saquiringapac cutilla.

20Canca cainallami shamurcangui. ¿Ima shinatac cantaca ñucahuan jacu nishayari? Ñucapish maiman ricushcata mana yachanichu, ashtahuanpish cutishpa rilla. Cambac ricsishcacunatapish pushashpa ri. Mandac Dios canta maiman ricpipish pushachun— nirca.

21Shina nicpimi Itaica:

—¡Mandac Diosmantami nini! ¡Canta servic ñucaca maipi huañuna cacpipish, causana cacpipish, can jatun mandac-huanmi casha!— nirca.

22Shina nicpimi, Davidca Itaitaca:

—Shinashpaca ñucanchic-huan ringapac shamuilla— nirca.

Shina nicpimi, geteopuramanta Itaica jatun mandac Davidhuan shinallatac tucui paihuan caccunahuan rirca.

23Tucui gentecuna chaita pasacucpica, paicunaca munai caparishpami huacacurca. Chashnami jatun mandacca paihuan cac gentecunandi Cedrón yacuta pasashpa, shitashca pambaman rirca.

24Shinallatac chai ñantaca Sadocpish tucui levitacunandi Dios ari nishca quillcata huacaichina Arcata huandushcami rirca. Shina rishpami, tucui gentecuna Jerusalenmanta llucshingacaman pamballapi samachirca. Ña tucui gentecuna puebloman llucshishca quipami Abiatarpish llucshirca.

25Ashtahuanpish jatun mandacca Sadoc curataca:

—Diospac Arcataca Jerusalenllamantac cutichishpa apailla. Mandac Diospac ñaupapi ñuca alli ricuricpi, paillatac cutichimucpica, Arcatapish, Dios-huan tupana huasitapish ricushallami.

26Shina cacpipish: “Canca ñuca ñaupapi mana allichu cangui” nicpica, caipimi cani. Pai munashca shina imatapish ruhuachunlla— nirca.

27Shinallatac jatun mandacca Sadoc curataca:

—¿Manachu canca Dios ricuchishcata huillac cangui? Mana manchashpa cancunapac churicunahuan puebloman cutichiclla. Cambac churi Ahimaaspish, Abiatarpac churi Jonatanpish richiclla.

28Ñucaca shitashca pambapimi cancuna allita huillangacaman casha— nirca.

29Chashna nicpimi, Sadoc curapish, Abiatarpish Diospac Arcata Jerusalenman apashpa chaipi saquirirca.

30Davidca llaquillami umata quillparishpa, lluchu chaquilla huacashpa olivos yuracuna tiyac huichaita llucshirca. Shinallatac tucui paihuan caccunapish umata quillparishpa huacashpami huichai llucshirca.

31Shina ricucpimi Davidmanca: «Ahitofelpish Absalonhuan tucushpami llaquichingapac allichiricun» nishpa huillarca. Chaita uyashpami Davidca: «Mandac Dioslla, Ahitofel mana allita ruhuasha nicushcata ruhuachunca amatac saquinguichu, ashtahuanpish paitaca urmachingui» nishpa mañarca.

32David utcaman mañac cashca shinallatac urcupi Diosta mañacucpimi, arquitapuramanta Husaica churanapish lliquishca, umapish allpalla tupac shamurca.

33Shina shamucpimi Davidca:

—Can ñucahuan ricpica, ashtahuanmi ñucamanca llaqui canga.

34Ashtahuanpish Jerusalenllamantac cutishpa Absalontaca: “Cambac taitata servic cashca shinallatacmi cunanca canta servisha nini” ningui. Chashna nishpami Ahitofel ayudasha nicushcataca chingachingui.

35Sadoc curapish, Abiatar curapish chaipimi canga. Canca jatun mandac mandashpa tiyana huasipi imalla tucushcata yachashpaca, Sadoc shinallatac Abiatar curacunaman huillangui.

36Riqui, Sadoc curapac churi Ahimaaspish, Abiatarpac churi Jonatanpish chaillapitacmi cancuna. Paicunata can tucui ima uyashcataca huillachun cachangui— nirca.

37David chashna nicpimi, paihuan apanacuc Husaica Jerusalenman cutishpa rirca. Absalonpish chai puebloman chayarcami.