1Job cutin yuyarishpa rimashpaca:
2«¡Sarun quillacunapi
Dios ñucata cuidacushcaman
ñuca ima shina cashca
punzhacunaman maijan
cutichishpachari alli canman!
3Paipac achic-huan ñucata
achicyachicpimi, amsa cacpipish
mana manchashpa, puric carcani.
4Ñuca huambra cacpica,
chashnami carca.
Diosmi ñuca huasitaca
bendiciacurca.
5Tucuita ruhuac Dios
ñucahuan cacpica, ñuca
churicunapish ñuca ladopimi carca.
6Lecheca yallitami tiyac carca.
Aceiteca yacu shinami rumimanta
llucshic carca.
7Ñuca pueblo punguman
ima ruhuashcacunata
ricungapac ricpica, plazapimi
tiyarinata allichiccuna carca.
8Quipa huiñaicuna ñucata ricushpaca
ladomanmi cuchuyaccuna carca.
Yuyaccuna ricushpaca jatarishpami
shayariccuna carca.
9Mandaccunaca mana rimaricchu carca.
Maquihuanmi shimita
tapariccuna carca.
10Jatun mandaccunapish
paicunapac callu huataricpimi,
upalla saquiriccuna carca.
11Pipish ñucamanta uyashpaca:
“¡Allimi cangui!” nicmi carca.
Ñucata ricuccunaca
ñuca ima shina cashcatami
huillaccuna carca.
12Yarcaihuan capariccunamanca
ñucami cararcani.
Taita mama illaccunataca
ñucami ayudac carcani.
13Ña huañugricucca paita
ayudashcamantami ñucata bendiciarca.
Viuda huarmi huacacucpipish
cushichircanimi.
14Ñucaca churanata churaric shinami
cashcata ruhuashpa causarcani.
Chaimi ñucataca pilluchirca.
Ñucapac jahualla churana shinaca,
allita ruhuanami carca.
15Ñucaca ñahui mana ricucpacca
ñahui shinami carcani.
Suchupacca chaqui shinami carcani.
16Imata mana chariccunapacca
taita shinami carcani.
Imata mana yachaccunamantaca
ñucami rimac carca.
17Millaicunataca jazhatami
paquic carcani.
Imata quichushca cacpica,
quirumantami cacharichic carcani.
18Ñuca shungupica:
“Ñuca camallapitacmi huañusha.
Ñuca causai punzhacunaca,
tiyu shinami canga” yuyarcanimi.
19Ñuca sapica yacu cuchupi tiyac
yura shinami carca.
Ramacunapica achca shulla tiyaric
shinami carca.
20Ñucaca alli nishcami caticurcani.
Ñuca maquihuanmi arcotaca
sinchita charircani.
21Ñuca rimashcacunatapish,
cunashcacunatapish,
upallami uyaccuna carca.
22Ñuca rimacpica
pi mana cutichicchu carca.
Ñuca yuyaita cushcaca
paicunapac yuyaipica allimi carca.
23Usyai quillacunapi,
tamyata shuyac shinami,
ñuca rimashcataca
cushilla chasquiccuna carca.
24Paicunahuan ñuca asicpica,
mana crircacunachu.
Ñucaca jaicapi,
mana llaquilla ñahuichu carcani.
25Paicunataca ñucami
ima ruhuanapipish pushac carcani.
Paicunahuanca pushac shinami
tiyaric carcani.
Soldadocunata mandac shinami
paicunahuanca causarcani.
Huacaccunatapish cushichicmi carcani.
Who We AreWhat We EelieveWhat We Do
2025 by iamachristian.org,Inc All rights reserved.
