1Chai punzhacunapi Ezequías yallita ungushca cacpimi, Dios ima nishcata huillac Amozpac churi Dios ima nishcata huillac Isaías ricungapac rirca. Chashna rishpaca: «Mandac Diosca: “Canca mana causanguichu, huañugringuimi. Chaimanta cambac huasi ucupurata imata nina cashpaca utca nilla” ninmi» nirca.
2Shina nicpimi, Ezequiasca pirca ladoman tigrarishpa, Mandac Diosta mañashpaca:
3«Mandac Dioslla, cambac ñaupapi mana llullashpa, tucui shunguhuan canta cazushpa causashcatapish, cambac ñaupapi allita ruhuashpa causashcatapish yuyariyari» nishpami, yallita llaquirishpa huacarca.
4Mandac Diosca Isaiastaca:
5«Ezequiaspacman rishpa: “Ñaupa taita Davidta Mandac Diosca: Can mañashcata uyarcanimi. Cambac huiquitapish ricurcanimi. Riqui, can causana punzhacunataca chunga pichca huatatami mirachini.
6Cantapish, cai llactapi causaccunatapish Asiria llactata jatun mandacpac maquimanta quishpichishpa ayudashami.
7Mandac Dios ñucaca imata ruhuasha nishcata pactachingapacmi cai señalta ricuchini.
8Riqui, Acazpac reloj shina gradacunata chunga gradacunata pasashca cacpipish, ñucaca cutinmi huashaiman cutichisha” ninmi ningui» nirca. Chai quipaca intica chunga gradacunata pasashca cashpapish cutin huashaiman cutircami.
9Judá llactata jatun mandac Ezequías ungüimanta alliyashpa cantashpaca:
10«Ñucaca: “Ñuca causana
chaupi punzhacunapimi Seolman
rigrini.
Shuctac chaupi punzhacunataca
quichushcami” yuyarcanimi.
11Ñucaca: “Runacuna causana
cai pachapica Mandac Diostaca
mana ashtahuan ricushachu.
Cai pachapica shuc runallatapish
mana ashtahuan ricushachu.
12Ñuca causana huasipish
ovejata michina carpata shinami,
shuc ladoman anchuchirca.
Ahuac runa ahuashcata
pitic shinami, cai ungüihuan
ñuca causaica pitirin.
Punzha cashpa, tuta cashpapish
tucurigrinimi” yuyarcami.
13Punzhayangacamanmi
huacacurcanilla.
Shuc león micushpa,
tucui tullucunata
polvoc shinami nanachicungui.
Punzhapish, tutapish
nanaihuanmi tucuchicungui.
14Golondrina shina,
grulla animalcuna
huacac shinami huacacuni.
Paloma shinami llaquirishpa
huacacuni.
Ñuca ñahuihuanca huichai
ricucunillami.
Mandac Dioslla,
yalli llaquihuanmi cani.
Chaimanta ayudaiyari.
15Paillatac chashna
llaquichisha nishpa
llaquichicpica,
¿imatatac nishayari?
Chashnami ñuca shungupi
yallita llaquirishpa
causacushalla.
16Mandac Dioslla,
chai rimashcacunahuanmi
runacunaca causan.
Ñuca espiritupish chaipimi
causaita charin.
¡Mandac Dioslla, sinchiyachishpa,
causaita cuiyari!
17Riqui, ñucapac allipacllatami
chai llaquica japirca.
Shina cacpipish,
cuyashpami jutcupi ñuca
ismugrinamanta quishpichircangui.
Ñuca juchacunata
huashaiman shitac shina,
perdonashpami quishpichircangui.
18Seolpi caccunaca cantaca
mana pagui nincunachu.
Huañushcacunaca cantaca
mana alabancunachu.
Enterrana jutcuman riccunapish
can pactachinataca mana shuyanchu.
19¡Maijanpish causacushparacmi
cunan ñuca canta pagui nic shina,
pagui ninga!
Shuc taitaca causacushparacmi
can pactachinataca
paipac huahuacunaman huillanga.
20Mandac Diosmi quishpichinga.
Chaimantami punzhanta
tucui causaipi
Mandac Diospac huasipi
arpapi tocashpa,
paita cantacunchiclla»
nishpami quillcarca.
21Isaiasca Ezequías huañunalla cacpimi:
—Higota tacashpa nanacuc pushtupi churai. Chashna churacpica alliyangami— nishca carca.
22Shina nicpimi, Ezequiasca Isaiastaca:
—¿Imata ricushpatac Mandac Diospac huasiman rishayari?— nirca.
Who We AreWhat We EelieveWhat We Do
2025 by iamachristian.org,Inc All rights reserved.
