APOCALIPSIS 9 - Biblia Quichua Cañar 2010

1Pichcaniqui ángel tocacpica jahua pachamanta cai pachaman shuc lucero urmactami ricurcani. Chai luceromanca jatun jutcuta pascana llavetami curca.

2Chai jatun jutcuta pascacpica, jatun hornomanta shinami achca cushni llucshishpa intitapish, punzhatapish amsayachirca.

3Chai cushnimantaca langostacuna llucshishpami, tucui allpa jahuata purirca. Chai animalcunamanca alacrancuna shina millai cana podertami curca.

4Chashna cushpaca, allpapi tiyac quihuatapish, yuracunatapish, tucui imapish verdicllacunataca ama imata ruhuachunmi mandarca. Ashtahuanpish Diospac sellota frentepi mana charic gentecunatami llaquichichun cacharca.

5Shina cashpapish huañuchichunca mana cacharcachu, ashtahuanpish alacrán canishpa nanachic shina, pichca quillacaman llaquichichunmi cacharca.

6Chai punzhacunapica ima shinapish huañunatami gentecunaca yuyanga. Shina yuyacushpapish mana huañungacunachu. Paicuna huañuita munacucpipish, huañuica mana chayangachu.

7Chai langostacunaca macanacuiman ringapac allichirishca caballocuna shinami carca. Umacunapica curi coronacunata churashcami carca. Cutin ñahuicunaca gentecunapac ñahui shinami carca.

8Acchaca huarmicunapac accha shina, cutin quirucunaca leonpac quirucuna shinami carca.

9Churanaca fierro churana shina, alascunaca macanacuipi achca carretacunata caballocuna aisacpi huacac shinami huac nicurca.

10Chai langostacunaca alacrán shina chupacunapi tucsina agujacuna apashcami carca. Chai agujacunaca pichca quillacaman nanachicmi carca.

11Chaicunataca jatun jutcuta jatun mandac angelmi mandacurca. Chai angelca hebreo rimaipica Abadón, cutin griego rimaipica Apolión shutimi carca.

12Punta llaquica ña tucurinmi. Shina cashpapish ishcaica tiyanracmi.

13Suctaniqui ángel tocacpica, Diospac ñaupapi cac chuscu gachuyuc curi altarmanta shuc rimashca uyarishpami,

14cornetata charicuc suctaniqui angeltaca: «¡Eufrates yacu patapi huatashca chuscu angelcunata cachari!» nirca.

15Shina nicpimi chuscu angelcunata cacharishpaca, cai pachapi causac gentecunata quimsapi chaupishcamanta shuc parteta huañuchichun cacharca. Chai angelcunaca chai pacha, chai punzha, chai quilla, chai huata huañuchichun nishcatacmi carca.

16Chaimantaca: “Caballopi cac soldadocunaca ishcai pasac junumi can” nictami uyarcani.

17Ñucaca caballocunatapish, chaipi tiyacuccunatapish muscuipi shinami ricurcani. Chaicunaca zafiro shina azul, azufre shina quillu nina shina jagan nicuc fierrohuan pechota jarcarishcami carcacuna. Caballocunapac umaca leonpac uma shinami carca. Shimimantaca ninapish, cushnipish, azufrepish llucshicurcami.

18Chai ninahuan, cushnihuan, azufrehuan, quimsa jatun llaquicunahuanmi, cai pachapi causac quimsapi chaupishcamanta shuc parte gentecunata huañuchirca.

19Chai caballocunaca shimihuanpish, chupacunahuanpish llaquichircami. Chai chupacunaca culebrapac uma shinami carca. Chaicunahuanmi gentecunataca yallita llaquichirca.

20Cai llaquicunahuan llaquichicucpi mana huañuc gentecunaca, mana allita ruhuanataca mana saquircachu. Ashtahuanpish supaicunatapish, curimanta, cullquimanta, rumimanta, broncemanta, caspimanta ruhuashca mana uyac, mana ricuc, mana puric dioscunatami adorashpa catircacuna.

21Shinallatac huañuchinatapish, brujianatapish, huacllirinatapish, shuhuanatapish mana saquircacunachu.