1Mandac Dios Moisesta rimashpaca:
2«Madianitacuna israelcunata ima shinami llaquichirca, chashnallatac paicunatapish llaquichi. Chai quipami huañushpa, cambac taitacunahuan tandanacugringuimi» nirca.
3Shina nicpimi, Moisesca israelcunataca: «Jatun macanacuiman ringapac allichirichic. Mandac Dios ñucata madianitacuna llaquichishcamanta paicunatapish Madianpi llaquichichic.
4Israel aillucunamantaca cada aillumantami shuc huaranga macanacuiman cachana canguichic» nirca.
5Chashnami cada Israel aillumanta huaranga huaranga runacunata acllarca. Chunga ishcai huaranga israelcunami rirca.
6Shinami Moisesca cada aillumanta shuc huaranga macanacuc israelcunata macanacuiman cacharca. Eleazar curapac churi Fineasca macanacuipi tocangapacmi Diospaclla huasimanta vasocunatapish, trompetatapish apashpa rirca.
7Mandac Dios Moisesta mandashca shinami madianitacunahuan macanacushpaca tucui caricunata huañuchirca.
8Madianitacunahuan macanacushpaca, chai llactata pichca jatun mandaccuna Evita, Requemta, Zurta, Hurta, Rebatami huañuchirca. Shinallatac Beorpac churi Balaamtapish espadacunahuanmi huañuchirca.
9Chashna huañuchishpami israelcunaca madianita huarmicunatapish, huahuacunatapish prezu aparca. Paicunapac tucui animalcunatapish, huagracunatapish, imalla charishcacunatapish quichushpami aparca.
10Chai quipaca tucui Madián llactacunatapish, tucui carpa huasicunatapish ninata churashpami rupachirca.
11Quipaca macanacushpa quichushcacunatami gentecunatapish, animalcunatapish japirca.
12Shina japishpami Moisespacman, Eleazar curapacman, tandanacushca israelcunapacman apamurca. Israelcunaca prezu japishcacunata, macanacushpa quichushcacunataca Moab pambacunapi cac carpa huasicunamanmi apamurca. Chaica Jordán yacu lado Jericó chimba ladopimi carca.
13Chaipimi Moisespish, Eleazar curapish, tandanacushca israelcunata mandaccunapish tupangapac carpa huasicunamanta llucshirca.
14Moisés soldadocunata jatun mandaccunahuan, huaranga soldadocunata, patsac soldadocunata mandaccunahuan
15piñarishpaca:
—¿Ima nishpatac tucui huarmicunata mana huañuchircanguichic?
16¡Chai huarmicunaca Balaam yachachishcata uyashpami israelcunata pandachirca! ¡Chaimantami Mandac Diospaclla israelcunaca Baal-peor diosta adorashpa, Mandac Diosta piñachirca! ¡Chaimantami Mandac Diospac tandanacushca israelcunaca achca huañurca!
17Cunanca, tucui cari huahuacunata, carihuan chayarinacushca huarmicunata huañuchichic.
18Ashtahuanpish carihuan manarac chayarinacushca huarmicunataca ama huañuchinguichu— nirca.
19Shinallatac Moisesca:
—Cancunapuramanta maijanpish huañuchishca cashpa, maijanpish huañushcapi tuparishca cashpaca, canchis punzhatami carpa huasimanta canzhapi cana canguichic. Ña quimsa punzha tucucpi, shinallatac canchis punzha tucucpica cancunapish, cancuna prezu apamushcacunapish armarishpa, mapa illacmi saquiringa.
20Ima churanatapish, caramanta ruhuashca imallacunatapish, chivo millmamanta ruhuashca churanatapish, caspimanta ruhuashca ima charinacunatapish mapa illacta ruhuanguichic— nirca.
Macanacuipi quichushcacunata chaupinacushcamanta21Eleazar curaca jatun macanacuimanta shamuc macanacuc soldadocunataca:
«Mandac Diosca Moisestaca:
22“Ninapi mana rupac curitapish, cullquitapish, broncetapish, fierrotapish, estañotapish, plomo fierrotapish
23mapa illacta ruhuanguichic. Chai fierrocuna mana mapa illac tucucpica, yacuhuan mapa illacta ruhuanguichic. Ninapi churacpi, rupaipacllacunataca yacuhuan jahuashpa, mapa illacta ruhuanguichic.
24Canchis punzha tucucpica, cancunapac churanata tacshashpa, mapa illaclla tucunguichic. Chai quipami carpa huasimanca yaicui pudinguichic” ninmi ningui» nirca.
25Mandac Dios Moisesta rimashpaca:
26«Macanacushpa quichumushca gentecunatapish, animalcunatapish canhuan, Eleazar curahuan, tandanacushca israelcunahuan yupaichic.
27Chaicunataca jatun macanacuiman rishpa, macanacuccunaman, tandanacushca israelcunaman pacta pacta chaupichic.
28Jatun macanacuiman llucshishpa, sinchi soldadocuna macanacushpa quichushcacunataca ñucaman cunguichic. Chashnami gentecunatapish, huagracunatapish, burrocunatapish, ovejacunatapish, cada pichca patsacmanta shucta chicanyachishpa, Mandac Dios ñucaman cuna canguichic.
29Chaicunataca Mandac Diosman cuna cashcata shina Eleazar curaman cunguichic. Chai cushcaca Mandac Diosman alzashpa cushcami.
30Tandanacushca israelcunaman chaupishpa cushca gentecunatapish, huagracunatapish, burrocunatapish, ovejacunatapish, cada pichca chungamanta shucta japishpa, ñucahuan tupana huasita cuidac levitacunaman cunguichic» nirca.
31Shina nicpimi, Moises-huan Eleazar curahuanca ima shinami Mandac Dios Moisesta mandashca shinallatac ruhuarca.
32Macanacuipi quichushcacunataca ñami asha ashata macanacuc runacunaca japishca carca. Tucui chaicunaca sucta patsac canchis chunga pichca huaranga ovejami carca.
33Huagracunaca canchis chunga ishcai huarangami carca.
34Burrocunaca sucta chunga shuc huarangami carca.
35Carihuan manarac chayarishca solteracunaca quimsa chunga ishcai huarangami carca.
36Jatun macanacuiman llucshishca soldadocunaman cushca ovejacunaca quimsa patsac quimsa chunga canchis huaranga pichca patsacmi carca.
37Chaicunamanta Mandac Diosman impuestota cushca ovejacunaca sucta patsac canchis chunga pichcami carca.
38Cutin huagracunaca quimsa chunga sucta huarangami carca. Mandac Diosman impuestota cushca huagracunaca canchis chunga ishcaimi carca.
39Burrocunaca quimsa chunga huaranga pichca patsacmi carca. Mandac Diosman impuestota cushca burrocunaca sucta chunga shucmi curca.
40Gentecunaca chunga sucta huarangami carca. Mandac Diosman impuestota cushcaca gentecunaca quimsa chunga ishcaimi carca.
41Moisesca Mandac Dios mandashca shinallatacmi huichai alzashpa cushca ofrendataca Eleazar curaman curca.
42Moisesca macanacushpa quichushcataca chaupitami israelcunaman curca.
43Ovejacunaca quimsa patsac quimsa chunga canchis huaranga pichca patsacmi carca.
44Huagracunaca quimsa chunga suctami carca.
45Burrocunaca quimsa chunga huaranga pichca patsacmi carca.
46Gentecunaca chunga sucta huarangami carca.
47Moisesca israelcunaman chaupishpa cushca gentecunatapish, animalcunatapish cada pichca chungamantami shucta Mandac Dios-huan tupana huasita cuidac levitacunaman Mandac Dios mandashca shina curca.
48Soldadocunata jatun mandaccunapish, huaranga soldadota mandaccunapish, patsac soldadota mandaccunapish, Moisespacman
49cuchuyashpaca: «Canta servic ñucanchicmi tucui macanacuiman ric soldadocunata yuparcanchic. Shina yupacpica, ñucanchic soldadocunaca shucllapish mana illanchu.
50Chaimantami Mandac Diosman cungapac ñucanchicca curimanta ruhuashca collarcunata, sortejascunata, manillacunata, zarcillocunata, cadenacunata apamunchic. Caicunataca ñucanchic juchata Mandac Dios pichachunmi apamunchic» nirca.
51Curimanta ruhuashcacunata Moises-huan, Eleazarhuanmi chasquirca.
52Soldadocunata jatun mandaccuna, huaranga soldadota mandaccuna, patsac soldadota mandaccuna alzashpa Mandac Diosman cuchun apamushca curica chunga sucta huaranga canchis patsac pichca chunga siclosmi carca.
53Macanacuiman ric soldadocunaca tucui quichushcacunatami japirca.
54Huaranga soldadota mandaccuna, patsac soldadota mandaccuna apamushca curimanta ruhuashcacunataca Moises-huan Eleazar curahuanmi japishpami israelcuna yuyarichun Dios-huan tupana huasiman, Mandac Diospac ñaupaman aparca.
Who We AreWhat We EelieveWhat We Do
2025 by iamachristian.org,Inc All rights reserved.
