2 CRÓNICAS 34 - Biblia Quichua Cañar 2010

Josías Judá llactata mandashcamanta(2 R 22.1-2)

1Josiasca pusac huatata charishpami mandai callarirca. Paica quimsa chunga shuc huatatami Jerusalenpi mandarca.

2Paica ñaupa taita David shinallatacmi Mandac Diospac ñaupapica alli ladomanpish lluqui ladomanpish, mana ladoyashpa allita ruhuashpa causarca.

Josías tucuita allichishcamanta(2 R 23.4-20)

3Josiasca ña pusac huatata mandacushpa, huambrarac cashpami, paipac ñaupa taita Davidpac Mandac Diosta mashcai callarirca. Chunga ishcai huatata mandacushpami, lomacunapi tiyac altarcunata, Asera huarmi diosta yuyarina yurata, labrashpa ruhuashca dioscunata, yacuyachishpa ruhuashca dioscunata tucui anchuchishpa, Judá llactatapish, Jerusalentapish chuyayachirca.

4Paipac ñaupapimi Baal diospac altarcunataca tigrachirca. Patapi tiyac inciensota rupachina altarcunatapish, Asera huarmi diosta yuyarina yuratapish, labrashpa ruhuashca dioscunatapish, yacuyachishpa ruhuashca dioscunatapish paquishpami polvorca. Chai polvotaca chai dioscunaman animalta cushpa rupachiccunata enterrashca jahuapimi shitachun cacharca.

5Curacunapac tullucunataca paicunapac altarpimi rupachirca. Shinami Josiasca Judá llactatapish, Jerusalentapish chuyanllata ruhuarca.

6Shinallatac Manasespac, Efrainpac, Simeonpac llactacunapi tiyac pueblocunatapish, Neftalipac llacta pueblocamanmi chuyanllata ruhuarca. Chai pueblo muyundipi tiyac shitashca pushtucunatapish chashnallatacmi ruhuarca.

7Tucui altarcunatapish tigrachircami. Asera huarmi diosta yuyarina yuratapish, labrashpa ruhuashca dioscunatapish, ñuto polvotami ruhuarca. Israel llactapi tiyac inciensota rupachina altarcunatapish tucuimi polvorca. Chai quipami Jerusalenman cutirca.

Dios mandashca quillcata tarishcamanta(2 R 22.3—23.3)

8Josiasca chunga pusac huatata mandacushpa, chai llactatapish, Diospac huasitapish chuyanllata ruhuashca quipami, paita Mandac Diospac huasita allichichun, Azaliapac churi Safanta, mandac Maasiasta, Joacazpac churi quillcac Joata mandarca.

9Paicunaca Mandac Diospac huasiman apamushca cullquitami curacunata mandac Hilciasman cungapac shamurca. Chai cullquitaca Diospac huasita cuidac levitacunami Manasespac, Efrainpac aillumanta, maijan saquirishca israelcunamanta Judá llactapi, Benjamín llactapi, Jerusalén pueblopi causaccunamanta tandachishca carca.

10Chai cullquitaca Mandac Diospac huasita allichiccunata ricuccunamanmi curca. Paicunami Mandac Diospac huasita allichishpa, utcaman ima shina cashca shinallatac saquic runacunaman curca.

11Labrashca rumita, shayachina caspicunata, vigacunata randichunmi carpinterocunamanpish, allichiccunamanpish cullquita curca. Judá llactata mandaccuna urmachishca huasita allichichunmi, chai cullquitaca curca.

12Chai runacunami Diospac huasitaca allita ruhuarcacuna. Paicunata ricuccunaca levitapuramanta, Meraripac huahua huahuapuramanta Jahat, Abdías, shinallatac Cohatpac huahua huahuapuramanta Zacarías, Mesulammi carca. Tucui levitacunaca tocanata allita yachaccunami carca.

13Paicunallatacmi aparishpa trabajaccunatapish, chaipi tucui imata ruhuaccunatapish ricuc carca. Chai levitacunapurapica quillcaccuna, mandaccuna, Diospac huasi pungupi cuidaccunami tiyarca.

Dios mandashcata quillcashcata tarishcamanta

14Mandac Diospac huasiman apamushca cullquita Hilcías cura llucchicushpami, Dios mandashcata quillcashpa Moisesman cushca librota tarirca.

15Chai librota tarishpami, Hilciasca quillcac Safantaca:

—Ñucami Dios mandashpa quillcashca librota Mandac Diospac huasipi tarini— nirca.

Hilciasca Safanmanmi chai librotaca curca.

16Safán jatun mandacman chai librota cungapac rishpaca:

—Can jatun mandacta serviccunaca tucui can mandashcatami ruhuashca.

17Mandac Diospac huasipi tiyac cullquitaca chai huasita allichiccunata ricuccunaman, chaipi trabajaccunamanmi cushca— nirca.

18Shina nishca quipapish quillcac Safanca jatun mandactaca:

—Hilcías curami shuc librota curca— nirca.

Shina nishpami, Safanca jatun mandacpac ñaupapi rezarca.

19Chai mandashpa quillcashcata uyashpami, jatun mandacca paipac churanata lliquirirca.

20Chai quipaca Hilcías curatapish, Safanpac churi Ahicamtapish, Micaiapac churi Abdontapish, quillcac Safantapish, jatun mandacta servic Asaiastapish mandashpaca:

21—Tarishca libropi ñucamantapish, Israel llactapi, Judá llactapi saquirishca gentecunamantapish ima nicushcata yachangapac Mandac Diosta tapugrichic. Ñucanchic ñaupa taitacuna cai libropi quillcashca shina ruhuashpa, Mandac Dios rimashcacunata mana cazushcamantami Mandac Diosca ñucanchic-huan yallita piñarishpa, ñucanchicta llaquichigricun— nirca.

22Shina nicpimi, Hilciaspish, jatun mandacpac caishuc runacunapish Dios ima nishcata huillac Hulda huarmipacman rirca. Paica curacunapac churanacunata cuidac Salumpac huarmimi carca. Salumca Ticvapac churimi carca. Huldaca Jerusalenpi tiyac quipata ruhuashca uchilla pueblopimi causarca. Chai huarmimanmi chai nishcacunataca huillarca.

23Shina huillacpimi chai huarmica:

—Israelcunata Mandac Diosca: “Ñucata tapuchun cachac runataca,

24ñucami jatun mandacpac ñaupapi rezashca libropi tucui nicushca shinaca cai llactatapish, cai llactapi causaccunatapish llaquichigrini.

25Paicunaca ñucata cungarishpa, shuctac dioscunaman inciensota rupachishcami. Paicunapac maquihuan mana allita ruhuashpami ñucataca yallita piñachishca. Chaimantami cai llactapi causaccunataca nina japiric shina piñarishpa llaquichigrini. Chai llaquichinataca mana jarcarishachu” ninmi.

26Ashtahuanpish Mandac Diosta tapuchun cachashca, Judá llactata jatun mandactaca: “Can chai libropi ima nicushcata uyashcamantaca israelcunata Mandac Diosca:

27‘Cai llactatapish, cai llactapi causaccunatapish ñuca llaquichigricushcata uyashpaca, cambac shungupi nanarishpa, ñuca ñaupapi llaquirishpa cumurircanguimi. Shina llaquirishpaca, cambac churanatapish lliquishpami, ñuca ñaupapi huacarcangui. Chashna llaquirishcataca ñucapish uyarcanimi.

28Riquichic, ñucami cantaca cambac ñaupa taitacunahuan tandachisha. Canca ima llaquitapish mana apashpami samaringui. Canca cai llactata, cai llactapi causaccunata ñuca llaquichictaca mana ricunguichu’ ninmi” nigrichic— nirca.

Chai runacunaca tucuimi jatun mandacman huillarcacuna.

29Chaita huillacpimi, jatun mandacca Judá llactamantapish, Jerusalenmantapish tucui pushac yuyaccunata tandachirca.

30Chai quipami jatun mandacca tucui Judá llactapi, Jerusalenpi causaccunahuan, curacunahuan, levitacunahuan, shinallatac uchillacunahuanpish yuyaccunahuanpish, tucui gentecunahuan Mandac Diospac huasiman rirca. Chaipimi Dios-huan ari ninacushpa quillcashca libropi tucuipac ñaupapi rezarca. Chai librotaca Mandac Diospac huasipimi tarishca carca.

31Jatun mandacca pai shayarinallapitac shayarishpami, Mandac Diosta catingapac, pai mandashcacunata cazungapac, pai yachachishcacunata, rimashpa quillcashcacunata cazungapac, Dios nishca libropi tucui ima nicushcata tucui shunguhuan, tucui almahuan pactachingapac Diospac ñaupapi ari nirca.

32Shinallatac Jerusalenpi causaccunatapish, Benjamín llactapi causaccunatapish, cazungapacmi ari nichirca. Shinami Jerusalenpi causaccunaca, paicunapac ñaupa taitacunapac Mandac Dios-huan ari nishca shinallatac ruhuarcacuna.

33Josiasca israelcunapac llactataca chuyanllatami ruhuarca. Chashna ruhuashpami Israel llactapi tucui causaccunataca paicunata Mandac Diosta servichun mandarca. Josiasca paipac tucui causaipimi ñaupa taitacunata Mandac Diosmantaca mana anchurishpa, paillata catishpa causarca.