1Shuc punzhami Rutpac suegra Noemica:
—Ñuca huahualla, can alli causachunca, ¿manachu canman cusata mashcana cani?
2Canca Boozpac servic huarmicunahuanmi carcangui. ¿Boozca manachu ñucanchic familia? Riqui, paica cunan tutami cebadata huairachingapac ringa.
3Armarishpa mishquilla ashnacuc-huan cahuirishpa alli churanacunata churarishpa trillana pambaman ringui. Ashtahuanpish pai micungacaman, tucui ubiangacaman paipac ñaupapica ama ricuringuichu.
4Pai sueñungapac siriricpica, pai maipi siririctapish alli ricushpa, chaiman rishpa chaquinic pulluta alzachishpa siriringui. Can imata ruhuanataca paillatac ningallami— nirca.
5Shina nicpimi Rutca:
—Can nishca shina tucuita ruhuashallami— nirca.
6Rut trillana pambaman rishpaca paipac suegra nishca shinami tucuita ruhuarca.
7Micushpa, ubiashpaca cushillami Boozca grano montón ladoman sueñungapac rirca. Chaipi sueñucucpimi, Rutca allilla chayashpa chaquinic pulluta alzachishpa siririrca.
8Chaupi tutata Booz shuc ladoman muyurishpaca chaquipi shuc huarmi siricucta sintishpami mancharirca.
9Chaipimi Boozca:
—¿Pitac cangui?— nirca.
Shina tapucpimi Rutca:
—Canta servic Rutmi cani. Can cuchulla familiapura cashcamantaca canta servic ñucataca jahualla cambac churanahuanpish catachiyari— nirca.
10Shina nicpimi Boozca:
—Ñuca huahualla, cantaca Mandac Dios bendiciachun. Cunan can ruhuashpaca puntapi ruhuashcata yallimi allita ruhuashcangui. Mosocunataca charictapish, mana charictapish mana mashcangapac rishcanguichu.
11Cunanca ñuca huahualla, ama manchaichu. Imata can mañacpipish ñucaca ruhuashallami. Ñuca llactapi causaccunapish, cantaca alli huarmi cashcatami yachancuna.
12Ari, cambac familiami cani. Shina cacpipish, ñucatapish yalli ashtahuan cuchulla familiami tiyan.
13Cunan tutaca caipi pacarilla. Caya punzha pai ayudasha nishpaca ayudangami. Pai mana nicpica, Mandac Diospish ricucunmi. Canta ayudangapac ari nishami. Cunanca pacaringacaman samarilla— nirca.
14Shina nicpimi, Rutca pacaringacaman paipac chaquinicllapi sueñurca. Boozca: «Trillana pambaman shuc huarmi shamushcata pipish ama yachachun» nishcami carca. Chaimantami cayandi tutamantaca pipish ama ricsichun manarac alli achicyacpi rirca.
15Shinallatac Boozca:
—Jahualla can churana pañota ricuchishpa alli charingui— nirca.
Chai pañota Rut ricuchicpica, sucta taza cebadatami churarca. Chaita apashpami pai causana puebloman cutirca.
16Ña paipac suegrapacman chayacpica:
—¿Ñuca huahualla, imatatac nirca?— nishpami tapurca.
Rutca chai runaca imata paimanta ruhuashcatapish, tucuimi huillarca.
17Shina huillashpaca:
—Shinallatac: “Cambac suegrapacmanca ama chushac maquilla cutichu” nishpami cai sucta taza cebadata curca— nirca.
18Shina nicpimi Noemica:
—Ñuca huahualla, cunanca ima tucungacaman shuyailla. Chai runaca, pai nishcata cunanllatac allichingapac mana samaringachu— nirca.
Who We AreWhat We EelieveWhat We Do
2025 by iamachristian.org,Inc All rights reserved.
