MARCOS 13 - Biblia Quichua Cañar 2010

Diosta mañana huasi urmanamanta(Mt 24.1-2; Lc 21.5-6)

1Diosta mañana huasimanta Jesús llucshicucpimi, paipac yachacuccunamanta shucca:

—Yachachic, ¡cai sumac rumicunata, cai jatun huasicunata riquiyari!— nirca.

2Chashna nicpimi Jesusca:

—¿Cai jatun huasicunallata ricushpachu mana mancharicungui? Caipica shuc rumillapish mana saquiringachu, tucuimi urmachishca canga— nirca.

Cai pacha tucurinallaquicuna tiyanamanta(Mt 24.3-28; Lc 21.7-24; 17.22-24)

3Jesusca Diosta mañana huasi chimbapura Olivos urcupimi tiyarirca. Chaipi Jesús tiyacucpimi, Pedropish, Jacobopish, Juanpish, Andrespish Jesuspacman cuchuyashpa, paillata tapushpaca:

4—Can huillashcaca, ¿ima punzhatac pactangayari? Chashna tucugricuctaca, ¿imata ricushpatac yachashun?— nirca.

5Shina nicpimi Jesusca:

—Cuidaringuichic, pacta pi pandachinman.

6Achcacunami ñuca shutipi shamushpa: “Ñucami Cristoca cani” nishpa, achcacunata pandachinga.

7Cancunaca “macanacuimi tiyagrin, ñami macanacucun” nicpipish ama mancharinguichicchu. Chai llaquicunaca tiyangallatacmi. Chashna tucucpipish, cai pachaca manarac tucuringachu.

8Shuc llactaca, shuctac llactahuan, jatun mandacca shuctac jatun mandac-huanmi macanacunga. Tauca llactacunapimi allpa chucchuipish, yarcaipish tiyangami. Chai llaquicunaca callari llaquicunallami canga.

9Cancunaca alli cuidaringuichic. Cancunataca mandaccunapacman apangami. Tandanacuna huasicunapipish azotingami. Ñucata caticushcamantami mandaccunapacmanpish, jatun mandaccunapacmanpish apangami. Chashna apacpica, paicunaman ñucamanta huillanguichicmi.

10Cai pacha manarac tucuricpimi, cai alli huillaica tucui llactacunapi huillashca canga.

11Mandaccunapacman cancunata pushacpica, “¿imatatac nishun?” nishpa, ama manchailla canguichicchu. Cancuna rimai callaricpica, Diosmi rimana yuyaita cunga. Mana cancunapac yuyaimantachu rimanguichic, ashtahuanpish Diospac Espiritumi rimana yuyaitaca cunga.

12Huauquica, quiquin huauquita, taitaca quiquin churitami huañuchichun japichinga. Churicunaca taita mamata piñashpami huañuchichinga.

13Ñucamantami tucuipac piñashca canguichic. Chashna piñacpipish, tucuringacaman llaquita apacca quishpiringami.

14Diosta mañana huasipi yallita millana tucuchic tiyacucta ricushpaca, Judea llactapi causaccunaca urcucunapi miticugrichun. (Maijanpish cai quillcashcata ricucca, alli entendinguichic).

15Maijanpish huasi jahuapi caccunaca, ama uricuchun, ucumanta imata apangapacllapish ama uricuchun.

16Chagrapi caccunaca, churanata apangapac ama huasiman cutichun.

17Chai punzhacunapi huicsayuc huarmicunapish, chuchuchicuc huarmicunapish, ¡aij, imachari tucunga!

18Chai punzhacuna ama tamya cachun, Diosta mañaichic.

19Chai punzhacunaca mancharina llaquimi canga. Chashna llaquicunaca Dios cai pachata ruhuashca punzhamanta cunancaman mana tiyashcachu. Quipa punzhapipish mana tiyangachu.

20Chai llaqui punzhacunata Dios mana ashata chaupicpica, pipish mana causai pudinmanchu. Ashtahuanpish Diosca pai acllashcacunata cuyashcamantami, chai llaqui punzhacunataca chaupisha nishca.

21Maijanpish: “¡Riquichic, Cristoca caipimi, chaipimi!” nicucpipish ama cringuichicchu.

22Chai llulla cristocuna, llullac huillaccunami ricuringa. Chaicunaca pandachingapacmi milagrocunatapish, pi mana ricushcacunatapish ruhuashpa ricuchinga. Chashnami Dios acllashcacunatapish pandachisha ninga.

23Chaimanta cancunaca cuidaringuichic. Tucui chaicunataca ñaupamanmi cancunamanca huillani.

Apunchic Jesucristo cutin shamunamanta(Mt 24.29-36,42-44; Lc 21.25-36)

24Chai mancharina llaqui punzhacuna tiyashca quipaca, intipish amsayangami, quillapish mana achicyachingachu.

25Lucerocunapish jahuamanta urmangami. Jahua cielopi tiyac jatuncunapish chucchungami.

26Chashna tucucpica, Runa Tucungapac shamushca ñucatami poderhuan, sumaimana achiclla cashcahuan puyupi achicyachishpa shamucucta ricungacuna.

27Chaimantaca ñuca angelcunatami ñuca acllashcacunata tucui pacha muyundimanta tandachichun cachasha.

28Higo yura ima tucucta ricushpa, yuyaita japichic. Chai yurapi panga huiñashpa cutin jundarimucta ricushpaca, usyai punzhacuna chayamucuctami yachanguichic.

29Shinallatac cai ñuca huillashcacuna pactamucucta ricushpaca, Runa Tucungapac shamushca cutimuna pungullapi cashcata yachanguichic.

30Cunan punzha causaccuna manarac huañucpimi, cai ñuca huillashcacunaca pactanga. Chaica chashnatacmi canga.

31Jahua pachapish, cai pachapish tucuringami. Ashtahuanpish ñuca huillashcacunaca pactacungallami.

32Shina cacpipish ima punzha, ima horas ñuca cutimuna cashcataca pi mana yachanchu. Jahua pacha angelcunapish mana yachanchu. Ñuca Diospac Churi cashpapish mana yachanichu, ashtahuanpish ñuca Taitallami yachan.

33Ñuca ima horas cutimunata mana yachashcamantaca, alli yuyaihuan riccharishca shina Diosta mañashpa chaparacuichic.

34Caica shuc amo caru llactaman rishpa, paita serviccuna imacunallata ruhuachun mandashpa saquic shinami. Huasita cuidactaca pungupi chaparachunmi mandashpa saquin.

35Cancunapish Huasiyuc ima horas cutimunata mana yachashcamantaca, alli yuyaihuan riccharishca shina chaparacuichic. Paica tutayamuctachari, chaupi tutatachari, gallo cantai horastachari, mana cashpaca pacarinatachari cutimunga.

36Pacta cungailla chayamushpa, cancunataca sueñucucta japinman.

37Cancunata nishpaca, tucui mashnatami ‘chaparacuichic’ nini— nirca.