1 SAMUEL 16 - Biblia Quichua Cañar 2010

Samuel Davidta jatun mandac cachunaceitehuan cahuishcamanta

1Mandac Dios Samueltaca:

—¿Saulmantaca ima horascamantac huacacugringui? Paitaca ñucami israelcunata jatun mandac cachun mana munarcani. Gachupi aceiteta jundachi. Ñucami Belén pueblopi causacuc Isaipacman cachagrini. Paipac churicunamantami shuctac jatun mandac cachun acllarcani— nirca.

2Shina nicpimi Samuelca:

—¿Ima shinatac rishayari? Ñuca rishcata Saúl yachashpaca huañuchingami— nirca.

Shina nicpimi, Mandac Diosca:

—Huagracunamanta shuc becita apashpa: “Mandac Diosman cushpa rupachingapacmi shamurcani” ningui.

3Chaita rupachingapacca Isaitapish cayangui. Chaipimi can ima ruhuana cashcataca huillasha. Maijantami ñuca ricuchini, paita aceitehuan cahuingui— nirca.

4Samuelca Mandac Dios mandashca shinami ruhuarca. Belén puebloman pai ña chayacpica, chai pueblopi causac pushac yuyaccunaca manchaihuanmi tupangapac llucshirca. Chashna llucshishpaca:

—¿Canca cushi causaita huillangapacchu shamurcangui?— nishpa tapurca.

5Shina tapucpi Samuelca:

—Ari, ñucaca Mandac Diosman cushpa, rupachingapacmi shamuni. Cancunapish Diospaclla tucushpa Diosman cushpa rupachingapac ñucahuan jacu— nirca.

Chai quipaca Isaitapish, paipac churicunatapish chuyayachishpami Diosman cushpa rupachingapac jacu nirca.

6Paicuna ña chayacpimi, Samuelca Eliabta ricushpaca: «¡Mandac Diosca cai runatami jatun mandac cachun acllashca canga!» nishpa yuyacurca.

7Shina yuyacucpipish, Mandac Diosca Samueltaca:

—Ama pai sumac cashcallata, jatun cashcallata ricuichu. Paitaca mana acllarcanichu. Ñucaca gentecuna shinaca mana ricunichu. Paicunaca jahuallatami ricun, ashtahuanpish Ñucaca shungutami ricuni— nirca.

8Shinami Isaica caishuc churi Abinadabta Samuelpac ñaupaman cayarca. Shina cayacpimi Samuelca:

—Mandac Diosca paitapish mana acllashcachu— nirca.

9Chai quipami Isaica caishuc churi Samata Samuelpac ñaupaman cayarca. Shina cayacpimi Samuelca:

—Mandac Diosca paitapish mana acllashcachu— nirca.

10Shinami Isaica paipac canchis churicunata Samuelpac ñaupaman cayarca. Ashtahuanpish Samuelca Isaitaca:

—Mandac Diosca paicunatapish mana acllashcachu— nirca.

11Chai quipami Samuelca Isaitaca:

—¿Cambac churicunaca caicunallachu?— nishpa tapurca.

Shina tapucpi Isaica:

—Shuc quipa churi tiyanmi. Paica ovejacunata michicmi— nirca.

Shina nicpimi, Samuelca Isaitaca:

—Paita pushamuchun cachai. Pai caiman chayamungacaman mana micungapac tiyarishunchu— nirca.

12Shina nicpimi, cayachun cachashca ña chayamucpica, ucuman yaicuchirca. Chai churica puca accha alaja ñahui sumac huambrami carca. Pai chayamucpimi, Mandac Diosca Samueltaca:

—¡Paimi jatun mandac tucugrin. Jatarishpa paipac umata aceitehuan cahui!— nirca.

13Shina nicpi, Samuelca aceitehuan cac gachuta japishpa, Davidtaca paipac huauquicuna ricucucpi aceitehuan umata cahuirca. Chai punzhamanta pachami Mandac Diospac Espirituca Davidpacman shamurca. Chai quipaca Samuelca Ramá pueblomanmi cutirca.

Davidca Saulta servi callarishcamanta

14Mandac Diospac Espirituca Saulmanta anchurircami. Mandac Dios cachashca mana alli espiritumi Saultaca llaquichicurca.

15Shina cacpimi, Saulta serviccunaca:

—Riqui, Dios cachashca mana alli espiritumi cantaca llaquichicun.

16Ñucanchicta mandaclla, cambac ñaupapi cac canta serviccunata arpapi tocanata yachacta mashcachun cachai. Dios cachashca mana alli espíritu cambacman shamucpi, pai tuparicpica, canca alli tucunguimi— nirca.

17Shina nicpimi, Saulca paita serviccunataca:

—Shina cashpaca, maijanpish alli tocanata yachacta mashcagrichic— nirca.

18Shina nicpimi, servicpuramanta shucca:

—Ricui, ñucami Belén pueblopi causac alli tocanata yachac Isaipac shuc churita ricsini. Paica imatapish mana manchac sinchi, allita yuyarishpa rimac sumac huambrami. Shinallatac Mandac Diospish paihuanmi— nirca.

19Shina nicpimi, Saulca huillaccunata Isaipacman cachashpaca: «Ovejacunata michic cambac churi Davidta cachai» nichun cacharca.

20Shina nicpi, Isaica shuc burropi tandata apachishpa, cara puñu vinota shinallatac huahua chivota apashpa paipac churi Davidtaca Saulpacman cacharca.

21Saulpacman David chayashpaca paita servicmi tucurca. Saulca Davidta mai cuyashpami paipac escudota apachun churarca.

22Saúl Isaipacman cachashpaca: «Davidtaca ñucahuan causachun saqui. Paica ñuca ñaupapica allimi ricurishca» nichunmi cacharca.

23Mandac Dios cachashca mana alli espíritu Saulta japicpica, Davidmi arpapi tocac carca. Shina tocacpica, Saulca cushillami tucuc carca. Chaimantami Saulta llaquichic mana alli espirituca anchuric carca.