ESDRAS 8 - Biblia Quichua Cañar 2010

Pushaccuna Esdras-huan shamushcamanta

1Artajerjes mandacui punzhacunapi Babilonia llactamanta ñucahuan cutimuc ñaupa taitacunapac huasi ucupurata mandaccunaca:

2Fineespac huahua huahuapuramantaca Gersón, Itamarpac huahua huahuapuramantaca Daniel, Davidpac huahua huahuapuramantaca Hatusmi shamurca.

3Secaniaspac, Parospac huahua huahuapuramantaca Zacariasmi patsac pichca chunga runacunahuan shamurca.

4Pahat-moabpac huahua huahuapuramantaca Zeraiaspac churi Elioenaimi ishcai patsac runacunahuan shamurca.

5Secaniaspac huahua huahuapuramantaca Jahazielpac churimi quimsa patsac runacunahuan shamurca.

6Adinpac huahua huahuapuramantaca Jonatanpac churi Ebedmi pichca chunga runacunahuan shamurca.

7Elampac huahua huahuapuramantaca Ataliaspac churi Jesaiasmi canchis chunga runacunahuan shamurca.

8Sefatiaspac huahua huahuapuramantaca Micaelpac churi Zebadiasmi pusac chunga runacunahuan shamurca.

9Joabpac huahua huahuapuramantaca Jehielpac churi Obadiasmi ishcai patsac chunga pusac runacunahuan shamurca.

10Selomitpac huahua huahuapuramantaca Josifiaspac churimi patsac sucta chunga runacunahuan shamurca.

11Bebaipac huahua huahuapuramantaca Bebaipac churi Zacariasmi ishcai chunga pusac runacunahuan shamurca.

12Azgadpac huahua huahuapuramantaca Hacatanpac churi Johananmi patsac chunga runacunahuan shamurca.

13Adonicampac huahua huahuapuramantaca Elifelet, Jeiel, Semaiasmi sucta chunga runacunahuan quipata shamurca.

14Bigvaipac huahua huahuapuramantaca Utai, Zabudmi canchis chunga runacunahuan shamurca.

Jerusalenman ringapac allichirishcamanta

15Ñucahuan shamuccunataca Ahava pueblota pasacuc yacu ladopi tandachishpami carpacunata shayachishpa, quimsa punzhata chaipi carcanchic. Chaipica israelpurapipish, curacunapurapipish levitacunata mashcashpaca mana tarircanichu.

16Chaimantami pushac Eliezerta, Arielta, Semaiasta, Elnatanta, Jaribta, Elnatanta, Natanta Zacariasta, Mesulamta, shinallatac yachachic Joiaribta, Elnatanta tandachircani.

17Paicunataca Casifia llactata mandac Iddopacman cacharcani. Idopacman, Diospac huasipi serviccunapacman cachashpaca Diospacta ruhuaccunata ñucanchic Diospac huasiman pushamuchunmi imata ninatapish yachachishpa, Casifia pushtuman cacharcani.

18Ñucanchicta ayudac Dios ayudacpimi, shuc alli yachac runata pushamurca. Paica Israelpac churi Levipac nieto Mahlipac huahuapuramanta Serebías levitami carca. Paipac churicunandi, huauquicunandica chunga pusacmi shamurca.

19Shinallatac Meraripac huahua huahuapuramantaca Hasabiastapish, Jesaiastapish pushamurcami. Paicunapac churicunandi, huauquicunandica ishcai chungami carca.

20Shinallatac Davidpish, shuctac mandaccunapish, Diospac huasipi levitacunata ayudaccuna cachun churashcapuramantapish ishcai patsac ishcai chunga runacunatami pushamurca. Paicunataca tucuitami shutipi cayashpa churarca.

21Chai quipaca Ahava jatun yacu ladopi cashpami ñucanchictapish, ñucanchic huahuacunatapish, ñucanchic ima charishcacunatapish, ñanpi alli pushachun nishpa mana micushpa, llaquirishpa ñucanchic Diosta mañangapac yuyarircani.

22Utcapi ñucanchicca jatun mandactaca: «Ñucanchic Diosca paita tucui shunguhuan caticcunataca imamantapish cuidanmi. Ashtahuanpish paimanta caruyaccunataca yallita piñashpa, paipac poderhuan llaquichinmi» nircanchic. Chaimantami ñucanchicta ñanpi cuidachun soldadocunata, caballopi ric soldadocunata jatun mandacman mañanataca pinganayarca.

23Ñucanchicca mana micushpami alli pushachun nishpa mañarcanchic. Chai mañashcata uyashpami, ñucanchicta alli pushamurca.

24Chai quipaca curacunata mandac chunga ishcai curatami acllarcani. Chai acllashcacunaca Serebías, Hasabiasmi paicunapac chunga huauquicunahuan carca.

25Paicunapac ñaupapimi jatun mandacpish, paita cunaccunapish, caishuc mandaccunapish, chai llactapi causac tucui israelcunapish ñucanchic Diospac huasiman cushca cullquita, curita, Diospac huasipi ima charishcacunatapish pezashpa curcani.

26Paicunapac maquipica sucta patsac pichca chunga talento cullquita, patsac talento cullquimanta ruhuashca ima charishcacunata, patsac talento curitami pezashpa churarcani.

27Chaipac jahuapish curimanta ruhuashca, huaranga dracmata pezac ishcai chunga jatun vasocunatami curcani. Shinallatac broncemanta ruhuashca sumac, alaja curi shina ishcai uchilla vasotami curcani.

28Chai quipaca: «Cancunaca Mandac Diospaclla chicanyachishcami canguichic. Diospac huasipi ima tiyashcacunapish, cullquipish, curipish, ñucanchic ñaupa taitacunata Mandac Diosman quiquin munaihuan cushcacunapish Diospaclla chicanyachishcami.

29Caicunataca curacunata, levitacunata mandaccunapac, Jerusalenpi causac israelcunapac ñaupa taitacunapac huasi ucupuracunata mandaccunapac ñaupapi pezangacaman Diospac huasi ucupi alli cuidanguichic» nircani.

30Shina nicpimi, curacunapish, levitacunapish Jerusalenpi cac ñucanchic Diospac huasiman apamungapac ñuca pezashpa cushca cullquita, curita, shuc ima charishcacunatapish japircacuna.

31Huata callari chunga ishcai punzhapimi Ahava jatun yacu ladomanta Jerusalenman ringapac llucshi callarircanchic. Chai ñantaca ñucanchic Diosmi ñucanchicta piñaccunamantapish, ñanpi chapac shuhuaccunamantapish cuidashpa pushamurca.

32Jerusalenman chayamushpaca, quimsa punzhatami chaipi samarircanchic.

33Chuscu punzha quipami ñucanchic apamushca cullquita, curita, imalla shuctac charishcacunataca ñucanchic Diospac huasipi pezashpa Uriaspac churi Meremot curaman curcanchic. Paihuanca Finees curapac churi Eleazar curapish, levitapuramanta Jesuapac churi Jozabadpish, Binuipac churi Noadiaspishmi carca.

34Chai punzhallatacmi chaicunataca tucui yupashpa, pezashpa mashna cashcata quillcashpa, curcanchic.

35Chai quipami prezu apashcamanta cutimushca gentecunaca israelcunapac Diosman animalcunata cushpa tucuimanta rupachirca. Paicunaca chunga ishcai becita, iscun chunga sucta cari ovejata, canchis chunga canchis maltón ovejata, chunga ishcai cari chivota, juchamanta Mandac Diosman cushcacunatapish tucui rupachirca.

36Chai quipami jatun mandac Artajerjes quillcashcata jatun yacu chimba lado llactata mandac sátrapas nishca mandaccunaman, soldadocunata mandaccunamanpish curcacuna. Paicunami israelcunatapish, Diospac huasita allichichunpish ayudarcacuna.