2 SAMUEL 7 - Biblia Quichua Cañar 2010

Mandac Dios Davidman ari nishcamanta(1 Cr 17.1-27)

1Jatun mandac David paipac mandanapi causacucpica, Mandac Diosmi tucui muyundi piñaccunamanta huacaichishpa samachirca.

2Chaimantami Davidca Diosmanta huillac Natantaca:

—Riqui, ñucaca cedromanta ruhuashca sumac huasipimi causacuni. Ashtahuanpish Diospac Arcaca carpa huasillapimi tiyacun— nirca.

3Shina nicpimi Natanca:

—Mandac Diosca canhuanmi. Can imata yuyacushcataca ruhuailla— nirca.

4Mandac Dios chai tuta Natanta cayashpaca:

5«Ñucata servic Davidpacman rishpa: “Mandac Diosca: ¿Ñuca causana huasitaca ruhuanguichu?

6Ñuca Egiptomanta israelcunata llucchimushca punzhamanta cunancamanmi jaicapi ñuca huasipica mana causashcani. Ashtahuanpish yangalla carpa huasillapi, jatun carpa huasillapimi causarcani.

7Ñucaca israelcunahuan maita purishpapish israelcunata pushaccunataca: ‘¿Ñuca causangapac cedromanta huasita ruhuachun nishcanichu?’ nishpa tapurcani.

8Shina cashcamanta ñucata servic Davidtaca: ‘Tucuita Mandac Diosca: Ñucami cantaca ovejacunata michishpa puricucpi, ñuca israelcunata mandac cachun acllarcani.

9Ñucaca can maita ricpipish, canhuanmi carcani. Canta piñaccunatapish tucuitami cambac ñaupamanta chingachircani. Shina ruhuashpami, cai pacha mandaccunapuramanta tucuita yalli jatun cachun ruhuarcani.

10Shinallatac ñuca acllashca israelcuna causachunmi shuc llactata acllashpa, tarpushca shina causachun cusha. Chaipimi paicunaca callari punzhapi llaquichishca shina mana pipish llaquichishca causanga.

11Ñuca acllashca israelcunata mandachun juezcunata churashca punzhamanta pachami paicunataca llaquichirca. Tucui canta piñaccunamantami samachisha.

Shinallatac Mandac Dios ñucami can causana huasita ruhuasha.

12Can ña unaita causashpa cambac taitacunahuan enterrashca cacpica, cambac huahuacunamantami shucta acllashpa cambac mandanapi churashpa, can mandanataca allichisha.

13Paimi ñuca huasitaca shayachinga. Paimanca huiñaita mandanatami cusha.

14Ñucaca paipac taitami casha. Paica ñuca churimi canga. Pai mana allita ruhuacpica, shuc taita churita varahuan llaquichic shinami llaquichisha. Huañuna aichayuc runacuna shinami llaquichisha.

15Shina ruhuashpapish, llaquicushallami. Saulta llaquichishca shinaca mana saquishachu. Saultaca cambac ñaupallapitacmi chingachircani.

16Cambac huasi ucupurapish, can mandanapish jaicapi mana tucuringachu. Shinallatac can mandashpa tiyanaca huiñaitami caticungalla’ ninmi” ningui» nirca.

17Natanca tucui uyashcacunataca muscuipi ricurishca shinallatacmi Davidman huillarca.

18Chashna huillacpi, David Mandac Diospac ñaupaman yaicushpaca: «Mandac Dioslla, ñucapish, ñuca huasi ucupurapish, ¿ima cacpitac caiman cayachircangui?

19Jatun Mandac Dioslla, chaita ruhuashami nishca jahuapish quipaman canta servic ñucapish, ñuca huasi ucupuracunapish ima shina canamantapish huillashcanguimi. Mandac Dioslla, can shinaca, ¿pi gentecuna ruhuangachu?

20Mandac Dioslla, canta servic ñucataca canllatac ricsinguimi. Chaimanta, ¿imatatac ashtahuan nishayari?

21Cai tucui sumaccunataca can munashca shina, can yuyashca shina ruhuashpami, canllatac ñucamanca huillashcangui.

22Chaimanta Mandac Dioslla, canca mai alli nishcami cangui. Ñucanchic ringrihuantac uyashca shina, ¿pi shuctac Diostac tiyanyari?

23Shinallatac can acllashca Israel llacta shinaca, ¿maijan llactatac cai pachapica tiyanyari? Cai llactataca paicunaman allita ruhuashpa, tucuiman ricsichingapacmi huatashca shina causacucmanta cacharichircangui. Canca llactapi causaccunatapish, chaipi tiyac dioscunatapish llucchishpa cachashpaca, jatun mancharinacunata ruhuashpami Egiptomanta cambaclla cachun llucchimurcangui.

24Can acllashca israelcunataca huiñaita cambaclla causachunmi churashcangui. Mandac Dios chashna ruhuashpami, paicunapac Dios tucurcangui.

25Cunanca Mandac Dioslla, canta servic ñucamanpish, ñuca huasi ucupuramanpish imata ruhuasha nishcataca can munashca shina huiñaipac ruhuailla.

26Cambac shutica huiñaita alli nishca cachun. Shinallatac: “Israelcunapac Diosca tucuita Mandac Diosmi” nichuncuna. Canta servic ñuca huasi ucupuracunapish sinchi cachun.

27Israelcunapac tucuita Mandac Dios canllatacmi canta servic ñucataca: “Cambac huahuacunatami mandac cachun churasha” nircangui. Chaimantami canta servic ñucaca cambac ñaupapi cashna mañangapac sinchicushcani.

28Cunanca, Mandac Dioslla, canca Diostacmi cangui. Canca ima pactana cashcatami ningui. Chaitami canta servic ñucamanca huillashcangui.

29Cunanca, canta servic ñuca huasi ucupuracunaca cambac ñaupapi huiñaita causachun bendiciaiyari. Can Mandac Diosllatacmi shina nishcangui. Shina cashcamanta can bendiciacpica, ñuca huasi ucupurapish huiñaitami bendiciashca canga» nirca.