1Quimsa punzha tucucpimi, Esterca jatun mandac huarmi churanata churarishpa mandana huasi pungu pambaman yaicushpa shayarirca. Chai pungu pambaca jatun mandac tiyarina chimbapurapimi carca.
2Jatun mandacca pungu pambapi Ester shayacucta ricushpaca cushicurcami. Chaimantami paipac maquipi charicuc curi varata Esterpac ladoman ricuchicpi Esterca paipacman cuchuyashpa, chai curi varapi tuparirca.
3Chaipimi jatun mandacca:
—Jatun mandac Esterlla, ¿imatac tucurcangui? ¿Imatatac mañac shamungui? ¡Ñuca mandacuc llactamanta chaupitapish cushallami!— nirca.
4Shina nicpimi Esterca:
—Can jatun mandacman alli cacpica, ñuca canman ruhuashca jatun micuiman jatun mandacpish, Amanpish shamuichic— nirca.
5Shina nicpimi, jatun mandacca:
—Ester ima nishcata ruhuangapac Amanta utca cayamugrichic— nirca.
Ña pushamucpimi, jatun mandacca Ester ruhuashca jatun micuiman Amanhuan rirca.
6Chaipi vinota ubiashpa tiyacushpami jatun mandacca Estertaca:
—¿Imatatac mañasha ningui? ¡Can mañacpica, ñuca mandacuc llactamanta chaupitapish cushallami!— nirca.
7Shina nicpimi Esterca:
—Ñuca munashpa mañashcaca:
8Can jatun mandacpac ñaupapi alli ricuricpi, ñuca mañashcata ruhuasha nishpaca can jatun mandacman ñuca cutin ruhuashca jatun micuiman can jatun mandacpish, Amanpish cutin shamunguichic. Cayami can jatun mandac mandashca shinallatac huillasha— nirca.
Amán Mardoqueota huañuchinata yuyarishcamanta9Chai punzhapica Amanca paipac shungupi yallita cushicushpami llucshirca. Shina cashpapish mandana huasi pungupi Mardoqueo tiyacushpa paita mana cunguricpi, mana cumuricpimi Amanca yallita piñarirca.
10Shina cashpapish Amanca mana piñarishca shinami paipac huasiman chayashpa paipac ricsishcacunatapish, paipac huarmi Zerestapish cayachun cacharca.
11Chashna cayachun cachashpami Amanca achcata charic cashcatapish, achca churicunata charishcatapish paicunaman parlarca. Shinallatac paita tucui serviccunamanta tucui mandaccunamanta ashtahuan alli nishca cachun churashcatapish parlarca.
12Shinallatac Amanca:
—Jatun mandac Esterpish jatun micuiman jatun mandacta cayashpaca pi shuccunataca mana cayashpami, ñucallatac cayarca. Shinallatac jatun mandac Esterca cayapish jatun mandac-huan shamuchun cayarcami.
13Chashna cacpipish mandana huasi pungupi Judá llactamanta Mardoqueo tiyacucta ricushpaca, manatac cushillachu cani— nirca.
14Shina nicpimi, paipac huarmi Zerespish, paipac ricsishcacunapish Amantaca:
—Sipingapac ishcai chunga ishcai metro caspita shayachichun mandai. Chai caspipi Mardoqueota sipingapac cayaca jatun mandacman huillai. Chai quipaca jatun mandac-huan chai jatun micuiman cushilla ringuillami— nircacuna.
Chai yuyai alli cacpimi, Amanca chai sipina caspita shayachichun mandarca.
Who We AreWhat We EelieveWhat We Do
2025 by iamachristian.org,Inc All rights reserved.
