PROVERBIOS 6 - Biblia Quichua Cañar 2010

Garante tucuna mana alli cashcamanta

1Ñuca huahualla,

can maijanpac garante tucushpaca

mana ricsishca runapac randimi

debiyuc tucushcangui.

2Chaita ruhuashca cashpaca,

cambac shimillahuantacmi

pandarishcangui.

Cambac rimashcallahuantacmi,

tucllapi japi tucushca shina

saquiringui.

3Ñuca huahualla, chashna cambac

ricsishca runapac maquipi

urmashpa llaqui tucushcamanta

cachariringapacca caita ruhuai:

Paipacman rishpa,

paipac ñaupapi cumurishpa

allichichun mañai.

4Ama sueñuichu, cambac ñahui

sueñunayachichunca ama saquichu.

5Shinallatac tarugata huañuchicpac

maquimanta cachariric shina,

utca cachariri.

Linchimanta urpi llucshishpa ric shina

utca cachariri.

6Quilla runacunalla,

hormigata ricui.

Hormiga imata ruhuacta ricushpa,

yachaisapa caiyari.

7Hormigaca mandactapish, mayoraltapish,

amotapish mana charinchu.

8Shina cashpapish usyai quillacunapi,

cosechana punzhacunapimi

micunata tandashpa huacaichincuna.

9Quilla runalla,

¿ima horascamantac siricugringui?

¿Ima horastac riccharigringui?

10Ashtahuan sueñushpa, samarishpa,

maquicunata cruzashpa siricunguilla.

11Chashna siricucpimi,

huaccha punzhacunaca

ñanta puric runa shina shamunga.

Shinallatac imapish illac punzhacunaca

macashpa shuhuac runa shinami shamunga.

12Millaita ruhuac mana pingac runaca

mana allillata rimashpami purin.

13Chai runaca ñahuita quimllac,

chaquita cuyuchishpa,

maqui dedohuan señata ruhuacmi can.

14Paipac shungupica mana allita

ruhuana yuyaimi tiyan.

Tucui causaipimi ima llaquita ruhuanallata,

piñanacuipi churanallata yuyarishpa purin.

15Chaimantami cungailla

jatun llaquica japinga.

Shuc ñahui quimllaillapimi chingaringa.

Paica imata mana ruhuai pudingachu.

16Mandac Diosca

cai sucta juchatami piñan.

Canchisniqui juchatacarin

yallitami millanayachin:

17Jatun tucushpa puricta, llulla calluta,

mana faltayuc runata huañuchishpa

yahuarta jichacta,

18shungupi millaillata ruhuanata yuyacta,

mana allita ruhuangapac callpacta,

19manapish yachashpa llullashpa huillacta

shinallatac huauquindipura piñanacuipi

churactami yallita piñan.

Huainayac huarmita rimashcamanta

20Ñuca huahualla,

cambac taita mandashcata pactachingui.

Cambac mama yachachishcata

ama cungaringuichu.

21Chaicunataca cambac shungupi

huacaichishpa puringui.

Cungapi huallcata

churarishca shina puringui.

22Chaicunaca can maita

ricpipish allitami pushanga.

Can sueñucucpipish cuidangami.

Riccharicpipish cambac yuyaipimi

rimacunga.

23Chai mandashcaca lámpara shinami.

Yachachishcaca luz shinami,

cunashpa rimashcacunaca

causaiman apac ñan shinami.

24Chaicunaca,

mana alli huarmimanta jarcangami.

Shucpac huarmi mishquilla

rimashcamantapish anchuchingami.

25Chai huarmi sumac cacpipish,

ama shungupi munanguichu.

Paipac sumac ñahuihuan cambac

shunguta shuhuachunpish

ama saquinguichu.

26Cullquimanta huainayac huarmihuan

puric runaca,

pitishca tanda shinami saquiringa.

Cusayuc huarmihuan puric runaca

paipac valishca causaitami chingachin.

27Shuc runa ninata micllashpa charicucpica,

¿paipac churanacunaca manachu rupanga?

28¿Runaca mana rupashpa nina jahuata

puringachu?

29Maijanpish shucpac huarmihuan

purishpaca chashnallatacmi tucun.

Maijanpish chashna chayarishpaca,

llaquita apangatacmi.

30Maijanpish yarcaimanta micunata

shuhuashpa micucpica, mana piñanchu.

31Ashtahuanpish shuhuacpi japi tucushpaca,

canchis-huan yallitami cutichinga.

Paipac huasipi charishcatapish

tucuimi cunga.

32Ashtahuanpish shucpac huarmihuan

chayarinacucca alli yuyaitaca

mana charinchu.

Chaita ruhuashpaca

paipac causaitami chingachin.

33Chai runaca macashpa chugrichishca,

pingaichishcami canga.

Chai pingaichishcataca

mana cungaringachu.

34Cusaca huarmita celashpami

yallita piñarin.

Llaquichina punzha japishpaca,

cusaca manatac perdonangachu.

35Alli tucusha nishpa imata cucucpipish,

mana chasquingachu.

Ima achca valishcata cusha nicpipish,

manatac perdonangachu.