MARCOS 2 - Biblia Quichua Cañar 2010

Jesús paralisis ungüi japishcarunata alliyachishcamanta(Mt 9.1-8; Lc 5.17-26)

1Asha punzhacuna quipami, Jesusca cutinllatac Capernaúm puebloman yaicushpa, shuc huasipi carca. Chaipi cacta yachashpami,

2achca gentecuna tandanacurca. Huasi pungupipish maita mana shayaripacmi carca. Chaipimi Jesusca quishpirinamanta alli huillaita huillarca.

3Chaimanmi paralisis ungushca shuc runata, chuscu tucushpa chacanapi apamurca.

4Achca gentecuna cashcamantami Jesuspacmanca mana cuchuyai pudirca. Chaimantami huasi catata pascashpa, ungushca runataca huandumushcandi Jesuspacman uricuchirca.

5Tucui shunguhuan crishcata ricushpami Jesusca:

—Huahua, cambac juchacunataca ña perdonanimi— nirca.

6Maijan mandashcacunata yachachiccunapish chaipimi tiyacurca. Paicunapac shungupica:

7«¿Ima nishpatac caica chashna riman? ¡Paica Diostami piñachin! Juchacunata pipish mana perdonai pudinchu, Diosllami perdonan» nishpami yuyacurca.

8Paicuna chashna yuyacucta yachashpami, Jesusca:

—¿Ima nishpatac chashna yuyacunguichic?

9Cai ungushca runataca, ¿ima ninatac ashtahuan jahualla: “Cambac juchacunataca ña perdonanimi” nina, mana cashpaca “jatari, canta huandumushca chacanata apashpa rilla” nina?— nishpa tapurca.

10Runa Tucungapac shamushca ñuca cai pachapi juchacunata perdonaclla cashcata yachachunmi, cai runataca:

11“Jatarishpa, huandumushca chacanata apashpa, cambac huasiman rilla” nini— nirca.

12Chashna nicpimi, chai ungushca runaca jatarishpa, huandumushca chacanata apashpa, tucuipac ñaupamanta llucshishpa rirca. Chaimantami tucui mashna mancharinacushpa: “Jaicapi mana ricushcatami ricunchic” nishpa, Diostaca “allimari cangui” nircacuna.

Jesús Levita cayashcamanta(Mt 9.9-13; Lc 5.27-32)

13Chai quipaca Jesusca cutinmi Galilea cucha pataman rirca. Achca gentecuna paipacman shamucpimi, yachachirca.

14Chaimanta rishpaca, impuestota chasquina mizapi Alfeopac churi Leví tiyacuctami ricurca. Paita ricushpaca:

—Ñucata cati— nirca.

Shina nicpimi, Levica jatarishpa, Jesusta catishpa rircalla.

15Jesusca Levipac huasipimi micucurca. Chaipimi impuestota japic runacunapish, yallita juchayuc nishca gentecunapish, paipac yachacuccunapish paihuan micushpa tiyacurca. Jesustaca achcacunami caticurca.

16Jesús impuestota japiccunahuanpish, juchayuc gentecunahuanpish micucta ricushpami, Mandashcacunata yachachiccuna, fariseocuna Jesuspac yachacuccunataca:

—¿Ima nishpatac cancunapac yachachicca impuestota japiccunahuanpish, juchayuc gentecunahuanpish micucunyari?— nishpa tapurca.

17Chaita Jesús uyashpaca:

—Allicunaca jambictaca mana mashcanchu, ashtahuanpish ungushcacunallami jambicta mashcan. Ñucaca, mana cashcata ruhuac runacunatachu cayac shamurcani, ashtahuanpish juchayuccunatami cayac shamurcani— nirca.

Jesús yachachishcaca mushuc cashcamanta(Mt 9.14-17; Lc 5.33-39)

18Bautizac Juanpac yachacuccunapish, fariseocunapac yachacuccunapishmi ayunacurca. Chaimantami maijancuna Jesuspacman shamushpaca:

—Bautizac Juanpac yachacuccunapish, fariseocunapac yachacuccunapish ayunacunmi. Cambac yachacuccunaca, ¿ima nishpatac mana ayunancunayari?— nishpa tapurcacuna.

19Chashna tapucpimi Jesusca:

—¿Bodapi caccunaca Novio paicunahuan cacpica, ayunangachu? Novio paicunahuan cacpica, mana ayunanchu.

20Noviota apana punzhacuna chayamucunmi. Chai punzhacunapimi ayunangacuna.

21Pipish mauca churanataca, mushuc pañohuanca mana remendanchu. Chaica, mushuc paño uchillayashpaca, mauca churanataca ashtahuan lliquinmanmi.

22Cunanlla ruhuashca vinotapish, mauca cara capachupica pi mana churanchu. Chaica, cunanlla ruhuashca vino mauca capachuta tucyachicpica, vinopish, capachupish tucuringami. Chaimantami cunanlla ruhuashca vinotaca, mushuc capachupi churana— nirca.

Jesuspac yachacuccuna samana punzhapitrigo umata pitishcamanta(Mt 12.1-8; Lc 6.1-5)

23Samana punzhapimi, Jesusca paipac yachacuccunahuan trigo chagra chaupita ricurca. Chaita ricushpami, yachacuccunaca trigo umata piti callarirca.

24Chaimantami fariseocunaca Jesustaca:

—Uyai, cambac yachacuccunaca, ¿ima nishpatac samana punzhapi Dios ama ruhuachun cashcataca mana cazuncuna?— nishpa tapurca.

25Chashna nicpimi Jesusca:

—Mandac David paihuan puriccunahuan yarcaihuan cashpa, imata ruhuashcataca Dios quillcachishcapica, ¿manachu ricushcanguichic?

26Abiatar curacunata mandacui punzhapimi, Davidca Diosta mañana huasiman yaicushpa, Diosman cushca tandacunata paihuan puriccunahuan micurca. Chai tandataca pipish mana micunallachu carca, curacunallami micuna carca— nirca.

27Cutinllatacmi Jesusca:

—Samana punzhataca, gentecunapac allipacmi churarca. Runataca mana samana punzhapac allipacchu Diosca churarca.

28Chaimanta Runa Tucungapac shamushca ñucaca, samana punzha cacpipish mandai pudinimi— nirca.