MARCOS 6 - Biblia Quichua Cañar 2010

Jesús Nazaret pueblopi cashcamanta(Mt 13.53-58; Lc 4.16-30)

1Jesús chaimanta rishpaca, paipac llactamanmi paipac yachacuccunahuan cutimurca.

2Jesusca samana punzha chayamucpimi, israelcuna tandanacuna huasipi yachachi callarirca. Pai yachachishcata uyaccuna mancharishpa, caishuc chaishuc tapunacushpaca:

—¿Maipitac cai runaca caita yachacurcayari? ¿Ima shinatac caita yachacurca? ¿Pitac milagrocunata ruhuanata yachachirca?

3¿Manachu Mariapac huahua carpintero? ¿Manachu Jacobopac, Josepac, Judaspac, Simonpac huauqui? ¿Manachu paipac panicunaca cai llactapi ñucanchic-huan causan?— nishpami, mana crircacuna.

4Chaimantami Jesusca:

—Dios ima nishcata huillactaca maipipish allimi chasquin. Ashtahuanpish quiquin llactapica, quiquin familiacamanmi mana uyashun nin— nirca.

5Chaimantami chaipica, ima milagrocunatapish mana ruhuarca. Maijan ungushcacunallatami paicunapac jahuapi maquita churashpa alliyachirca.

6Jesusca chai gentecuna mana crishcamantami yallita llaquirishpa, chai muyundi llactacunapi yachachishpa puricurca.

Jesús paipac yachacuccunata cachashcamanta(Mt 10.5-15; Lc 9.1-6)

7Jesusca paipac chunga ishcai yachacuccunata cayashpa, supaicunata llucchichun poderta cushpami, ishcai ishcaita cacharca.

8Paicunata cachacushpaca:

—Ñanpi micunatapish, cullquitapish ama apanguichicchu ashtahuanpish, taunallata apanguichic.

9Ushutata churarishpapish, ama yanandi churanata apanguichicchu— nirca.

10Shinallatac Jesusca paicunata:

—Cancuna mai huasiman chayashpaca, shuc llactaman ringacaman chaillapi canguichic.

11Maijan llactapi cancunata mana chasquishpa, cancuna huillashcatapish mana uyashun nicpica, llucshishpa ringuichiclla. Chai llacta llaquita apana cashcata ricuchingapacca, cancunapac chaquipi catirishca allpatapish chaspishpa ringuichic— nirca.

12Yachacuccuna rishpaca, juchayuc cashcamanta llaquirishpa, Diosman cutirichunmi gentecunaman huillarca.

13Achca supaicunatami gentecunamanta llucchishpa cacharca. Achca ungushcacunatami aceiteta umapi churashpa alliyachirca.

Bautizac Juan huañushcamanta(Mt 14.1-12; Lc 9.7-9)

14Tucui llactacunapimi Jesús imata ruhuashcaca yacharirca. Chaimantami mandac Herodesca:

—Bautizac Juanmi huañushcacunapuramanta causarishca canga. Chaimantami paica milagrocunata ruhuacunga— nirca.

15Cutin maijanca:

—Dios ima nishcata huillac Eliasmi canga— nircami.

Maijanca:

—Dios ima nishcata ñaupa huillaccunapuramanta maijanmi canga— nircami.

16Chaita Herodes uyashpaca:

—Chai runaca Juanmi canga. Paitaca ñucami cungata pitishpa, huañuchichun mandarcani. Paimi huañushcacunapuramanta causarishca canga— nirca.

17Herodesllatacmi Herodías huarmi nishcata uyashpa, Juantaca cadenahuan huatashpa carcelpi churachishca carca. Herodesca, paipac huauqui Felipepac huarmi Herodias-huanmi apanacushpa causacurca.

18Juanca Herodestaca: «Huauquipac huarmihuan causanaca, mana allichu» nishcami carca.

19Herodiasca Juantaca huañuchinatami munarca. Shina cashpapish mana huañuchi pudircachu.

20Herodesca Juantaca cashcata ruhuac, Diospaclla causactami yacharca. Chaimantami paita manchashpa, cuidashpa charirca. Imata ruhuanata yuyacushpapish, Juan huillacpica, cushillami uyac carca.

21Herodías munashca punzhami chayarca. Chaica, Herodesmi pai huacharishca huata pactacpi, fiestata ruhuashpa, llactata mandaccunatapish, soldadocunata mandaccunatapish, Galilea llactata pushaccunatapish jatun micuiman cayarca.

22Chai ucuman yaicushpami, Herodiaspac huahua solteraca bailarca. Chaitaca, Herodespish, chaipi caccunapish cushicushpami ricucurca. Chaimantami mandac Herodesca chai solterataca:

—Can imata munashcata mañailla. Ñucaca cushallami.

23Ñucami: Can mañacpica, ñuca mandacushcamanta chaupi llactatapish cushami— nishpa, ari nini.

24Soltera chaimanta llucshishpaca mamataca:

—¿Imatatac mañasha?— nishpa tapurca.

Shina tapucpica mamaca:

—Bautizac Juanpac umata mañaiyari— nirca.

25Chai soltera mandac Herodespacman utca rishpaca:

—Cunanllatac Bautizac Juanpac umata shuc platopi cui— nirca.

26Mandac Herodesca yallitami llaquirirca. Shina cashpapish, chaipi caccunapac ñaupapi ari nishcamantami “mana cushachu” ninataca, mana pudirca.

27Chaimantami mandac Herodesca Juanpac umata pitishpa apamuchun, shuc soldadota cacharca.

28Chai soldadoca carcelman rishpami, Juanpac umata platopi apamushpa, chai solteraman curca. Paica paipac mamamanmi curca.

29Juanpac yachacuccuna chaita yachashpaca shamurcami. Chashnami Juanpac cuerpota enterrangapac aparca.

Jesús pichca huaranga yalli gentecunaman carashcamanta(Mt 14.13-21; Lc 9.10-17; Jn 6.1-14)

30Jesús huillachun cachashcacuna cutimushpaca, yachachishcatapish, imata ruhuashcatapish Jesusman tucuimi parlarca.

31Achca gentecuna rin, cutin puricucpimi, ima shina micunallatapish mana pudircacuna. Chaimantami Jesusca yachacuccunataca:

—Shitashca pambaman shamushpa, samarichic— nirca.

32Chaimantami paicunalla canoapi cuchata pasashpa, shitashca pambaman rircacuna.

33Paicuna ricuctaca achca gentecuna ricushpaca ricsircami. Chaimantami tucui pueblocunamanta chaquillahuan paicunata mishashpa, chaiman chayarcacuna.

34Canoamanta Jesús llucshishpaca, achca gentecunatami ricurca. Paicuna michic illac ovejacuna shina cashcamantami Jesusca llaquirishpa, paicunaman tucuita yachachi callarirca.

35Tutayamucpi, Jesuspac yachacuccuna paipacman cuchuyashpaca:

—Ñami tutayamun. Caipica pipish mana causanchu.

36Cai gentecunaca micunatapish mana charinchu. Paicunataca chai muyundi uchilla llactacunapi randishpa micuchun cachaiyari— nirca.

37Shina nicpimi Jesusca:

—Cancunallatac micunata caraichic— nirca.

Shina nicpimi paicunaca:

—¿Ishcai patsac denario cullquihuanchu tandata randimugrichun ningui?— nirca.

38Jesusca:

—Cancunaca, ¿mashna tandatatac charinguichic? Ricungapac richic— nirca.

Paicuna cutimushpaca:

—Pichca tanda, ishcai challuallatami charinchic— nirca.

39Shina nicpimi Jesusca:

—Chai gentecunata chai quihua pambapi asha asha raquishpa tiyachichic— nishpa mandarca.

40Chaimantami tucui chaipi caccunaca maipica patsac, maipica pichca chunga tiyarirca.

41Chai quipami Jesusca pichca tandata, ishcai challuata japishpa, jahua pachata huichailla ricushpa, Diosta pagui nirca. Shinami pichca tandata, ishcai challuata chaupishpa chaupishpa, gentecunaman carachun paipac yachacuccunaman curca.

42Chaitaca tucui gentecunami mana nicta micurca.

43Puchuchishcataca chunga ishcai taza jundatami tandatapish, challuatapish tandarca.

44Chai micuccunaca, caricunallami pichca huaranga carca.

Jesús yacu jahuata purishcamanta(Mt 14.22-27; Jn 6.16-21)

45Chai quipaca, Jesusca paipac yachacuccunatami canoapi huichicuchishpa, cuchata pasashpa, Betsaida puebloman ñaupachun cacharca. Chaicamanca Jesusca gentecunatami cachacurca.

46Jesusca gentecunata cachashpaca urcumanmi Diosta mañangapac rirca.

47Ña tutayacuctaca paipac yachacuccunaca chaupi yacupimi canoapi carca. Jesusca paillami urcupi saquirirca.

48Yachacuccunaca huaira ñaupamanta jarcacpimi, canoata mana purichi pudicurca. Chaitami Jesusca ricurca. Ña punzhayacuctami Jesusca yacu jahuata rishpa, paicunapac ñaupata rigrirca.

49Yachacuccuna chaita ricushpaca “¡ayami canga!” yuyashpami caparirca.

50Chaica, tucui paipac yachacuccuna ricushpami, yallita mancharirca. Chaimantami Jesusca paicunata rimashpaca:

—¡Ama mancharichicchu! Ñucami cani, sinchicuichic— nirca.

51Jesús paicuna ricuc canoapi huichicucpica, huairaca pararcami. Chaimantami paipac yachacuccunaca yallita mancharirca.

52Paicunaca rumi shungu cashcamantami tandata mirachishcatapish manarac entendircachu.

Jesús Genesaret llactapi ungushcacunata alliyachishcamanta(Mt 14.34-36)

53Cuchata pasashpaca, Genesaret llactaman chayashpami, chai cucha patapi canoata huatarca.

54Canoamanta llucshincami, gentecunaca Jesusta ricsirca.

55Shina ricsishpami, chai muyundi llactacunapi huillagrirca. Shina huillacpimi, Jesús maipi cacta uyashpaca, ungushcacunata huandushpa apamurca.

56Mai puebloman, mai llactaman, mai huasicunaman Jesús chayacpica, ñancunapimi ungushcacunata churarca. Shina churashpaca churana puntallapipish tuparichun saquichunmi mañarca.

Jesuspac churanapi tupariccunaca, tucuimi alliyarca.