2 CRÓNICAS 20 - Biblia Quichua Cañar 2010

Moabtapish, Amontapish Josafat mishashcamanta

1Tucui chaicunata ruhuashca quipami Moabpac, Amonpac huahuacuna, shinallatac shuctac amonitacunapish paicunahuan tandarishpa Josafathuan macanacungapac llucshirca.

2Shina cacpimi, maijancuna Josafatpacman rishpaca: «Mama cucha chimba ladopi causaccunapish, Siria llactapi causaccunapish canhuan macanacungapacmi achca shamucun. Paicunaca Hazezón-tamar nishca En-gadi pueblopimi tandanacushca cancuna» nirca.

3Shina huillacpimi, Josafatca mancharishpa, Mandac Dios-huan parlangapac yallita llaquirishpa cumurirca. Shina llaquirishpaca, mana micushpa Diosta mañachunmi, tucui Judá llactapi causaccunata mandarca.

4Shina huillacpimi, Judá llactapi causaccunaca tucui Judá pueblocunamanta Mandac Diosta ayudaiyari nishpa mañangapac shamurcacuna.

5Shina cacpimi Josafatca Judá llactapi causaccuna, Jerusalenpi causaccuna tandanacushcapac ñaupapi, Mandac Diospac huasi pungu ñaupapi shayarirca.

6Shina shayarishpaca: «Ñucanchic taitacunata Mandac Dioslla, canca, jahua pachapi causac Mandac Diosmi cangui. Tucui llactacunapi mandaccunatapish canmi mandacungui. Fuerzatapish, tucui ima ruhuanatapish, cambac maquipimi charicungui. Canhuanca pi mana chimbapurai pudinchu.

7Ñucanchic Mandac Dioslla, cai llactapi causaccunataca canmi, can acllashca israelcunapac ñaupamanta llucchishpa cacharcangui. Shina llucchishpaca, canhuan alli apanacuc Abrahampac huahua huahuacuna huiñaita causachunmi curcangui.

8Paicunami cai llactapi causashpa, cambac shutipi mañana huasita shayachirca. Paicuna shayachishpaca:

9“Ñucanchicman ima llaqui shamucpi, mana cashpaca espadahuan llaquichingapac shamucpi, ima ungüi japicpi, yarcai japicpica, cambac shuti cai huasipi causacushcamantami cambac ñaupaman shamushpa, cai huasipi canta mañashun. Shina sinchita mañacpica, ñucanchic mañashcata uyashpami, jatun llaquimanta llucchishpa, ayudangui” nircami.

10Israelcuna Egiptomanta llucshimucpica, Amón llactapi causaccunapac, Moab llactapi causaccunapac, Seir llactapi causaccunapac llactacunata pasachunca, mana munarcanguichu. Ashtahuanpish paicunamanta caruta rishpa, paicunata ama tucuchichunmi mandarcangui.

11Cunanca ñucanchicpac cachun can cushca llactamanta llucchishpa cachangapac shamushpami, ñucanchic paicunaman allita ruhuashcamantaca mana allita ruhuashpa cutichicuncuna.

12Ñucanchic Mandac Dioslla, paicuna chashna ruhuashcamanta llaquichiyari. Ñucanchic-huan macanacungapac shamuc achca gentecunahuan shayaringapacca mana fuerzata charinchicchu. Ima ruhuanatapish mana yachanchicchu, ashtahuanpish canllatami chaparacunchic» nirca.

13Tucui Judá llactapi causaccunami uchilla huahuacunandi, huarmicunandi, churicunandi Mandac Diospac ñaupapi shayacurca.

14Zacariaspac churi Jahazielpish chaipimi carca. Zacariasca Banaiaspac churi, Benaiasca Jeielpac churi, Jeielca Matatiaspac churi, Paica Asafpac huahua huahuapuramanta levitami carca. Jahaziel tandanacushcacunapac chaupipi cacpimi, Mandac Diospac Espíritu paipacman shamurca.

15Chai quipami paica: «Judá llactapi causaccuna, Jerusalenpi causaccuna, can jatun mandac Josafatpish uyaichic. Mandac Diosca cancunataca: “Chai achca gentecunata ricushpapish ama manchaichicchu, ama chucchuichicchu. Chai macanacuica mana cancunapacchu, ashtahuanpish Diospacmi.

16Paicunahuan macanacungapacca caya urai ringuichic. Paicunaca Sis urcu huichaitami shamunga. Cancunaca shitashca pamba Jeruelman manarac chayashpami, paicunahuanca ura huaicupi tupanguichic.

17Cunanca mana cancunachu macanacuna canguichic, ashtahuanpish Mandac Dios ima shina ayudacta ricushpa casilla shayacunguichiclla. Judapi, Jerusalenpi causaccuna ama manchaichicchu, ama chucchuichicchu. Cayaca paicunahuan macanacungapac llucshichiclla. Mandac Diosmi cancunahuan canga” nini» nirca.

18Shina nicpimi, Josafatca allpacaman cumurirca. Shinallatac Judá llactapi, Jerusalenpi causaccunapish Mandac Diospac ñaupapi cungurishpa, Mandac Diosta alli nircacunami.

19Chai quipaca Corepac huahua huahuapuramanta, Cotpac huahua huahuapuramanta levitacunami israelcunata Mandac Diostaca sinchita caparishpa alli ningapac shayarircacuna.

20Paicunaca tutamanta utca jatarishpami, shitashca pamba Tecoaman llucshircacuna. Chaiman llucshicushpami Josafatca: «Judá llactapi, Jerusalenpi causaccuna uyaichic. Cancunata Mandac Diospi shunguta churaichic. Shina ruhuacpica, ima llaquipish mana japingachu. Dios ima nishcata huillaccuna huillashcapipish shunguta churaichic. Shina ruhuacpica, tucuimi alli llucshinga» nirca.

21Chai gentecunata tapushca quipami Josafatca shuccunataca macanacuc soldadocunapac ñaupata sumaimana Mandac Diosta alli nishpa: «Mandac Diostaca jatunyachichic, paica huiñaita cuyacmari» nishpa cantashpa richun churarca.

22Alli nishpa cantai callarincami Mandac Diosca Judá llactapi causaccunahuan macanacungapac shamuc amonitacunata, moabitacunata, Seir urcumanta shamuccunataca pacalla chapashpa huañuchichun churarca. Shina ruhuacpimi paicunapurallatac caishuc chaishuc huañuchinacurca.

23Amonitacuna, moabitacunaca Seir urcumanta shamuccunata huañuchishpa, tucuchingapacmi jatarircacuna. Paicunata tucuchishca quipaca, paicunapurallatacmi huañuchinacurca.

24Judá llactapi causaccuna shitashca pambapi cac torreman chayashpa, chai shamuc achca soldadocunata ricucpica, shucllapish mana atishpa tucui huañushpa pambapi siricuctami ricurcacuna.

25Josafatca paipac soldadocunahuanmi huañushcacuna ima charishcata japingapac shamurca. Shina shamushpaca, achca churanacunata, imapish ashtahuan valishca sumaccunatami japirca. Macanacuipi quichushca achca cacpi, mana apai pudishpami, quimsa punzhacaman tandachicurca.

26Chuscu punzha tucucpica, Beraca pugru pambapi tandanacushpami Mandac Diosta alli nircacuna. Chaimantami chai pambataca Beraca pugru pamba nishpa shutichirca. Chai pambaca cunancamanmi chai shutillatac can.

27Paicunata piñaccuna llaquichicucpi, Mandac Dios ayudashcamantami Judá llactapi, Jerusalenpi causac tucui soldadocunaca Josafattaca ñaupachishpa cushicuihuan Jerusalenman cutimurcacuna.

28Jerusalenman shamushpaca, salteriopi, arpapi, trompetapi tocashpami Mandac Diospac huasiman shamurcacuna.

29Israelcunata piñaccunahuan Mandac Dios macanacushcataca tucuimi uyarca. Chaita uyashpaca, tucui llactapi causaccunami Mandac Diostaca yallita mancharcacuna.

30Tucui muyundi llactacunapi causaccuna llaquichinamanta Mandac Dios huacaichishpa, sumac causaita cucpimi, Josafat mandacucpica, macanacuica mana tiyarca.

Josafat huañushcamanta(1 R 22.41-50)

31Chashnami Josafatca Judá llactapica mandarca. Judá llactata mandai callarishpaca, quimsa chunga pichca huatatami charirca. Paica ishcai chunga pichca huatacunatami Jerusalenpi mandarca. Paipac mamaca Silhipac ushi Azubami carca.

32Paipac taita Asa causashca shinallatacmi chai ñanmanta mana anchurishpa, Mandac Diospac ñaupapica allita ruhuashpa causarca.

33Chashna causashpapish lomacunapi tiyac altarcunataca mana anchuchircachu. Gentecunaca paicunapac ñaupa taitacunapac Mandac Diostaca manarac tucui shunguhuan cazurcacunachu.

34Punta punzhacuna, quipa punzhacuna Josafat ashtahuan imata ruhuashcacunaca Hananipac churi Jehú quillcashcapimi tiyacun. Chaitaca Israel llactata jatun mandaccuna imata ruhuashcata quillcashcapimi huillacun.

35Chai tucuita ruhuashca quipami Judá llactata jatun mandac Josafatca Mandac Diosta mana manchac Israel llactata jatun mandac Ocozias-huan tandanacurca.

36Josafatca Tarsis puebloman ric barcocunata ruhuangapacmi paihuan tandanacurca. Chai barcocunataca Ezión-geber pueblopimi ruhuachirca.

37Shina tucucpimi, Maresa pueblopi causac Dodavapac churi Eliezer Josafatta llaquichinata huillashpaca: «Ocozias-huan tandanacushcamantami Mandac Diosca can imata ruhuashcacunataca tucuchigrin» nirca. Pai nishca shinallatac chai barcocuna paquiricpimi, Tarsis pueblomanca mana ri pudirca.