LUCAS 9 - Biblia Quichua Cañar 2010

Jesús chunga ishcai yachacuccunata huillachun,cachashcamanta(Mt 10.5-15; Mr 6.7-13)

1Jesusca paipac chunga ishcai yachacuccunata tandachishpami, tucuilaya supaicunata llucchichun, ungushcacunata alliyachichun poderta curca.

2Shinami, Dios mandacucmanta huillagrichun, ungushcacunata alliyachichun cacharca.

3Paicunata cachashpaca:

—Ama imata apanguichicchu. Cucayutapish, taunatapish, cullquitapish ama aparinguichicchu. Yanandi churanatapish ama apanguichicchu.

4Mai huasiman chayashpaca, chai llactamanta ringacaman chaillapi canguichic.

5Maijan pueblopi mana chasquisha nicpica, chaquipi catirishca allpatapish chaspishpa ringuichic. Chashna ruhuacpimi, paicuna mana allita ruhuashcata yachangacuna— nirca.

6Chashnami yachacuccunaca tucui llactacunata alli huillaita huillashpa, ungushcacunata alliyachishpa puricurca.

Jesús pi cashcata Herodes mana yachashcamanta(Mt 14.1-12; Mr 6.14-29)

7Mandac Herodes, Jesús tucui imata ruhuacushcata yachac chayashpaca manchaihuanmi carca. Chaica, maijancunaca: «bautizac Juanmi huañushcamanta causarimushca canga»,

8maijancunaca: «Dios ima nishcata Eliasmi ricurishca canga», cutin maijancunaca: «Dios ima nishcata ñaupa huillaccunamanta maijanmi causarishca canga» nircacuna.

9Herodesca: «Juantaca ñucallatacmi cungata pitichircani. ¿Pitac cai tucui allicunatami ruhuan nishpa parlancuna?» nishpami, quiquin ñahuihuantac Jesusta ricunata munacurca.

Jesús pichca huaranga yalli gentecunaman carashcamanta(Mt 14.13-21; Mr 6.30-44; Jn 6.1-14)

10Jesús cachashca apostolcuna cutimushpaca, tucui imata ruhuashcatami Jesusman parlarca. Paicunallata pushashpami, Jesusca Betsaida pueblo cuchullaman rirca.

11Chaita gentecuna yachashpami, catishpa rirca. Chaipimi Jesusca cushilla chasquishpa, Dios mandacucmanta huillashpa, ungushcacunatapish alliyachirca.

12Ña tutayagricpimi, chunga ishcai yachacuccuna Jesuspacman cuchuyashpaca:

—Cai shitashca pambapimi canchic. Gentecuna cuchulla llactacunapi micunatapish, samarinatapish mashcagrichun cachai— nirca.

13Shina nicpimi Jesusca:

—Cancunallatac caraichic— nirca.

Chashna nicpimi paicunaca:

—Pichca tanda, ishcai challuallatami charinchic. Cai tucui gentecunaman carangapacca, ¿randinachu canchic?— nirca.

14Chaipica pichca huaranga yalli runacunami carca. Jesusca paipac yachacuccunataca:

—Pichca chunga, pichca chunga raquishpa tiyachichic— nirca.

15Yachacuccunaca pai nishca shinami tucuita tiyachirca.

16Jesús chai pichca tandata, ishcai challuata japishpaca, jahua pachata huichailla ricushpami, Diosta pagui nirca. Shinami chaupishpa chaupishpa, gentecunaman carachun paipac yachacuccunaman curca.

17Tucui gentecunami mana nicta micurca. Paicuna puchuchishcataca, chunga ishcai taza jundatami tandarca.

Jesusca Cristo cashcata Pedro huillashcamanta(Mt 16.13-19; Mr 8.27-29)

18Shuc punzha, Jesús pailla Diosta mañacushpa, paipac yachacuccunataca:

—Gentecunaca, ¿pi cashcatatac ñucataca yuyancuna?— nirca.

19Chashna tapucpimi paicunaca:

—Maijancunaca: “Bautizac Juanmi” nincunami. Maijancunaca: “Dios ima nishcata huillac Eliasmi” nincunami. Maijancunaca: “Dios ima nishcata ñaupa huillaccunamanta maijanmi causarimushca canga” nincunami— nirca.

20Chashna nicpimi Jesusca:

—Cutin cancunaca, ¿pi cashcatatac ñucataca yuyanguichic?— nirca.

Chashna nicpimi Pedroca:

—Canca Dios cachashca, Cristomi cangui— nirca.

Jesusta huañuchinamanta huillashcamanta(Mt 16.20-28; Mr 8.30—9.1)

21Pedro chashna nicpica, Jesusca ama piman huillachunmi cutin cutin mandarca.

22Shinallatac Jesusca:

—Runa Tucungapac shamushca ñucaca llaquicunata apanami cani. Curacunata mandac curacunapish, pushac yuyaccunapish, mandashcacunata yachachiccunapish mana ricusha nishpami huañuchinga. Chashna huañuchicpipish, quimsa punzhapica causarishami— nirca.

23Chaipi caccunataca:

—Maijanpish ñucata catisha nishpaca, quiquin causaita mana llaquinachu can. Cruzpi chacatashca huañuna shina llaquita apana cashpapish, ñucata punzhanta catichunlla.

24Maijanpish quiquin causaita llaquicca chingaringami. Maijanpish ñucata caticushcamanta causaita chingachicca huiñaita causangami.

25Shuc runa tucui cai pachapi tiyaccunata japishpapish, causaita chingachishpa ¿ima allitac cangayari?

26Maijanpish ñucamantapish, ñuca huillashcacunamantapish pingacpica, Runa Tucungapac shamushca ñucapish Diospac poderhuan, jucha illac angelcunahuan shamushpaca, chai runamanta pingashami.

27Maijan caipi caccunaca, Dios mandacucta ricungacaman manarac huañunguichicchu. Chaica chashnatacmi canga— nirca.

Jesús shuctaclaya ricurishcamanta(Mt 17.1-8; Mr 9.2-8)

28Chashna nishcamanta pusac punzha shinapimi, Jesusca Pedrohuan, Juanhuan, Jacobohuan Diosta mañangapac urcuman rirca.

29Jesús mañacushpaca, ñahuipish shuctaclaya tucushpa, churanapish jagan nicuc yuranlla ricurirca.

30Chaipica ishcai runacunami Jesus-huan parlanacucurca. Paicunaca shucca Moisés, shucca Eliasmi carca.

31Sumaimana achiclla chaupipimi, Jesús Jerusalenpi huañunamanta parlanacucurca.

32Pedropish, paihuan caccunapish yalli sueñunayaihuanmi carca. Shina cashpapish, Jesús chashna sumaimana achiclla tucuctapish, paihuan parlanacucuc ishcai runacunatapish ricucurcami.

33Chai ishcai runacuna Jesuspacmanta caruyacpica, Pedroca:

—Yachachic, ñucanchicca allimi caiman shamushcanchic. Cunanca quimsa chucllata ruhuashun, shuctaca canman, shuctaca Moisesman, shuctaca Eliasman— nirca.

Ashtahuanpish Pedroca pai ima nicushcata mana yacharcachu.

34Chashna nicucllapitacmi, puyu shamushpa paicunata taparca. Chaimantami manchaihuan carca.

35Chai puyu ucumanta shuc rimashca uyarishpaca: «Caimi ñuca cuyashca Churi. Pai ima nishcata uyanguichic» nirca.

36Chai rimashca uyarishca quipaca, Jesusllatami ricurcacuna. Chai ricushcataca, chai punzhacunapica piman mana huillarcachu.

Jesús supai japishca huambrata alliyachishcamanta(Mt 17.14-21; Mr 9.14-29)

37Cayandi punzha urcumanta shamucpica, achca gentecunami tupangapac shamurca.

38Chai shamuccunapuramanta shuc runa caparishpaca:

—Yachachic, ñuca shuclla churita llaquiyari.

39Paitaca supai japishpami, yuyaita chingachishpa caparichicun. Shimiman puscuta shitachishpami, llaquinayaita punzhanta chucchuchicun.

40Ñami cambac yachacuccunaman supaita llucchishpa cachachun mañarcani. Shina mañacpipish, paicunaca mana pudircachu— nirca.

41Chashna nicpimi Jesusca:

—¡Aij, mana cric millai gentecunalla! ¿Ima punzhacamantac yachachicushalla? ¿Maicamantac cancunahuan llaquita apacushalla? Cambac churita pushamui— nirca.

42Jesuspacman chai huambra cuchuyacucpica, cutinllatacmi supaica chucchuchishpa, pambaman urmachirca. Jesusca chai supaita sinchita rimashpami, llucchishpa cacharca. Chashnami alliyashca huambrata taitaman curca.

43Chai shina Diospac poderta ricushpami, tucui gentecuna mancharishpa saquirirca.

Jesús, pai huañunamantacutin huillashcamanta(Mt 17.22-23; Mr 9.30-32)

Chashna tucui chaicunata ruhuashcata gentecuna ricushpa cushicuihuan cacpimi, Jesusca paipac yachacuccunataca:

44—Caita alli uyaichic, Runa Tucungapac shamushca ñucataca runacunamanmi japichinga— nirca.

45Yachacuccunaca Jesús chashna nishcataca mana entendircachu. Chaica, paicunaca chaita entendingapacca manarac yuyaita charircachu. Chashna mana entendishpapish, manchashpami mana tapurcacuna.

Maijan ashtahuan alli canamanta rimanacushcamanta(Mt 18.1-5; Mr 9.33-37)

46Yachacuccunaca maijan ashtahuan alli canamantami rimanacurca.

47Jesús, paicuna chashna yuyacucta yachashpa, shuc huahuata japishpa, paipac ñaupapi

48churashpaca:

—Maijanpish ñuca shutipi cai huahuata chasquicca, ñucatami chasquin. Maijanpish ñucata chasquicca, ñucata cachac Taitatami chasquin. Cancunapuramanta maijanpish yangalla nishcami, tucuimanta yalli alli nishca canga— nirca.

“Ñucanchicta mana piñacca, ñucanchic-huan allicashcatami ricuchin” nishcamanta(Mr 9.38-40)

49Juanca Jesustaca:

—Yachachic, shuc runatami cambac shutipi supaicunata llucchishpa cachacucta ricurcanchic. Mana ñucanchicpura cashcamantami, ama chashna ruhuachun jarcarcanchic— nirca.

50Chaimantami Jesusca:

—Chashna ruhuactaca ama jarcanguichicchu. Maijanpish mana ñucanchicta piñacca, ñucanchic-huanmi— nirca.

Jesús Jacobotapish, Juantapish rimashcamanta

51Jesusca jahua pachaman rina punzha chayamucucpimi, Jerusalén puebloman rina yuyailla carca.

52Chaimantami Jesusca huillaccunata ñaupachishpa cacharca. Chashnami Samaria llactapi tiyac uchilla llactaman pozanata mashcangapac chayarca.

53Ashtahuanpish Samaria llacta gentecunaca Jesús Jerusalenman ricucta yachashpami, mana chasquishun nircacuna.

54Chaimantami Jesuspac yachacuccunapuramanta Juanpish, Jacobopish:

—Apunchic Jesús, caipi causaccunata tucuchichun, ¿Elías mañashca shina, jahua pachamanta ninata cachachun mañashunchu?— nirca.

55Chashna nicpi, Jesús tigraricushpaca:

—Cancunaca imata rimaricushcatapish mana yachanguichicchu.

56Runa Tucungapac shamushca ñucaca, mana causaita chingachingapacchu shamurcani, ashtahuanpish causaita cungapacmi shamurcani— nirca.

Chaimantaca shuc llactaman rircallami.

Jesusta catisha niccunamanta(Mt 8.19-22)

57Ñanta ricucpimi, shuc runa Jesustaca:

—Apunchic Jesús, can maita ricpipish catisha ninimi— nirca.

58Chashna nicpimi Jesusca:

—Atuccunapish machaicunata charinmi. Volac animalcunapish cuzhacunataca charinmi. Ashtahuanpish Runa Tucungapac shamushca ñucaca, maipi umata samachinallatapish mana charinichu— nirca.

59Shinallatac Jesusca shuc runataca:

—Jacu ñucahuan— nirca.

Shina nicpimi, chai runaca:

—Apunchic Jesús, ñuca taitatarac enterrangapac risha. Quipata catishallami— nirca.

60Chashna nicpimi Jesusca:

—Huañushcacuna huañushcacunata enterrachun saqui. Canca, Dios mandacucmanta alli huillaita huillangapac shamui— nirca.

61Cutin shuc runa shamushpaca:

—Apunchic Jesús, canta catisha ninimi. Shina cashpapish, ñuca huasi caccunamanrac huillagrisha— nirca.

62Chashna nicpimi Jesusca:

—Maijanpish yapucushpa, huashata chapacca, mana Dios mandacucman yaicungachu— nirca.