DEUTERONOMIO 5 - Biblia Quichua Cañar 2010

Chunga mandashcamanta(Ex 20.1-17)

1Moisés israelcunata cayashpaca: «Tucui israelcuna, cunan ñuca cancunaman huillashca mandashcacunatapish, yachachishcacunatapish allita uyaichic. Caitaca allita yachacushpa, pactachishpa causaichic.

2Ñucanchicta Mandac Diosca Horeb urcupimi ñucanchic-huan ari ninacurca.

3Mandac Diosca mana ñucanchic taitacunallahuanchu ari nishca, ashtahuanpish cunan caipi cac tucui ñucanchic-huanpishmi ari nishca.

4Caitaca urcupimi nina chaupimanta Mandac Diosca ñahui ñahui cancunahuan parlarca.

5Chai punzhapica Mandac Dios imata nishcata cancunaman huillacmi ñucaca carcani. Cancunaca manchashpami, urcumanca mana huichai rircanguichic. Chaipimi Mandac Diosca:

6“Ñucaca, cancuna Egipto llactapi huatashca shina causacushcamanta llucchic Mandac Diosmi cani.

7Ñucapac ñaupapi ama shuctac dioscunata charinguichu.

8Jahua pachapi, cai pachapi imapish tiyaccunaman riccha diostapish, allpa ucupi, yacupi tiyacman riccha diostapish ama ruhuanguichu.

9Chai dioscunapac ñaupapi ama cumuringuichu, ama adoranguichu. Ñucaca, ñucapaclla causachun munac Mandac Diosmi cani. Taitacuna juchallishcamantaca paicunapac huahuacunatami quimsaniqui, chuscuniqui huahua huahuacaman llaquichicmi cani.

10Ashtahuanpish ñucata cuyashpa, ñuca mandashcacunata cazuccunataca huaranga huahua huahuacaman cuyacmi cani.

11Mandac Dios ñucapac shutita ama yanga rimanguichu. Mandac Dios ñucapac shutita yanga rimactaca llaquichishami.

12Mandac Dios ñuca mandashca shina ñucapaclla samana punzhata yuyaringui.

13Sucta punzhata trabajangui. Chai punzhacunapi imatapish ruhuangui.

14Ashtahuanpish canchisniqui punzhaca Mandac Dios ñucapaclla chicanyachishca samana punzhami. Chai punzhapi can shina canta servic caripish, servic huarmipish samarichunca, cambac churipish, ushipish, cambac huasipi causac shuctac llacta runapish imata ama ruhuanachu canguichic. Shinallatac cambac huagratapish, burrotapish, shuctac animalcunatapish ama imata ruhuachinguichu.

15Egipto llactapi cancuna huatashca shina causacucpi, Mandac Dios ñuca poderhuan llucchishcata yuyaringui. Chaimantami canta Mandac Dios ñucaca samana punzhapica samarichun mandani.

16Mandac Dios ñuca cushca llactapi unaita causangapac, chaipi alli causangapacca canta Mandac Dios ñuca mandashca shina cambac taita mamata cuyangui.

17Ama huañuchinguichu.

18Ama huainayanguichu.

19Ama shuhuanguichu.

20Ama llullashpa shuccunata llaquichinguichu.

21Ama shucpac huarmita munanguichu. Shinallatac shucpac huasita, chagrata, servic carita, servic huarmita, huagrata, burrota, imatapish ama munanguichu” nircami.

Israelcuna manchaihuan cashcamanta(Ex 20.18-26)

22Cai mandashcacunataca cancuna urcupi tandanacushca cacpimi, Mandac Diosca pura puyu nina chaupimanta sinchita rimarca. Chai quipaca, imatapish mana ashtahuan rimashpami ishcai tabla rumipi quillcashpa ñucaman curca.

23Cancunaca urcupi nina rupacuctapish ricurcanguichicmi. Puyu chaupimanta rimashcatapish uyarcanguichicmi. Chai quipami tucui aillucunata pushaccunapish, pushac yuyaccunapish ñucapacman cuchuyarcanguichic.

24Chashna cuchuyashpaca: “Riqui, caipimi ñucanchicta Mandac Diosca paipac podertapish, jatun cashcatapish ricuchin. Nina chaupipimi pai rimashcata uyanchic. Cunan punzhami Dios runacunaman rimacpi, runacuna mana huañuc cashcatapish ricunchic.

25Shina cashpapish, cai ninapi rupashpa, mana huañushun ninchicchu. Cutinllatac ñucanchicta Mandac Dios rimashcata uyashpaca huañushunmi.

26Chaica, ¿pi shuctac runacunata causac Dios nina chaupimanta rimashcata uyashpaca causacungayari?

27Chaimanta ñucanchicta Mandac Dios rimashcata can uyailla. Quipataca ñucanchicman huillangui. Ñucanchicca can nishcata uyashpa ruhuashunllami” nircanguichicmi.

28Cancuna chashna rimashcata Mandac Dios uyashpaca: “Cai gentecuna canta imata nishcata uyarcanimi. Paicunaca allitami nirca.

29¡Paicunaca shungumanta manchashpa, tucui punzhacuna tucui ñuca mandashcacunata cazushpa causashpami alli canman! Shina ruhuashpami, paicunapish, paicunapac huahuacunapish tucui causaipi alli canga.

30Cunanca paicunata carpa huasiman cutichi cachashpa,

31canca caipi ñucahuan saquiri. Ñucami tucui mandashcacunatapish, pactachinacunatapish, yachachishcacunatapish yachachigrini. Caitaca paicuna ñuca cushca llactata japishpa, chaipi causashpa cazuchunmi yachachina cangui” nirca.

32Mandac Dios mandashca shina tucuita pactachinguichic. Allimanpish, lluquimanpish mana ladoyashpa, catinguichic.

33Mandac Dios ima shina causachun nishca shina causanguichic. Chashna causashpami, Dios cushca llactata japishpaca, unaita, allita causanguichic.