1 SAMUEL 13 - Biblia Quichua Cañar 2010

Israelcuna filisteocunahuan macanacushcamanta

1Saulca ñami shuc huatata mandarca. Ña ishcai huatata israelcunata mandacushpami,

2israelpuramantaca quimsa huaranga macanacuc runacunata acllarca. Chaicunamantaca ishcai huarangaca Saulhuanmi Micmas pueblopipish, Bet-el urcupipish carcacuna. Cutin shuc huarangaca Benjamín llacta Gabaa pueblopimi Jonatanhuan carcacuna. Shina acllashca quipami caishuc runacunataca paicunapac carpa huasicunaman cacharca.

3Urcupi cuidacuc filisteo soldadocunahuan Jonatán macanacushpa atishcatami filisteocunaca yachac chayarca. Chaimantami Saulca: «Israelcuna yachac chayachun» nishpa, tucui Israel llactapi cornetapi tocachirca.

4Israelcunaca: «Saulca urcupi cuidacuc filisteo soldadocunahuanmi macanacushpa atishca. Chaimantami filisteocunaca israelcunata mana ricunayachicun» nictami uyarcacuna. Shina cashcamantami israelcunaca Saulta catingapac Gilgal pueblopi tandanacurca.

5Chaimantami filisteocunapish, israelcunahuan macanacungapac quimsa huaranga carretacunahuan, sucta huaranga caballopi ric soldadocunahuan, shinallatac mama cuchapi tiyac tiyu shina mana yupaipac achca gentecunahuan tandanacurca. Paicunaca Micmas puebloman huichai rishpami, carpa huasicunata shayachishpa tiyarircacuna. Chai puebloca Bet-avén pueblomantaca inti llucshic ladomanmi saquirin.

6Israelcunaca yallita llaquipi cashpami, jatun jutcucunapi, huaicucunapi, machaicunapi, quingraicunapi, yacu jundachina jutcucunapi miticurca.

7Shinallatac maijan israelcunaca Jordán yacuta pasashpami Gad, Galaad llactacunaman rirca.

Ashtahuanpish Saulca Gilgal pueblollapitacmi carca. Paihuan cac tucui gentecunaca manchaihuanmi chucchucurca.

8Saulca Samuel nishca shinallatacmi canchis punzhata shuyarca. Ashtahuanpish Gilgal puebloman Samuel mana utca chayamucpimi gentecunaca caita chaita ri callarirca.

9Chaimantami Saulca:

—Diosman cushpa tucui rupachina animaltapish, Dios-huan alli tucuna ofrendatapish apamuichic— nirca.

Shina nishpami paillatac Diosman cushpa tucui rupachirca.

10Diosman cushpa tucui rupachishca quipami Samuelca chayamurca. Shina chayamucpimi, Saulca saludangapac llucshirca.

11Chaipimi Samuelca:

—¿Imatatac ruhuarcangui?— nishpa tapurca.

Shina tapucpi Saulca:

—Tucui gentecunami ñucata saquishpa ri callarirca. Canpish shamushami nishca punzhaca mana chayamurcanguica. Filisteocunapish Micmas pueblopimi tandanacushca carca.

12Chaimantami ñucaca: “Cunanca filisteocuna ñucanchic-huan macanacungapac Gilgal puebloman urai shamungamari. Ñucaca Mandac Diosta ayudachun nishpaca mana mañashcanichu” yuyashpami ñucallatac Diosman cushpa tucui rupachingapac shayarircani— nirca.

13Shina nicpimi, Samuelca Saultaca:

—Canca yuyac illac shinamari ruhuashcangui. Canta Mandac Dios mandashca shina ruhuashca cacpica, cunanmanta pachami canmanpish, cambac huahua huahuacunamanpish israelcunata mandashpa causanataca saquinman carca.

14Ashtahuanpish cunanca mana unaitachu mandangui. Canta Mandac Dios mandashcata mana cazushcamantaca pai munashca shina causac runatami pai acllashcacunata mandachunca churanga— nirca.

15Shina nishca quipami Samuelca Gilgal pueblomantaca Benjamín llactapi cac Gabaa puebloman huichai rirca.

Saulca paihuan ric macanacuc runacunata yupashpaca sucta patsac soldadocunami carca.

16Saulpish, paipac churi Jonatanpish paicunahuan ric runacunapish Benjamín llactapi cac Gabaa pueblollapitacmi saquirirca.

Ashtahuanpish filisteocunaca Micmas pueblopimi carpa huasicunata shayachishpa tiyarirca.

17Chai huasicunamantami cungailla llaquichingapac quimsapi chicanyarishpa llucshircacuna. Shucca Sual llactapi cac Ofra puebloman rina ñantami rircacuna.

18Caishucca Bet-horón puebloman rina ñantami rircacuna. Cutin caishuccunaca Zeboim pambapi cac urcucunamanmi rircacuna. Zeboim pambaca shitashca pambamanmi can.

19Tucui Israel llactapica fierromanta imatapish ruhuac runaca shucllapish mana tiyarcachu. Filisteocunami israelcunataca espadatapish, lanzatapish ruhuachunca mana saquircacuna.

20Chaimantami israelcunaca paicunapac yapuna rejacunata, azadoncunata, hachacunata, hocescunata mulachingapacca filisteocunapacman ric carca.

21Shina ricpimi, yapuna rejacunamanta, azadoncunamantaca canchis gramo cullquita japiccuna carca. Shinallatac hachacunata mulashcamanta, puya fierrota allichishcamantaca quimsa gramosta pezac cullquitami japiccuna carca.

22Chai macanacuna punzhaca Saulpac, Jonatanpac soldadocunaca espadatapish, lanzatapish shucllatapish mana charircachu. Ashtahuanpish Saúl, paipac churi Jonatanllami espadataca charirca.

23Shina cacpica, ñami shuc chicanyarishca filisteo soldadocunaca Micmas puebloman pasana ñanpi chapangapac chayamurca.