EZEQUIEL 46 - Biblia Quichua Cañar 2010

Fiesta punzhapi imata ruhuanamanta

1Mandac Diosca: Inti llucshina ladoman cac ñucapac huasi ucu pambaman yaicuna punguca sucta punzhacamanmi huichcashca canga. Ashtahuanpish samana punzhapi, llullu quilla punzhapimi pascashca canga.

2Mandacmi canzha pamba punguta yaicushpa, ucu canzha pungu umbral ladopi shayaringa. Paica ñucaman cushca animalta tucui rupachingacaman, ñucahuan alli tucungapac ofrendata cungacamanmi pungu umbral ladopi shayacunga. Quipaca pungu umbral jahuapi cungurishpa, Diosta adorashpami llucshinga. Ashtahuanpish chai punguca tutayangacamanmi pascashca canga.

3Cutin samana punzhapi, llullu quilla punzhapica cai llactapi causaccunami punguman shamushpa, Mandac Dios ñucapac ñaupapi adoranga.

4Mandacca samana punzhapica mana ima tucushca sucta maltón ovejata, shuc carnero ovejatami Mandac Diosman cushpa, tucui rupachinga.

5Cada carnero ovejahuanmi shuc efa harinata cunga. Maltón ovejahuanca mashnata charishca shinami cunga. Cada efa harinahuanca shuc hin aceitetami cunga.

6Llullu quilla punzhapica mana ima tucushca becita, sucta maltón ovejata, shuc carnero ovejatami cunga.

7Chai cada becihuan, cada carnero ovejahuanca shuc efa harinatami cunga. Maltón ovejacunahuanca mashnata charishca shinami cunga. Cada efa harinahuanmi shuc hin aceiteta cunga.

8Ñucapaclla huasiman mandac yaicungapacca ucu pambaman yaicuna pungutami yaicunga, shinallatac chaillatatacmi llucshinga.

9Ashtahuanpish cai llactapi causaccuna tandanacui punzhapi ñuca ñaupaman shamuccunamanta maijan jahua lado punguta yaicucca ura lado pungutami llucshinga. Ura lado punguta yaicucca jahua lado pungutami llucshinga. Mana yaicushcallatatac llucshinachu can.

10Paicuna yaicucpica, mandacca paicunahuanmi yaicunga. Paicuna llucshicpica, paicunallahuantacmi llucshinga.

11Shinallatac fiesta punzhapipish, tandanacui punzhapipish shuc efa harinatami cada becihuan, cada carnero ovejahuan cunga. Cutin maltón ovejahuanca mashnata charishca shinami cunga. Shuc efa harinahuanca shuc hin aceitetami cunga.

12Ashtahuanpish mandacca pai munashcamanta mashnata charishca shina animalta cushpa rupachigricucpi, Mandac Dios ñucahuan alli tucungapac ofrendata cugricucpica, inti llucshina lado pungutaca pascangami. Chaita yaicushpaca, samana punzhapi ruhuac shinallatac, animalta tucui rupachina shinallatacmi alli tucungapac ofrendata cunga. Pai chaita ruhuashpa, llucshishca quipaca pungutami huichcanga.

Punzhanta Diosman cushpa animalta huañuchinamanta

13Punzhanta mana ima tucushca shuc maltón ovejata Mandac Diosman cushpa, tucui rupachingui. Cada tutamanta animalta cushpa huañuchingui.

14Chai maltón ovejahuanca shuc efa harinata suctapi chaupishcahuan cungui. Alli harinahuan chapungapacca shuc litro aceiteta cungui. Caicunaca Mandac Diosman huiñaita cuchun mandashcami.

15Cada tutamanta maltón ovejatapish, shuc efa harinatapish, aceitetapish ñucaman cushpa tucui rupachingui.

Mandacpac japina cashcamanta

16Mandac Dios cutinllatac rimashpaca: Maijan mandac allpata paipac churicunaman cucpica, chai allpaca paipac churicunapacmi canga. Paicunapac herenciami canga.

17Ashtahuanpish maijan mandac allpata paita servicman cucpica, chai allpaca servishpa causana huata pactangacamanmi servic runapac canga. Cutichina huata pactacpica, mandacllamantacmi cutichinga. Chai allpaca churicunapacmi canga.

18Mandacca chai llactapi causaccunapac allpataca mana quichunachu can. Paipac churicunamanca paipac allpatami cuna can. Shina ruhuacpimi, ñuca acllashcacunaca mana allpa illac saquiringa. Shucllapish paicunapac allpamantaca mana llucshinachu can” ninmi ningui» nirca.

19Chai quipaca chai runaca ura lado pungu lado, curacunapac ucumanmi pusharca. Chai huashapica shuc ucutami ricurcani. Chaica inti tigrana ladomanmi carca.

20Chaimantaca: «Caipimi curacunaca juchamanta, mana allita ruhuashcamanta ñucaman cushca animal aichataca yanunga. Canzhaman mana llucchishpami, grano ofrendataca chai ucullapitac yanunga. Canzhaman llucshicpica, gentecuna ñucapaclla tucungami» nirca.

21Chai quipaca canzha pambaman llucchishpami, chai pamba chuscu esquinacunata purichirca. Chaipica cada esquinacunapimi uchilla pamba tiyarca.

22Chai huasi pungu pamba chuscu esquinacunapi cac pambaca muyundita pircashcami carca. Chai pambaca chuscu ladotami ishcai chunga metro largo, chunga pichca metro ancho carca. Chai pambaca chuscu ladotami chashnallatac medirca.

23Chai uchilla pambacunaca chuscu ladotami pircashca carca. Chai muyundi pirca ladopica nina japichinacunami tiyarca.

24Chaipica: «Cai huasipi servishpa causaccunaca Diosman cushca ofrendataca cai ucupimi yanunga» nirca.