1Chai quipami Davidca: «¿Jonatanta cuyashcamanta ayudangapac Saulpac huasi ucupuramanta maijan causacungaracchu?» nishpa tapurca
2Saulpac huasi ucupurata servic Siba runami tiyarca. Paitami Davidpacman cayarca. Chashna shamucpimi jatun mandac Davidca:
—¿Canca Sibachu cangui?— nirca.
Shina tapucpi Sibaca:
—Ari, canta servic ñucami cani— nirca.
3Shina nicpimi, jatun mandac Davidca:
—Dios cuyac cashcata ricuchingapac Saulpac huasi ucupuracunaca, ¿manachu maijanllapish saquirishca?— nishpa tapurca.
Shina tapucpimi paica:
—Jonatanpac shuc churi tiyanracmi. Paica ishcai chaquita lisiadomi— nirca.
4Shina nicpimi, jatun mandac Davidca:
—¿Maipitac paica?— nirca.
Shina nicpimi Sibaca:
—Paica Lodebar pueblopi, Amielpac churi Maquirpac huasipimi— nirca.
5Shina nicpi, jatun mandac Davidca Lodebar puebloman rishpa, Amielpac churi Maquirpac huasimanta pushamuchun cacharca.
6Shina pushamucpimi, Jonatanpac churi Saulpac nieto Mefi-bosetca Davidpacman shamushpa, pambapi ñahui tupangacaman cumurirca. Shina cumuricpimi Davidca:
—¿Mefi-bosetchu cangui?— nirca.
Shina nicpimi paica:
—Ari, canta servic ñucaca caipimi cani— nirca.
7Shina nicpimi Davidca:
—Ama manchaichu. Cambac taita Jonatanta cuyashcamantami canmanca allicunata ruhuagrini. Shinallatac cambac taita Saulpac allpatapish canman cutichigrinimi. Canca punzhantami ñuca mizapi micugringui— nirca.
8Shina nicpimi, Mefi-boset cumurishpaca:
—Jatun mandaclla, ñuca huañushca allcu shinamanca, ¿ima nishpatac chashna allicunata ruhuasha ninguiyari?— nirca.
9Shina nicpi, jatun mandac Davidca Saulta servic Sibata cayashpaca:
—Cambac amo Saulpac tucui ima tiyashcatapish, paipac huasi ucupurapac tiyashcatapish paipac nieto Mefi-bosetmanmi cutichircani.
10Canpish, cambac churipish, canta serviccunapish paiman allpapi trabajashpa granota pucuchinguichic. Shinallatac chai pucushcacunataca cambac amopac nieto Mefi-boset micunata charichun huacaichinguichic. Shina cacpipish, Mefi-bosetca punzhantami ñuca mizapi micunga— nirca.
Sibaca chunga pichca churita, ishcai chunga servictami charirca.
11Sibaca jatun mandac Davidtaca:
—Canta servic ñucaca can mandashca shinallatacmi ruhuasha— nirca.
Cutin Mefi-bosetca jatun mandac shinami, jatun mandac Davidhuan mizapi micuc carca.
12Mefi-bosetca uchilla churi Micaiastami charirca. Sibapac huasipi tucui causaccunami Mefi-bosetta servic carca.
13Mefi-bosetca jatun mandac-huan micushpa causac cashcamantami Jerusalenpi causarca. Paica ishcai chaquita lisiadomi carca.
Who We AreWhat We EelieveWhat We Do
2025 by iamachristian.org,Inc All rights reserved.
