1Efraín urcupimi shuc runa tiyarca. Paica Micaías shutimi carca.
2Chai runami paipac mamataca:
—Canca chai huaranga shuc patsac siclos cullquita shuhuachishpaca ñucapac ñaupapimi maldiciashpa rimarcangui. Chai cullquitaca ñucami shuhuashpa charicuni— nirca.
Shina nicpimi, paipac mamaca:
—¡Ñuca huahualla, Mandac Dios bendiciachun!— nirca.
3Micaías paipac mamaman chai huaranga shuc patsac siclos cullquita cutichicpimi mamaca:
—Chai cullquitaca canmantami Mandac Diosman chicanyachircani. Cai cullquita labrashpa, yacuyachishpa shuc diosta ruhuachunmi cugricurcani. Cunanca canllatac japilla— nirca.
4Shina nicucpipish paica cutichircami. Mamaca ishcai patsac siclos cullquita japishpami cullquita yacuyachic runaman curca. Paimi chai cullquita yacuyachishpa shuc diosta ruhuarca. Chai diostaca Micaiaspac huasipimi churarca.
5Chai Micaiasca dioscuna tiyana huasitami charirca. Shinallatac efodta, huasipi charina dioscunatapish ruhuachishpami paipac churicunamanta shuc churita acllashpa cura cachun churarca.
6Chai punzhacunapica Israel llactapica mana jatun mandac tiyarcachu. Chaimantami gentecunaca quiquin munashcata ruhuashpa causarca.
Micaiaspac huasipi shuc Levita causashcamanta7Judá llacta Belén pueblopimi Judá aillupuramanta shuc levita moso pozashpalla causacurca.
8Chai mosomi Judá llacta Belén pueblomanta maipi causanata mashcangapac llucshirca. Chashna llucshishpami Efraín urcu llactacunata rishpa Micaiaspac huasiman chayarca.
9Shina chayacpimi Micaiasca:
—¿Maimantatac shamucungui?— nishpa tapurca.
Shina tapucpi paica:
—Judá llacta Belén pueblomanta levitami cani. Maipi causanata mashcashpa chaipi causangapacmi ricuni— nirca.
10Shina nicpimi Micaiasca:
—Ñucahuan causangapac saquiri. Caipi saquirishpaca ñuca taita shinapish, cura shinapish tucunguimi. Ñucaca huatapi chunga siclos cullquitapish, micunatapish, churanatapish cushami— nirca.
Shina nicpimi, chai levitaca chaipi causangapac saquirirca.
11Shinami levitaca chaipi causangapac ari nishpa Micaiaspac quiquin churi shina causarca.
12Micaiasca paipac cura cachunmi churarca. Chai mosoca cura tucushpami Micaiaspac huasipi causarca.
13Chaimantami Micaiasca:
—¡Levitami ñucapac cura cangapac shamushca, cunanca Mandac Diosca ñucataca imapipish allimi pushanga!— nirca.
Who We AreWhat We EelieveWhat We Do
2025 by iamachristian.org,Inc All rights reserved.
