2 REYES 21 - Biblia Quichua Cañar 2010

Manasés Judá llactata mandashcamanta(2 Cr 33.1-20)

1Manasesca chunga ishcai huatata charishpami mandai callarirca. Paica pichca chunga pichca huatatami Jerusalenpi mandarca. Paipac mamaca Hepsibami carca.

2Mandac Diospac ñaupapica mana allitami ruhuashpa causarca. Israelcunapac ñaupamanta Mandac Dios llucchishpa cachashca gentecuna ruhuashca shinallatacmi millanayai juchacunata ruhuashpa causarca.

3Paipac taita Ezequías lomacunapi tiyac altarcunata urmachishcataca paimi cutin shayachirca. Baal diosmanpish altarcunata ruhuarcami. Israel llactata jatun mandac Acab ruhuashca shinallatacmi Asera huarmi diostapish charirca. Jahua pachapi tiyac tucui lucerocunatapish alli nishpami adorarca.

4Mandac Diospac huasipipish altarcunatami shayachirca. Chai huasitami Mandac Diosca: «Jerusalenpimi ñuca shutita churasha» nishca carca.

5Shinallatac Mandac Diospac huasi pungucunapimi jahua pachapi tiyac tucui lucerocunaman altarcunata ruhuarca.

6Manasesca, paipac churitaca huañuchishpami rupachirca. Adivinocunapish, brujocunapish, huañushcata cayaccunapish, maijan nishcatapish yachachichunmi churarca. Chashna yalli millaita ruhuashpami Mandac Diosta piñachirca.

7Asera huarmi diosman ricchatapish Mandac Diospac huasipi churarcami. Mandac Dios chai huasimanta Davidtapish, paipac churi Salomontapish rimashpaca: «Ñuca huasi tiyacuc Jerusalén pueblotaca tucui Israel aillupuramantami acllarcani. Cai huasipimi ñuca shutitaca huiñaita causachun churasha.

8Imata ñuca mandashca shinallatac, ñucata servic Moisés cancunata mandashca shinallatac tucuita cazushpa pactachicpica, cancunapac ñaupa taitacunaman cushca llactamantaca manatac llucchishpa cachashachu» nishcami carca.

9Ashtahuanpish paicunaca mana uyarcacunachu. Manasesca Mandac Dios israelcunapac ñaupamanta tucuchishca gentecunatapish yalli mana allitami ruhuashpa causarca.

10Chaimantami Mandac Diosca paita servic paimanta huillaccunaman huillachishpaca:

11«Judá llactata jatun mandac Manasesca cashna millanayai juchacunata ruhuashpami, ñaupa punzhacunapi causac amorreocunatapish ashtahuan yalli mana allita ruhuachirca. Shinallatac paipac ruhuashcalla dioscunahuanmi Judá llactapi causaccunataca juchata ruhuachirca.

12Chaimantami israelcunata Mandac Diosca: “Ñucami Jerusalenpi, Judá llactapi causaccunaman jatun llaquita cachagrini. Maijanpish chaita uyacca ishcai ringritatacmi nanachinga.

13Jerusalenpi causaccunataca Samaria pueblopi causaccunata llaquichishca shinallatacmi chai cordel-llahuantac llaquichisha. Acabpac huasi ucupurata llaquichishca plomadallahuantacmi llaquichisha. Jerusalentaca platota jahuashpa puctic shinami saquisha.

14Maijan saquirishca ñuca acllashcacunataca paicuna ima charishcata quichuchun, llucchishpa cachachunmi piñaccunapac maquipi saquisha.

15Paicunaca ñaupa taitacuna Egiptomanta llucshimushcamanta pacha, cunan punzhacamanmi ñuca ñaupapi mana allita ruhuashpa, yallita piñachincuna. Chaimantami chashna ruhuagrini” ninmi» nishpa huillarca.

16Judá gentecunata juchata ruhuachishca jahuami Manasesca mana faltayuc gentecunata huañuchishpa, Jerusalenpica caishuc ladomanta chaishuc ladocaman yahuarta yallita jicharca.

17Manasespac shuctac ruhuashcacunapish, imacunallata ruhuashcacunapish, juchallishcapish Judá llactata jatun mandaccuna imata ruhuashcacunata quillcashcapimi tiyacun.

18Manasés huañushpa paipac ñaupa taitacunahuan tandanacugricpica, paipac huasipi tiyac Uzapac huertapimi enterrarca. Paipac churi Amonmi paipac randica mandarca.

Amón Judá llactata mandashcamanta(2 Cr 33.21-25)

19Amonca ishcai chunga ishcai huatata charishpami Judá llactata mandai callarirca. Paica ishcai huatatami Jerusalenpi mandarca. Paipac mamaca Jotba pueblomanta Haruzpac ushi Mesulemetmi carca.

20Paipish Mandac Diospac ñaupapica paipac taita Manasés shinallatacmi mana allita ruhuarca.

21Paipac taita imata ruhuashpa causashca shinallatac, ruhuashcalla dioscunallata servishpa adorashpa causashca shinallatacmi causarca.

22Paipac ñaupa taitacunapac Mandac Diosta saquishpami, Mandac Diospac ñanmanta anchurirca.

23Jatun mandac Amontaca paita serviccunallatacmi pacalla parlanacushpa, pai mandashpa tiyana huasillapitac huañuchirca.

24Ashtahuanpish chai llactapi causaccunami pacalla parlanacushpa, jatun mandac Amonta huañuchiccunataca tucuita huañuchishpa, Amonpac randica paipac churi Josiasta jatun mandac cachun churarca.

25Amonpac shuctac ruhuashcacunapish, imacunallata ruhuashcacunapish Judá llactata jatun mandaccuna tucui imata ruhuashcacunata quillcashcapimi tiyacun.

26Amontaca paita enterrana jutcullapitacmi Uzapac huertapi enterrarca. Paipac churi Josiasmi paipac randi mandarca.