1Cai yuyaita cuc rimaicunapish Salomón quillcashcallatacmi. Cai rimashcacunaca Judá llactata jatun mandac Ezequiaspac quillcaccuna copiashcami.
2Imata pacalla charinaca
Diospac sumaimanami.
Sumacta callarishpa ricunaca
jatun mandacpac allimi.
3Jahua pacha maicaman cactapish,
cai pacha maicaman ucu cactapish,
jatun mandaccunapac shungu imata
yuyacushcatapish
pi mana yachai pudinchu.
4Cullquita yacuyachishpa
mapata anchuchingui.
Chashna anchuchicpimi,
cullquita yacuyachic runamanca
sumac imallacuna llucshinga.
5Diosta mana manchac runata
jatun mandacpac ñaupamanta anchuchingui.
Shina anchuchicpimi,
jatun mandacca
cashcata ruhuashpa sinchiyanga.
6Jatun mandacpac ñaupapi
ama canllatac allimi cani ninguichu.
Jatuncuna tiyarinapipish
ama tiyaringuichu.
7Mandacpac ñaupapi pingaihuan
cumurinapac randica:
«Caiman huichicui» ningacaman
shuyanami ashtahuan alli.
8Imatapish ricushpaca
ama tigrai juezcunaman huillangapac
ringuichu.
Pacta shuctac huillac
mana chashnachu nishpa
canta pingaichinman.
9Canta pi imata nicpipish,
chaitaca paillahuan allichingui.
Imata canlla yachashpaca
ama piman huillanguichu.
10Pacta can parlashcata maijan uyashpa
pingaichinman.
Pacta canta juchanchishpa pingaichishcapish,
mana allichipac tucunman.
11Manarac llaqui tiyacpi,
alli yuyarishpa rimarishcaca
curi manzanapi cullquita churashpa,
sumacta ruhuashca shinami.
12Imatapish uyaclla, yachaisapa
runata jarcashpa rimac runaca curi
zarcillo shina, ashtahuan alli curimanta
ruhuashca sumac huallca shinami.
13Tucuita pactachic huillacca
huillachun cachacpacca,
cosecha punzhapi
chiri yacuta cushca shinami.
Chai runaca paipac amopac
causaitami samachin.
14Jatun tucushpa imatapish cushami nishpa
mana pactachic runaca
tamya illac puyu huaira shinami.
15Mandac piñaricpica,
allimantallami cushichina.
Sumac rimaicunaca tullutapish paquinllami.
16¿Bunga mishquita tarircanguichu?
Tarishpaca pudishcallata micungui.
Yallita micushpa arcadanguiman.
17Vecinopac huasiman
ama yallita ringuichu.
Pacta canta mana ricusha nishpa
piñai callarinman.
18Maijanta yanga juchanchishpa
huillac runaca martillo,
espada, flecha shinami.
19Llaqui punzhacunapi cashpa,
mana cazuc runa ayudachun shuyanaca
quiru paquirishca shina,
chaqui quihuishca shinami.
20Llaquilla shungu runaman cantashpaca
chiri punzhapi churanata
quichushca shinami.
Mana cashpaca chugri
jahuapi vinagreta tallishca shinami.
21Canta piñac runa yarcachicpica,
micunata carangui.
Yacunayaihuan cacpica,
yacuta ubiachingui.
22Shina ruhuacpica nina
rupachic shinami pinganga.
Mandac Diosca canmanca allicunatami cunga.
23Jahua ladota huaira shamushpaca,
tamyatami apamun.
Imatapish rimac runaca
piñachishpami saquin.
24Imatapish rimarishpa
yallita piñachic huarmihuan
jatun huasipi causanapac randica,
huasi azoteapi shuc cuchitupi
causanami ashtahuan alli.
25Caru llactamanta
alli huillaita huillac shamucca
yallita yacunayachicucpi,
chirilla yacu yaicuc
shinami ruhuan.
26Cashcata ruhuac runa
Diosta mana manchac runapac
ñaupapi urmashpaca,
tucyac yacu turuyashca,
jundu yacu mapayashca shinami.
27Bunga mishquita yallita micunaca
mana allichu.
Quiquinllatac sumacmi cani ninapish
mana allichu.
28Mana jarcarishpa utca piñaric runaca
muyundi pirca urmashca pueblo shinami.
Who We AreWhat We EelieveWhat We Do
2025 by iamachristian.org,Inc All rights reserved.
