1Jatun mandac Nabucodonosor ñucami tucui cai pachapi causacta, jatun llactapi causaccunata, chican rimaita rimaccunata: “Cushi causaichic” nishpa quillcani.
2Jahua pacha Dios ñucaman milagrocunata, pi mana ruhuaipacta ruhuashpa ricuchishcata cancunaman huillana alli cacpimi huillani.
3¡Pai mancharinacunata, pi mana ruhuaipacta ruhuashcaca mai sumacmi! Paica huiñai huiñaitami mandacunga. Quipa huahua huahuacaman mandacungallami.
4Nabucodonosor ñucaca huasipipish, mandana huasipipish cushillami sumacta carcani.
5Chashna cashpami shuc tuta shuc muscuita muscushpa yallita mancharircani. Muscuipi shina ricurishcaca ñuca yuyaipica yallitami muspachirca.
6Chaimantami chai muscushca imata nisha nicushca huillachun Babilonia llactapi causac tucui yachaccunata pushamuchun mandarcani.
7Chashna shamucpimi yachaccunaman, lucerota ricushpa yachacuccunaman, adivinocunaman muscushca imata nisha nicushcata huillarcani. Shina huillacpipish, paicunaca chai muscushca imata nisha nicushcataca mana huillai pudircachu.
8Shuc punzhami Daniel ñuca ñaupaman shamurca. Paica ñuca diospac Beltesasar shutimi. Paipica jucha illac dioscunapac espiritumi causan. Paiman ñuca muscushcata huillashpaca:
9“Yachaccunata mandac Beltesasarlla, canpi jucha illac dioscunapac espíritu causashcatapish, pi mana yachashcata huillac cashcatapish yachanimi. Chaimanta ñuca muscuipi shina ricushcata huillai.
10Ñuca camapi sueñucushpami ñucaca caita muscurcani:
Cai pacha chaupi
shuc jatun yura
shayacuctami ricurcani.
11Chai yuraca huiñashpami
sinchi tucurca.
Chai yuraca
jahua pachacamanmi carca.
Chaimantami cai pachamantaca
maimantapish ricunalla carca.
12Chai yuraca pangasapa,
achca granocunahuanmi carca.
Chaipi pucushca granoca
tucuiman pactaipacmi carca.
Tucui animalcunami
chai pangasapa yura ucupi
llanduricurca.
Cutin volashpa
ric animalcunaca
ramacunapimi causacurca.
Tucui causaita chariccunami
chai yura pucushcata
micushpa causacurca.
13Ñuca camapi cashpami, ñuca yuyaipica, jahua pachamanta shuc ángel shamucuctami ricurcani.
14Paica sinchita caparishpami:
‘¡Chai yurata tigrachishpa,
ramacunata pitichic!
¡Pangacunata anchuchishpa,
granotapish shic-huaichic!
¡Chai yura ucupi caccunapish,
ramapi causac volac
animalcunapish anchurichun!
15Shina ruhuashpapish
troncotaca sapindi
fierro cadenahuan
quihua chaupipi
huatashpa saquichic.
Jahua pachamanta
tamya urmashpa jucuchichun.
Sacha animalcunahuan
quihuata micushpa causachun
saquichic.
16Paica runapac yuyaita
charinapac randica,
animalpac yuyaita charichun.
Chashna canchis
huatacaman cachun.
17Angelcunaca cai pacha runacunapac
llactataca jahua pacha Dios
mandacushcata,
chai mandanata pai piman
cusha nishpaca
cuclla cashcatapish,
tucuimanta yalli yangalla
runata mandanapi churac
cashcata causaita chariccuna
yachachunmi chashna mandashpa
huillarca’ nirca.
18Cai muscuitaca jatun mandac Nabucodonosor ñucami muscurcani. Cai muscushca imata nisha nicushcataca tucui ñuca mandana llactacunapi causac yachaccunaca mana huillai pudircachu. Chaimanta can Beltesasar huillaiyari. Canpica jucha illac dioscunapac espiritumi causan. Chaimantami cai muscui imata nisha nicushcataca huillai pudingui” nircani» nirca.
19Shina nicpimi, Beltesasar nishca Danielca paipac yuyaipi ashata mancharishca saquirirca. Chashna cacpimi jatun mandacca:
—Cai muscuimantapish, cai muscui imata nisha nicushcamantapish ama manchashpa saquirichu— nirca.
Shina nicpimi Beltesasarca:
—¡Ñuca mandaclla, can muscushcapish, chai muscushca imata nisha nicushcapish canta piñaccunaman cachun!
20Can ricushca huiñashpa sinchiyashpa, jahua pachacaman jatun, cai pachamantaca maimantapish ricunalla,
21pangasapa, granocuna jundashca, chai granocunaca tucuiman pactac, tucui animalcuna chai yura ucupi llandurina, cutin ramacunapica volac animalcuna causana yuraca,
22canmi cangui. Jatun mandaclla, canmi chai yura shina huiñashpa sinchiyashcangui. Canca jahua pachacaman huiñac shina alli nishca cashpami tucui cai pacha tucuricaman mandacungui.
23Can jatun mandac ricushca jahua pachamanta jucha illac ángel shamushpa: “¡Chai yurata pitishpa polvoichic! Shina ruhuashpapish troncotaca chai quihua pambapi fierro cadenahuan, bronce cadenahuan huataichic. Chai troncota jahua pachamanta tamya urmashpa jucuchichun, shinallatac canchis huatacaman animalcunahuan micuchun saquichic” nishcaca,
24jatun mandaclla, jahua pacha Dios canta llaquichigricushcatami nisha nin.
25Cantaca gentecunapuramantami llucchishpa cachanga. Chaimantami canca animalcunahuan pacta causangui. Huagraman shinami quihuata caranga. Jahua pachamanta tamya urmashpami canta jucuchinga. Chashnami canca cai pacha mandaccunataca jahua pacha Dios mandac cashcata, shinallatac cai pacha llactacunata mandanata piman cusha nishpaca cuclla cashcata yachangacaman canchis huatata chashna causangui.
26Cutin chai yura troncota chaillapitac saquishcaca, jahua pacha Dios jatun mandac cashcata, can yachashca quipa, canllatac sinchita mandashpa catinatami nisha nin.
27Chaimanta jatun mandaclla, ñuca cunashcata uyaiyari. Cashcata ruhuashpa, juchamanta llucshiyari. Huacchacunata llaquishpa, millaita ruhuanamanta anchuriyari. Chashna cushilla causanguipishchari.
28Tucui caicunami jatun mandac Nabucodonosorca tucurca.
29Shuc huata quipa jatun mandacca pai Babilonia llactata mandana huasi jahuapi puricushpami:
30«¿Manachu cai jatun Babilonia llactataca ñuca alli nishca cangapac, ñuca fuerzahuan shayachircani?» nirca.
31Jatun mandac chashna rimashpa manarac upallayacpimi, jahua pachamanta shuc rimashpaca: «Jatun mandac Nabucodonosorlla, cambac mandanata quichushcami.
32Gentecunapuramanta llucchishpa cachacpimi, sacha animalcunahuan pacta causangui. Huagraman shinami quihuata caranga. Cai pacha mandaccunataca jahua pacha Dios mandacushcata, cai pacha mandanataca piman cusha nishpapish cuclla cashcata yachangacamanmi canchis huatata chashna causangui» nirca.
33Chai horasllatacmi Nabucodonosor ima tucunaca pactarca. Chashnami gentecunapuramanta llucshi rishpa, huagracuna micuna quihuata micushpa causarca. Paipac cuerpotaca jahua pachamanta tamya urmashpami jucuchirca. Shinallatac paipac acchaca águila pluma shina, cutin shillucunaca volac animalcunapac shillu shinami huiñarca.
Nabucodonosor alliyashcamanta34Chai nishca punzhacuna pactacpimi, Nabucodonosor ñucaca jahua pachata huichailla ricurcani. Chashna ricushpami, cutin yuyaita japircani. Chaimantami jahua pachapi huiñaita causac Diostaca:
“Huahua huahuacunata
jatun mandac, sumaimanami
cangui nishpa alli nircani.
35Paipac ñaupapica
tucui cai pachapi causaccuna
mana ima canchu.
Paimi jahua pachapi
tucui tiyaccunatapish,
cai pachapi tucui
tiyaccunatapish pai
munashca shina ruhuan.
Paipac poderhuan imata
ruhuacucpipish, pi mana
jarcai pudinchu.
Shinallatac mana pi:
‘¿Imatatac ruhuacungui?’
nishpa tapunchu”
nishpa alli nircani
36Chai horasllatacmi yuyaita japircani. Ñuca mandana llactatapish allichishpa cutinllatac alli nishcami carca. Shinallatac ñucata ayudashpa mandaccunapish, ñucata cunaccunapish cutinmi ricuc shamurca. Chashnami ñuca mandana llactataca cutin mandacurcani. Ashtahuan alli nishca mandacmi tucurcani.
37Cunanca Nabucodonosor ñucaca jahua pachata jatun Mandacta “sumaimana cangui” nishpami alli nini. Tucui pai ruhuashcaca pai nic cashcata, ruhuac cashcatami ricuchin. Jatun tucushca gentecunatapish cumurichinmi.
Who We AreWhat We EelieveWhat We Do
2025 by iamachristian.org,Inc All rights reserved.
